InfoHub Logo

الماتى قالاسىنىڭ جول قوزعالىسىن ۇيىمداستىرۋ جانە جولاۋشىلار كولىگى باسقارماسى قالانىڭ نەگىزگى ماگيسترالدارىنداعى اۋقىمدى وزگەرىستەر جوسپارىن جاريالادى. بۇل جاڭالىقتار قالانى ارالاپ جۇرگەن ءاربىر تۇرعىننىڭ ومىرىنە اسەر ەتەدى.

بۇل تۋرالى Infohub.kz اقپارات اگەنتتىگى حابارلايدى.

باسقارما باسشىسى ەرجان ديحانبايەۆتىڭ ايتۋىنشا، قازىرگى ۋاقىتتا تيميريازيەۆ كوشەسىندەگى قالاداعى جالعىز BRT جەلىسىن الىپ تاستاۋ مۇمكىندىگى قاراستىرىلۋدا. الايدا، بۇل كوشەدە قوعامدىق كولىك كەپتەلىستە قالمايدى، ولار ءۇشىن جاڭا ارنايى جولاقتار جاسالادى.

تيميريازيەۆ كوشەسىندەگى وزگەرىستەر

«كوشە ورتاسىنداعى BRT جەلىسى كولىك وتكىزۋ قابىلەتىن ازايتتى. سونىڭ سالدارىنان كولىك اعىنى ال-فارابي داڭعىلىنا اۋىسىپ، سول جەردەگى كەپتەلىستەردى كورىپ وتىرمىز. بۇل ماسەلەنى شەشۋ ءۇشىن، وتكىزۋ قابىلەتىن قالپىنا كەلتىرۋ ماقساتىندا تيميريازيەۆ كوشەسىندە ءبىر باعىتتى قوزعالىس ەنگىزىپ، اۆتوبۋس جولاقتارىن كوشەنىڭ ورتاسىنان جيەگىنە اۋىستىرۋ قاراستىرىلۋدا»، - دەدى ەرجان ديحانبايەۆ.

بيىلعى جىلى باسقارما جول قوزعالىسىن ۇيىمداستىرۋ سالاسىنداعى ساراپشىلار مەن ۇلتتىق عىلىم اكادەمياسىنىڭ عالىمدارىن تارتا وتىرىپ، الماتى كوشەلەرى بويىنشا جول قوزعالىسىن ۇيىمداستىرۋدىڭ جاڭا كەشەندى جوبالارىن ازىرلەۋ جۇمىستارىن جۇرگىزۋدى جوسپارلاپ وتىر. جوبالار 2026 جىلى اياقتالىپ، 2027 جىلى ەنگىزىلەدى دەپ كۇتىلۋدە. جاز ايلارىنداعى جوندەۋ جۇمىستارىنا بايلانىستى ۋاقىتشا قولايسىزدىقتار بولۋى مۇمكىن ەكەنى ەسكەرتىلدى، ءبىراق 2027 جىلدىڭ كۇزىنە قاراي ناتيجە ايتارلىقتاي بولادى دەپ سەندىردى.

ال-فارابي داڭعىلىنداعى جاڭالىقتار

2026 جىلى ال-فارابي داڭعىلىندا اۆتوبۋستارعا ارنالعان ارنايى جولاقتار جوباسىن ەنگىزۋ جوسپارلانۋدا. بۇل رەتتە باسقا كولىك تۇرلەرىنە ارنالعان جولاقتار سانى ازايتىلمايدى.

«كەيبىر قيىندىقتار بار، ءبىراق ءبىز جاۋاپكەرشىلىكتى ءوز موينىمىزعا الىپ، اۆتوبۋس جولاعىن ەنگىزگىمىز كەلەدى. قازىرگى ۋاقىتتا جول قوزعالىسىن ۇيىمداستىرۋ سىزباسىن ازىرلەۋدى اياقتاپ جاتىرمىز. اۆتوموبيلدەر ءۇشىن جولاقتاردى ازايتپايمىز، تەك جولاقتاردىڭ ەنىن تارىلتۋ ەسەبىنەن اۆتوبۋس جولاعىن قوسامىز. قازىرگى جولاقتاردىڭ ەنى 3،75 مەتر، بۇل الەمدىك تاجىريبەنى زەرتتەۋ جانە تالداۋ ناتيجەلەرى بويىنشا الىنعان قورىتىندىلارعا سايكەس، اۆتوبۋس جولاعىن قوسۋعا مۇمكىندىك بەرەدى. بۇل وتە كەڭ جولاق. جاز ايلارىندا ال-فارابي، ۆواد، سولتۇستىك اينالما جانە رىسقۇلوۆ داڭعىلدارىندا اۆتوبۋس جولاقتارىن ەنگىزۋدى جوسپارلاپ وتىرمىز، قوعامدىق كولىكتەردىڭ كەدەرگىسىز ءجۇرۋىن قامتاماسىز ەتكىمىز كەلەدى»، - دەدى ەرجان ديحانبايەۆ.

باسقا جوبالارعا شولۋ

بۇعان قوسا، رايىمبەك داڭعىلىنداعى BRT جوباسى دا قايتا قارالۋدا. مامان ەلجان شوپەكوۆتىڭ ايتۋىنشا، رايىمبەكتەن ەمسوۆ كوشەسىنە دەيىنگى BRT ۋچاسكەسىنىڭ ءبىر بولىگى الىنىپ تاستالادى. بۇل شەشىم LRT قۇرىلىسىنىڭ باستالۋىنا بايلانىستى قابىلدانعان. قوعامدىق كولىكتەردىڭ قوزعالىسىنىڭ قايتالانۋىن بولدىرماۋ ءۇشىن BRT جوباسى قايتا قارالىپ، وڭ جاق شەتكى جولاقتارداعى قوعامدىق كولىك قوزعالىسى زەرتتەلۋدە. سوندىقتان قازىرگى ۋاقىتتا جوبانىڭ ىسكە اسىرىلۋى توقتاتىلا تۇردى.

جەلتوقسان كوشەسىندەگى جوباعا كەلەتىن بولساق، ونىڭ تيىمدىلىگى باقىلانۋدا. ەلجان شوپەكوۆ بۇل جوبانى حالىقارالىق ستاندارتتاعى BRT دەپ ساناۋعا بولمايتىنىن اتاپ ءوتتى. باسقارما باسشىسى قالادا كەزەڭ-كەزەڭمەن شەشىمدەردى سىناقتان وتكىزۋ ارقىلى تيىمدىلىگىن باعالاۋ ءادىسى قولدانىلاتىنىن ءتۇسىندىردى. سوندىقتان جەلتوقسان كوشەسىندە تولىققاندى BRT ەمەس، اۆتوبۋستارعا ارنالعان ارنايى جولاقتار ۇيىمداستىرىلعان.