InfoHub Logo

سوڭعى كەزدەرى الماتى تۇرعىندارى قالا اۋلالارىنداعى تورعايلاردىڭ ازايىپ كەتكەنىنە نازار اۋدارىپ، الەۋمەتتىك جەلىدە بۇل تۋرالى پىكىر بىلدىرۋدە. كەيبىر تۇرعىندار بۇل قۇبىلىستى جاندىكتەردىڭ كوبەيۋىمەن بايلانىستىرادى.

بۇل تۋرالى Infohub.kz اقپارات اگەنتتىگى حابارلايدى.

تۇرعىندار نە بايقادى؟

جەلىدەگى ءبىر جازبادا الماتىدا تورعايلاردىڭ جوعالىپ كەتكەنى ايتىلعان. اۆتوردىڭ ايتۋىنشا، بۇرىن بۇل قۇستار كوشەلەردە، ساياباقتاردا، ءتىپتى اۋلالاردا دا كوپ بولعان، ال ءقازىر ولاردى سيرەك كورۋگە بولادى. سونىمەن قاتار، تورعايلار ازايعاننان كەيىن جاندىكتەردىڭ، سونىڭ ىشىندە قوڭىزدار مەن ورمەكشىلەردىڭ كوبەيگەنىن بايقاعانىن جازعان.

پىكىر قالدىرعان قالا تۇرعىندارى ءارتۇرلى بولجامدار ۇسىندى. بىرەۋلەر تورعايلاردى قالادا كوبەيىپ كەتكەن ماينالاردىڭ ىعىستىرىپ شىعارعانىن ايتسا، ەندى بىرەۋلەر قۇستارعا جەم-شوپ قويۋعا كەڭەس بەردى.

ورنيتولوگ نە دەيدى؟

ورنيتولوگ ۆيكتوريا كوۆشار الماتىدا تورعايلاردىڭ جوعالىپ كەتكەنى تۋرالى ايتۋدىڭ دۇرىس ەمەس ەكەنىن اتاپ ءوتتى. ونىڭ ايتۋىنشا، تۇرعىندار كوبىنەسە قالانىڭ ورتالىق اۋداندارى مەن تىعىز كوپقاباتتى ۇيلەر ورنالاسقان ايماقتاردى مەڭزەيدى.

«شىنىندا، تورعايلار قالادان جوعالعان جوق. تەك ولارعا جايلى مەكەندەردى تاڭداپ، ياعني اعاشتارى مەن بۇتالارى كوپ، جەكە سەكتور اۋماقتارىنا كوبىرەك قونىس اۋداردى. بەتون قابىرعالار مەن اسفالتتالعان كوشەلەر اراسىندا ولارعا جاسايتىن جاعداي جوق. قالانىڭ ورتالىعىنداعى جاعداي وزگەردى، سوندىقتان قۇستارعا ىڭعايلى جەرلەرگە اۋىستى»، — دەيدى مامان.

جاندىكتەرمەن كىم كۇرەسەدى؟

ماماننىڭ ايتۋىنشا، قالاداعى جاندىكتەردىڭ سانىن رەتتەۋدە باسقا قۇستار دا ماڭىزدى ءرول اتقارادى. مىسالى، ماينالار ءىرى جاندىكتەرمەن جاقسى كۇرەسسە، قالانىڭ باستى «سانيتارى» — ۇلكەن سينيسالار. بۇل قۇستار قالانىڭ بارلىق جەرىندە كەزدەسەدى جانە تەك جاندىكتەرمەن قورەكتەنەتىندىكتەن، ولار جاندىكتەرمەن كۇرەستە نەگىزگى كومەكشى بولىپ سانالادى.