InfoHub Logo

الماتىداعى «شايتان بازار» ساتۋشىلارى بىرەۋلەردىڭ «كينو تۇسىرەمىز» دەگەن جەلەۋمەن كەڭەس ءداۋىرىنىڭ جادىگەرلەرىن ۇرلاپ كەتكەنىن ايتىپ، الاڭداۋلى. بۇل جاعدايدان كەيىن ولار كينو تۇسىرۋشىلەرگە كەلگەندە اسا ساقتىق تانىتادى. ءتىپتى، ارزانعا ساتىلىپ جاتقان زاتتاردى دا اركىم قالاعانىنشا باعاسىن ءتۇسىرىپ العىسى كەلەتىنىنە نالىعان ساتۋشىلار بار.

«ءانشى مەن ارتىستەر تىم ارزانعا سۇرايدى. كينو تۇسىرۋشىلەر كەلگەندە، باعانى جەرگە ۇرۋعا تىرىسادى»، – دەيدى ساتۋشى اسپانديار.

بۇل تۋرالى Infohub.kz اقپارات اگەنتتىگى حابارلايدى.

بازاردىڭ تاريحى مەن تىنىس-تىرشىلىگى

الماتىلىقتار بۇل ساۋدا ورنىن «شايتان بازار» نەمەسە «بيت بازار» دەپ تە اتايدى. بۇرىن قازىرگى حالىق ارەنا ورنىندا «كاتاليزاتور» ساۋدا ورنى بولعاندا، وسى بازار سەنبى-جەكسەنبى كۇندەرى جۇمىس ىستەپتى. 2015 جىلى «جەتىسۋ» بازارى اشىلعان سوڭ، بازار وسى جەرگە كوشىرىلگەن. ءداستۇر بويىنشا، ەسكى-قۇسقى زاتتار تەك سەنبى-جەكسەنبى كۇندەرى ساتىلادى.

ساتۋشىلاردىڭ كوبى – زەينەتكەرلەر. ولار ۇيىندەگى ارتىق زاتتارىن اكەلىپ ساتىپ، ءناپاقا تابادى. اراسىندا جۇمىسسىز جۇرگەندەر دە بار.

قوسىمشا تابىس كوزى

ەركىن ەسىمدى ساتۋشى وسى بازاردا ون جىلدان بەرى جۇمىس ىستەپ، قوسىمشا تابىس تاۋىپ جۇرگەنىن ايتادى. «ءتاۋبا. بولادى. كوپ ادامدار كەلىپ، ۇيىندەگى ەسكى زاتتارىن وتكىزىپ كەتەدى. كەڭەس داۋىرىندەگى زاتتار سۋ تەگىن ساتىلىپ جاتىر. سەنبى، جەكسەنبى كۇندەرى جەتى-سەگىز مىڭ تەڭگە تاۋىپ كەتەمىن. قىستىگۇنى ايازدا بازارعا كىم كەلەدى؟ جازدا دا ادام كوپ كەلە بەرمەيدى. كوكتەم مەن كۇزدە كوبىرەك كەلەدى. بۇل بازاردا ساۋدا جاساپ، بايىپ كەتپەيتىنىڭ انىق. تەك نان مەن شايىڭ بولادى»، – دەيدى ول.

تۋريستىك ورتالىققا اينالۋ مۇمكىندىگى

ەركىن بازاردىڭ انتيكۆاريات ساتىلاتىن تۋريستىك ورىنعا اينالعانىن قالايدى. سوڭعى كەزدەرى شەتەلدىكتەر بۇل جەرگە ءجيى باس سۇعاتىن بولعان. «شەتەلدىكتەر جاقسى الادى. توسبەلگىلەردى، دۇربىلەردى، جالپى، ۇناتقانىن الىپ جاتادى. شەتەلدىك تۋريستەر ەسكى زاتتارعا قاتتى قىزىعادى. فرانسيا، گەرمانيا سەكىلدى ەلدەردە دە مۇنداي بازارلار دامىعان. جەرگىلىكتى بيلىك ورگاندارى كومەك قولىن سوزىپ، ساۋدا ورىندارىن تارتىمدى ەتىپ جاسايدى ەكەن»، – دەيدى ساتۋشى.

ونىڭ ايتۋىنشا، مۇنداي بازارلار ەۋروپادا تۋريستىك ورتالىققا اينالعان. قازاقستانعا كەلەتىن تۋريستەردى ستالين مەن لەنيننىڭ پورترەتتەرى، كەڭەس داۋىرىندەگى زاتتار، سوسياليستىك رەاليزم تۋىندىلارى قىزىقتىرادى.

قولجەتىمدى كيىم-كەشەك

بۇل جەردە كونە جادىگەرلەرمەن قاتار، ەسكى تۇرمىستىق زاتتار مەن كيىم-كەشەكتەردى دە تابۋعا بولادى. ساتۋشى ايگۇلدىڭ ايتۋىنشا، پايدا بولعان سوڭ ساۋدا جاساپ تۇرادى. «ساۋدانىڭ ءجۇرۋى تاۋارىڭىزعا بايلانىستى. ءوتىمدى بولسا، پايدا تابۋعا بولادى. نەگىزىنەن، تەمىر-تەرسەك ساتامىن. ءقازىر قىستىڭ كەزى. تات باسادى دەپ شىعارمايمىز. سوندىقتان ءقازىر ەسكى كيىمدەردى ساتىپ جاتىرمىز»، – دەيدى ول.

ونىڭ سوزىنشە، قولى قىسقا نەمەسە ۋاقىتشا قيىندىققا تاپ بولعان ادامدار وسى بازاردان ارزان باعامەن كيىنە الادى. «ءقازىر ءبارى قىمبات. سوندىقتان ەسكى كيىمدەردى ساتىپ الادى. بازار تەك سەنبى-جەكسەنبى كۇندەرى ىستەيدى. تۇراقتى ىستەگەنىن قالايمىز. ءبىراق ساتۋشىلار دا، ساتىپ الۋشىلار دا وسىعان ۇيرەنىپ قالعان. جۇمىس كۇندەرى باسقا جۇمىس ىستەيمىز. سەنبى، جەكسەنبى قوسىمشا تابىس تابۋعا شىعامىز»، – دەيدى ايگۇل.