InfoHub Logo

الماتى قالاسىنىڭ مەدەۋ اۋدانىندا پوليسيا قىزمەتكەرلەرى جاسوسپىرىمدەردىڭ زاڭدى وكىلدەرىنسىز تۇندە ويىن-ساۋىق ورىندارىندا جۇرگەنىن جانە ولاردىڭ اراسىندا الكوگولدىك ىشىمدىكتەردى تۇتىنۋ فاكتىلەرىن انىقتادى. بۇل تۋرالى Polisia.kz سايتىنا سىلتەمە جاساپ Tengrinews.kz حابارلادى.

بۇل زاڭ بۇزۋشىلىقتار تۇنگى كلۋبتار مەن بارلاردا، سونداي-اق مەيرامحانا كەشەندەرىنىڭ بىرىندە تىركەلدى. پوليسيا ءاربىر فاكتى بويىنشا قولدانىستاعى زاڭناماعا سايكەس شارالار قابىلدادى. مەكەمە يەلەرى مەن وكىلدەرى جاسوسپىرىمدەردى بەلگىلەنگەن ۋاقىتتا ويىن-ساۋىق ورىندارىنا كىرگىزگەنى جانە ولاردىڭ قاۋىپسىزدىگىن قامتاماسىز ەتۋگە قاتىستى باسقا دا بۇزۋشىلىقتار ءۇشىن جاۋاپقا تارتىلدى.

قاراۋ ناتيجەلەرى بويىنشا، مەكەمەلەردىڭ قىزمەتى التى اي مەرزىمگە توقتاتىلدى. سونىمەن قاتار، جاسوسپىرىمدەردىڭ اتا-انالارى مەن زاڭدى وكىلدەرى بالالاردى تاربيەلەۋ جانە باقىلاۋ جونىندەگى مىندەتتەرىن تيىسىنشە ورىنداماعانى جانە تۇندە ۇيدەن تىس جەرلەردە جۇرگەنى ءۇشىن جاۋاپكەرشىلىككە تارتىلدى.

بالالاردىڭ قاۋىپسىزدىگى – باستى نازاردا

«بالالار مەن جاسوسپىرىمدەردىڭ قاۋىپسىزدىگى ءبىزدىڭ جۇمىسىمىزدىڭ نەگىزگى باعىتتارىنىڭ ءبىرى بولىپ قالا بەرەدى. ويىن-ساۋىق مەكەمەلەرىنىڭ يەلەرى مەن اكىمشىلىگى زاڭ تالاپتارىن ساقتاۋعا جانە كامەلەتكە تولماعانداردىڭ تۇندە جۇرۋىنە جول بەرمەۋگە مىندەتتى. مۇنداي ءاربىر فاكتى ءپرينسيپتى قۇقىقتىق باعاسىن الادى. قابىلدانعان شارالار دەمالىس جانە ويىن-ساۋىق سالاسىندا جۇمىس ىستەيتىن بارلىق بيزنەس سۋبەكتىلەرى ءۇشىن ەسكەرتۋ بولۋى ءتيىس»، - دەدى مەدەۋ اۋداندىق پوليسيا باسقارماسىنىڭ باستىعى جانىبەك شىناسيلوۆ.

پوليسيا جاسوسپىرىمدەردىڭ قۇقىقتارى مەن قاۋىپسىزدىگىن قورعاۋ سالاسىنداعى زاڭ تالاپتارىن ساقتاۋ اتا-انالاردىڭ دا، بيزنەس وكىلدەرىنىڭ دە ورتاق مىندەتى ەكەنىن ەسكە سالدى. الدىن الۋ شارالارى جالعاسادى.