InfoHub Logo

الماتىداعى دوستىق داڭعىلىنىڭ جوندەۋ جۇمىستارى تۇرعىنداردىڭ نارازىلىعىن تۋدىردى. جەلىدە تاراعان سۋرەتتەردە جاڭادان توسەلگەن پليتكالاردىڭ شوگىپ كەتكەنى بايقالادى.

بۇل تۋرالى Infohub.kz اقپارات اگەنتتىگى حابارلايدى.

نە بولدى؟

الەۋمەتتىك جەلىلەردە الماتىنىڭ دوستىق داڭعىلىندا جۇرگىزىلگەن جوندەۋ جۇمىستارىنىڭ ناتيجەلەرى تۋرالى سۋرەتتەر جاريالاندى. جاڭادان توسەلگەن پليتكالاردىڭ شوگىپ كەتكەنى تۇرعىنداردىڭ اشۋىن كەلتىردى.

جەلى قولدانۋشىلارى ءوز پىكىرلەرىن ءبىلدىرىپ، جوندەۋ جۇمىستارىنىڭ ساپاسىنا نارازىلىقتارىن جەتكىزدى:

"ءتورت اي بويى قازىپ، سوڭىندا قالاي بولسا سولاي جاۋىپ تاستادى. ترامبوۆكا جاسالمادى. سوڭعى كۇندەرى ەكى جۇمىسشى عانا كورىندى."

"وتكەن جىلى دوستىقتى جارتى جىل بويى قينادى - تۇراق جوق، تاۋلىك بويى كەپتەلىس. وسىنداي ءۇشىن بە؟"

"بۇل ەڭ ماسقارا جوندەۋ، جازدان بەرى سوزىلىپ كەلەدى. ماسقارا!"

الماتى اكىمدىگىنىڭ جاۋابى

الماتى اكىمدىگى تۇرعىنداردىڭ نارازىلىعىنا جاۋاپ بەرىپ، تروتۋار پليتكالارىنىڭ شوگۋى ۋاقىتشا ەكەنىن مالىمدەدى.

"دوستىق داڭعىلىندا اباتتاندىرۋ جوباسى جۇزەگە اسىرىلۋدا، قۇرىلىس-مونتاج جۇمىستارى 2026 جىلدىڭ مامىر ايىنا دەيىن اياقتالادى. پودريادچيك ءىرى اعاشتاردى وتىرعىزۋ ءۇشىن شۇڭقىرلاردى دايىندادى. جەر جۇمىستارى مەن جاڭا توپىراقتىڭ تابيعي شوگۋى ناتيجەسىندە تروتۋار جابىندىسىنىڭ ۋاقىتشا شوگۋى تىركەلدى"، - دەپ حابارلادى قالالىق اكىمدىك.

اكىمدىك 2025 جىلدىڭ 5 جەلتوقسانىنان باستاپ قالپىنا كەلتىرۋ جۇمىستارى جۇرگىزىلىپ جاتقانىن اتاپ ءوتتى.

"جۇمىستار تەحنولوگيالىق نورمالار مەن توپىراق تىعىزداۋ پروسەستەرىن ەسكەرە وتىرىپ، كەزەڭ-كەزەڭىمەن جۇرگىزىلۋدە"، - دەدى باسپا ءسوز قىزمەتى.

جەرگىلىكتى اتقارۋشى ورگان جابىندىنى نورماتيۆتىك جاعدايعا كەلتىرۋ جۇمىستارى تولىق اياقتالعانعا دەيىن جالعاساتىنىن جانە بەلگىلەنگەن مەرزىمدە اياقتالاتىنىن ايتتى.

ەسكە سالايىق، دوستىق داڭعىلىنىڭ رەكونسترۋكسياسى جوباسى 2025 جىلى باستالعان بولاتىن. جوبا قۇنى 2،14 ميلليارد تەڭگەنى قۇرايدى جانە ول جالپى اباتتاندىرۋدان باسقا، كەڭەيتىلگەن تروتۋارلار، 3630 شارشى مەتر ۆەلوسيپەد جولدارى، كوگالداندىرۋ، زاماناۋي ماتەريالدارمەن جول بولىگىن قايتا قۇرۋ، جاڭا ەلەكتر جەلىلەرىنە قوسىلۋ، شاعىن ساۋلەت فورمالارىن ورناتۋ، جاڭا جاياۋ جۇرگىنشىلەر وتكەلدەرى مەن باعدارشامداردى قامتيدى.