InfoHub Logo

الماتى قالاسىنىڭ ورتالىعىندا ورنالاسقان، شامامەن 2500 جىل بۇرىنعى كونە قورعان بۇزىلىپ جاتىر. بۇل تۋرالى الەۋمەتتىك جەلىدە قالا تۇرعىنى جاريالاعان سۋرەتتەردەن بەلگىلى بولدى. قالانىڭ بەلدى تۇرعىندارى بۇل جاڭالىققا الاڭداۋشىلىق ءبىلدىرىپ، تاريحي ەسكەرتكىشتىڭ نە ءۇشىن بۇزىلىپ جاتقانىن سۇراۋدا.

بۇل تۋرالى Infohub.kz اقپارات اگەنتتىگى حابارلايدى.

كونە قورعاننىڭ تاريحى

الەۋمەتتىك جەلىدە جاريالانعان مالىمەتتەرگە سۇيەنسەك، بۇل قورعان جاندوسوۆ جانە روزىباكييەۆ كوشەلەرىنىڭ قيىلىسىنان تومەندە ورنالاسقان. مامانداردىڭ ايتۋىنشا، قورعان ەرتە تەمىر داۋىرىنە، ياعني ب.ز.د. VII-V عاسىرلارداعى ساقتار كەزەڭىنە جاتادى. ونىڭ بيىكتىگى شامامەن التى مەتر، ديامەترى 60 مەترگە جۋىق بولعان.

نەلىكتەن بۇزىلىپ جاتىر؟

قالا اكىمدىگىنىڭ حابارلاۋىنشا، بوستاندىق اۋدانى، 20-شى كوشەدەگى بۇل قورعان 2015 جىلى الماتى قالاسى مۋزەيلەرى بىرلەستىگىنىڭ ماماندارىمەن زەرتتەلگەن. سول جىلى قالالىق مادەنيەت باسقارماسى ونى جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنەن شىعارعان. سەبەبى، قورعاننىڭ تاريحي-مادەني قۇندىلىعى جويىلىپ، كوپ جىلدار بويى بۇزىلىپ، ناشار كۇيدە بولعان.

مامانداردىڭ دەرەگىنشە، قورعان اۆاريالىق جاعدايدا بولعان: ءۇيىندىسى ءىس جۇزىندە تولىق بۇزىلىپ، نىسان ۇزاق ۋاقىت بويى ادام اسەرىنە ۇشىراعان.

«2024 جىلى «ارحەولوگيالىق زەرتتەۋلەر» ج ش س جۇرگىزگەن تاريحي-مادەني ساراپتاما نىساننىڭ تاريحي-مادەني قۇندىلىعىنىڭ جوعالعانى جانە ونى تاريح پەن مادەنيەت ەسكەرتكىشى رەتىندە ودان ءارى ساقتاۋ مۇمكىن ەمەستىگى تۋرالى بۇرىن جاسالعان قورىتىندىلاردى راستادى»، - دەپ حابارلادى اكىمدىكتەن.

ورنىنا نە سالىنادى؟

قازىرگى تاڭدا بۇل اۋماقتا ەگىزبايەۆ كوشەسى، 9 مەكەنجايىندا ورنالاسقان 2500 ورىندىق جاڭا مەكتەپكە باراتىن كىرمە جول سالىنىپ جاتىر. جۇمىستاردى وسى جىلدىڭ تامىز ايىندا اياقتاۋ جوسپارلانعان.

ايتا كەتەيىك، الماتىدا بىرنەشە كونە قورعان ساقتالعان. سولاردىڭ ءبىرى روزىباكييەۆ پەن شتراۋس كوشەلەرىنىڭ قيىلىسى ماڭىندا ورنالاسقان. بۇعان دەيىن مۇندا اشىق اسپان استىنداعى مۇراجاي – «ساك مادەنيەتىنىڭ الەمدىك ورتالىعىن» قۇرۋ جوسپارلانعان بولاتىن.