InfoHub Logo

جەلىدە مارقۇم ءانشى ءمادينا ەرالييەۆانىڭ جەكە كۇندەلىگىنەن ءۇزىندى جاريالاندى. بۇل جازبانى اسەت اقمولدا ەسىمدى جەلى قولدانۋشى ءوزىنىڭ پاراقشاسىندا بولىسكەن.

بۇل تۋرالى Infohub.kz اقپارات اگەنتتىگى حابارلايدى.

ۇلى مەن باۋىرىنا الاڭداۋ

جازبادا قازاقتىڭ بۇلب ۇلى اتانعان ءمادينا ەرالييەۆا جالعىز ۇلى مەن سىڭلىسىنە دەگەن قامقورلىعىن جاسىرماي جازعان. ۇلى ارسەننىڭ اكەسى، بەلگىلى تەاتر رەجيسسەرى بولات اتابايەۆ ەكەۋىنىڭ اراسىنداعى الشاقتىق پەن ودان كەيىنگى ءومىرى تۋرالى دا ەستەلىكتەر قامتىلعان.

«كوبىنەسە، كونسەرتتىك ساپاردا ءجۇردىم. سول كەزدە كوپ ۋايىمداۋشى ەدىم «مەنىڭ بالامدى باعام دەپ ءسىڭلىم جالعىز قالسا، وبالىنا قالامىن-اۋ» دەپ... قۇدايعا شۇكىر، ءقازىر وتباسىلى»، - دەپ جازدى ءانشى.

ءبىلىم مەن تاربيەگە باسىمدىق

ءانشى ۇلىنىڭ شەتەلدە ەمەس، قازاقستاندا ءبىلىم الۋىن قالاعانىن ايتادى. ونىڭ ۇستىنە، ارسەن گرانت نەگىزىندە ۋنيۆەرسيتەتتە وقۋعا تۇسكەن. ءمادينا ەرالييەۆا بۇل شەشىمىن اقشاعا ەمەس، ءوز بىلىمىنە سەنۋگە تاربيەلەۋ نيەتىمەن تۇسىندىرەدى.

«بالاسىن شەتەلگە وقىتۋدى ماقتان تۇتاتىندار كوپ، مەنىڭ دە سونداي مۇمكىندىگىم بولدى. ءبىراق، قورىقتىم. بىرىنشىدەن، ول جاقتىڭ تۇرمىس-تىرشىلىگى، دۇنيەتانىمى باسقا. بالام جاتباۋىر بولىپ كەتۋى مۇمكىن. ەكىنشىدەن، ءبىزدىڭ وزىمىزدە دە مىقتى ءبىلىم الىپ شىعۋعا بولادى»، - دەپ جازعان ول.

ومىردەگى قيىندىقتار مەن جالعان اڭىزدار

ءمادينا ەرالييەۆا ءوزىنىڭ ومىرىندەگى كەيبىر جالعان اڭىزدارعا دا توقتالعان. مىسالى، مۇستافا وزتۇرىك سىيلاعان «مەرسەدەس» كولىگى تۋرالى سوزدەردى جوققا شىعارعان. ول مۇستافا وزتۇرىكپەن جاقسى سىيلاس بولعانىمەن، ەشقانداي ءىرى سىيلىق الماعانىن اتاپ ءوتتى.

ءانشى سوڭعى كەزدەرى ءوزى مەن ۇلىنىڭ دەنساۋلىعىنا الاڭداپ جۇرگەنىن دە جاسىرماعان. «سىرت كوزدىڭ سۇعى جامان دەۋشى ەدى... ءوزىمدى قويشى، ۇلىمنىڭ دەنساۋلىعىنا قاتتى الاڭدايمىن!»، - دەپ جازدى ول.

«التىن تورعا قامالعان قۇستايمىن»

كەيدە ءومىردىڭ قيىندىقتارىنان شارشاپ، جالعىزدىقتى سەزىنگەنىن دە جاسىرمايدى. مۇنداي ساتتەردە تابيعات اياسىنا كەتىپ، ءان سالىپ، كوڭىلىن سەرگىتىپ قايتاتىنىن ايتادى.

«مەن ءوزىمدى التىن تورعا قامالعان قۇستاي سەزىنەتىن ساتتەرىم دە بار. سونداي ساتتە ماشيناعا وتىرىپ الىپ تاۋعا، تابيعات اياسىنا كەتەمىن. تاۋ ءىشىن كۇڭىرەنتىپ ءان سالامىن ايقايلاپ. الاسۇرعان كوڭىلىم ءوز ارناسىنا قايتا تۇسكەندەي بولادى»، - دەپ جازعان مارقۇم ءانشى.

جەلى قولدانۋشىلارى بۇل جازبادان كەيىن ءانشىنىڭ تەرەڭ سەزىمدەرىنە ءتانتى بولىپ، وعان العىستارىن بىلدىرگەن.

ەسكە سالا كەتەيىك، تانىمال ءانشى ءمادينا ەرالييەۆا 2000 جىلدىڭ 27 قاراشاسىندا جول اپاتىنان قايتىس بولعان ەدى.