InfoHub Logo

مەملەكەت جانە قوعام قايراتكەرى التىنبەك سارسەنباي ۇلىنىڭ ولىمىنە كىم تاپسىرىس بەرگەنى تۋرالى ماسەلە ءالى كۇنگە دەيىن قوعامدا قىزۋ تالقىلانىپ كەلەدى. دەگەنمەن، بۇل قىلمىسقا بۇرىنعى پرەزيدەنت نۇرسۇلتان نازاربايەۆتىڭ قاتىسى بار دەگەن بولجامدارعا ناقتى دالەل جوق ەكەنى ايتىلۋدا.

بۇل تۋرالى Infohub.kz اقپارات اگەنتتىگى حابارلايدى.

ساياساتتانۋشى، ءماجىلىس دەپۋتاتى ايدوس سارىم "Sadaq media" ارناسىنا بەرگەن سۇحباتىندا التىنبەك سارسەنباي ۇلىنىڭ ءولىمىن بۇرىنعى پرەزيدەنتكە تىكەلەي بايلانىستىرۋدىڭ نەگىزسىز ەكەنىن مالىمدەدى. ونىڭ ايتۋىنشا، مۇنداي ايىپتاۋلارعا ەشقانداي ناقتى دالەل كەلتىرىلمەگەن.

نازاربايەۆقا قاتىستى ايىپتاۋلار نەگىزسىز

«كەزىندە رىسبەك سارسەنبايەۆ اعامىز ەموسيامەن ءبىراز دۇنيەنى ايتىپ جىبەردى. ءالى دە ايتىپ ءجۇر. ءبىراق وعان دالەل جوق قوي. ول جەردە نازاربايەۆتىڭ قۇلاعى كورىنۋى مۇمكىن. ءبىراق ادىلەت دەگەن بولۋى ءتيىس قوي، جوبالاپ، ىمداپ بولسا دا دالەلدەي العان ادام جوق. مەن ءوز باسىم التىنبەكتىڭ ءولىمىن راحات الييەۆكە جاقىنداتام. التىنبەكپەن جىلداپ ارالاسقان، ءالى كۇنگە دەيىن سول ورتادا جۇرگەن ءبىراز ازاماتپەن ارالاسام. ءبىراق ولاردىڭ ەشقايسىسى دا تىكەلەي نازاربايەۆتان كورىپ جاتقان جوق. بۇل رىسبەكتىڭ ءوزىنىڭ ۇستانىمى، ءوزىنىڭ جەكە پىكىرى. كەزىندە التىنبەكتىڭ جانىندا جۇرگەن، قاعازىن جازىپ بەرىپ جۇرگەن رىسبەك ەمەس، مەن بولاتىنمىن. مەن ونى جاقسى بىلەمىن»، – دەيدى ايدوس سارىم.

كەكشىلدىكتەن ارىلعان تۇلعا

دەپۋتات سونىمەن قاتار، التىنبەك سارسەنباي ۇلىنىڭ مىنەزى تۋرالى دا ايتىپ ءوتتى. ونىڭ ايتۋىنشا، ساياساتكەر العاشقىدا وتە كەكشىل بولعانىمەن، ۋاقىت وتە كەلە بۇل قاسيەتىنەن ارىلعان.

«التىنبەك وتە كەكشىل ادام بولدى. كوپ ادامدى جەك كوردى. سولاردىڭ ءبىرى – سەرىك ءابدراحمانوۆ ەدى. ەكىنشى ءبىر ادام بولدى. ول – بالتاش تۇرسىنبايەۆ بولاتىن. ءبىراق ۋاقىت وتە كەلە وزگەردى، سانالى عۇمىرىندا ءوزىنىڭ جەك كورەتىن ادامدارمەن تاتۋلاسىپ، سولاردىڭ دەڭگەيىنە ءتۇسىپ، سويلەسكەنىن كوردىم»، – دەيدى دەپۋتات.