اپاسىنىڭ بالالارى
انام قوڭىرباي قىزى كۇلجاميلانىڭ رۋحىنا ارنايمىن.
- قۇلىندارىم، - دەيدى اپاسى سۋرەتتەرگە قاراپ وتىرىپ. - ءسابيتىم مەن كەڭەسىم عوي. تۇڭعىشتارىم. وسى ەكى قۇلىنىما كوز ءتيدى. ەل سۇقتانىپ قاراي بەرۋشى ەدى. اسىرەسە، سابيتكە. ەستيار ادامشا ويلانىپ تۇرۋشى ەدى. ءتىلى شىعىپ تاقىلداپ تۇرعان بالا عوي. "ءاي، مىنا بالدارىڭ ءتۇبى
ءبىر جەردەن شىعاتىن بالا، مىنا بالا بولايىن دەپ تۇرعان بالا عوي" دەپ قويماۋشى ەدى. ەكەۋى دە قالپاقتاي ۇشتى عوي، قۇلىندارىم. ءبىرىنىڭ ارتىنان ءبىرى كەتە باردى اپاسىن تاستاپ...
اكەڭنىڭ ۇلكەن ءىنىسى ءمۇعالىم عوي. ول بالا ءوزى ساۋاتتى پەداگوگ بولدى. ساباعىنا بايلانىستى جازعان دۇنيەلەرىن ۇلكەن جۋرنالدارعا ۇسىنىپ وتىراتىن. كەيىن مەكتەپكە دە باسشىلىق جاسادى. اۋداننىڭ ءبىلىم بولىمىندە دە جاۋاپتى قىزمەت اتقاردى. قازالى اۋدانىنىڭ مادەنيەت ءبولىمىن دە باسقاردى. ول كەزدە ءمۇعالىم عوي. ءسابيت سونى ەرەكشە جاقسى كورەتىن. "تاتە" دەپ ۇيرەتكەن ەدىك. سول تاتەسىن قاتتى جاقسى كورەدى.
اكەڭ قىزمەتىنە كەتەدى عوي. كەيدە قالادان قىزمەتكەر جىگىتتەر كەلەدى. سولاردى ۇيگە ەرتىپ كەلەتىنى بار. اپى كىرىپ، كۇپى شىعىپ جاتاسىڭ عوي، ءۇي بولعان سوڭ. كەڭەس تە ءبىرجاعىنان قولبايلاۋ. سوندا ءسابيتتىڭ قاي جاعىنان شىعىپ كەتەتىندىگىن بىلمەيسىڭ، زىپ بەرىپ مەكتەپكە تاتەسىن ىزدەپ كەتىپ قالادى ەكەن. سابيتتە قۇلدىراڭداپ مەكتەپكە جەتە بەرگەندە، مۇعالىمدەر كەڭسەسىنىڭ تەرەزەسىنەن كورىپ وتىرعان بار ءمۇعالىم قىز سىرتقا اتىپ شىعاتىن كورىنەدى.
- ءسابيت! ءسابيت! تاتەڭە كەلدىڭ بە؟ - دەيدى قىزدار.
- ءيا، - دەيدى بالا باسىن يزەپ.
- ءجۇر، تاتەڭە الىپ بارامىز.
ول قىزداردىڭ ارانداتقالى تۇرعانىن بالا قايدان ءبىلسىن؟ اپارادى دا، انا بالانىڭ ساباق بەرىپ جاتقان كلاسىنا كىرگىزىپ جىبەرىپ، وزدەرى
سىقىلىقتاي كۇلىپ، دۇركىرەي قاشاتىن كورىنەدى. انا ءمۇعالىم بالامەن ويىندارى كەلىپ ءجۇر عوي. ءسابيتتىڭ قاپەرىندە ەشتەڭە جوق، تاتەسىن كورگەنىنە قۋانىپ، كلاسقا ارسالاڭداي كىرىپ بارادى. وقۋشىلار دۋ ەتىپ كۇلەتىن كورىنەدى. كۇلمەي ءقايتسىن ەندى، اعايدىڭ كىپ-كىشكەنتاي ءىنىسى كلاسقا كىرىپ كەلىپ تۇرعاسىن. "ءوي، بار بول، بار بولعىر. انا شەشەسى قايدا قاراپ وتىرعانى، بالاعا قاراماي؟" سودان انا بالا ماعان رەنجيدى عوي.
ول كەزدىڭ وقۋشىلارى ەرەسەك، ەستيار بولدى. سوسىن اعايدىڭ اۋزىنان شىققان ءسوزدى قاعىپ الىپ وتىراتىن. ءبىلىمنىڭ ءقادىرى بار كەز عوي. بىلىمدە ءقادىر بولعاندا عانا، مۇعالىمدە ءقادىر بولادى. بىلىمنەن ءقادىر كەتسە، مۇعالىمنەن دە ءقادىر كەتەدى. ءبىلىمنىڭ وزىنەن ءقادىر كەتپەيدى عوي، ءبىلىمنىڭ وزىنەن نەگە ءقادىر كەتسىن؟! كەتىرىپ تۇراتىن پەندەنىڭ ساناسى عوي. ءبىلىم دەگەن ادامعا شىڭىراۋدىڭ تۇبىندەگى سۋداي بولىپ تۇرۋى كەرەك.
سودان الگى ءسابيتتى جوعارى كلاستىڭ ءبىر وقۋشى قىزى كوتەرىپ اكەپ تاستاپ تۇرادى: "اپا، ءسابيت مەكتەپكە اعايدى ىزدەپ كەتىپ قالىپتى". انا بالا تۇستە تاماعىن ىشۋگە كەلگەندە سوسىن ماعان ۇرىسادى عوي: "بالاعا قاراماي، قايدا قاراپ وتىرعانىڭ، بۇل؟ مىنا بالا مەنى مەكتەپكە ىزدەپ
كەتىپ قالىپتى. ءبىزدىڭ قىزداردىڭ دا ويىندارى كەلەدى دە جۇرەدى، وسىنى اپارىپ كلاسقا كىرگىزىپ جىبەرىپ..."
- قۇلىندارىم! - دەيدى اپاسى سۋرەتتەردىڭ بەتىن الاقانىمەن سيپاپ.
- ەرتەڭ انا دۇنيەگە بارعاندا، الدىمنان شىعادى عوي قوس قۇلىنىم. بۇلار ومىردەن پەرىشتە كەتتى عوي.
قوس سۋرەتتىڭ بىرىنەن وزىنە شاپ-شاق تەڭىزشى فورماسىن كيگەن سۇيكىمدى ءسابي كوزى كۇلىمدەپ قاراپ تۇرادى. ال ءدال وسىنداي ەكىنشى سۋرەتتەن كەكىلى جالبىراپ، ساۋساعىن تىستەلەگەن كىشكەنە ءسابي مونتانى كەيىپتە قاراپ وتىرار ەدى. بۇلار - مۇنىڭ اعالارى، اپاسىنىڭ تۇڭعىشتارى. ولاردىڭ
تۋۋى تۋرالى كۋالىكتەرى دە ساقتالىپ قالعان.
اپاسى 1998 جىلدىڭ 13 قاڭتارىندا 70 جاسىندا ومىردەن وزدى.
You Might Also Like
-
بۇگىن ورتالىق كوممۋنيكاسيالار قىزمەتىندە وتكەن بريفينگتە قوستاناي وبلىسىنىڭ اكىمى ارحيمەد مۇحامبەتوۆ وبلىس بيلىگى مەكتەپتەردى جوندەۋ ءۇشىن قىرۋار اقشا بولمەيتىنىن ءمالىم ەتتى.
