InfoHub Logo

1959 جىلى اقمولا قالاسىندا (بۇگىنگى استانا) جاستار فەستيۆالى كەزىندە بولعان تراگەديالىق وقيعانىڭ ءمان-جايى 70 جىلدان كەيىن تولىق انىقتالدى. سول كەزدەگى اعاش كوپىردىڭ وپىرىلۋى سالدارىنان العاشقىدا جۇزدەگەن ادام قازا تاپتى دەگەن قاۋەسەت تاراعانىمەن، ناقتى دەرەكتەر بويىنشا التى ادام كوز جۇمعان.

بۇل تۋرالى Infohub.kz اقپارات اگەنتتىگى حابارلايدى.

اپاتتىڭ سەبەبى مەن سالدارى

وقيعا 1959 جىلى 14 ماۋسىمدا وبلىستىق جاستار فەستيۆالى ءوتىپ جاتقان كەزدە بولدى. ەسىل (سول كەزدەگى يشيم) وزەنى ارقىلى وتەتىن تار اعاش كوپىرگە ادامدار تىم كوپ جينالعاندىقتان، كوپىردىڭ قورشاۋلارى سىنىپ، ونداعان ادام سۋعا قۇلاعان. كۋاگەرلەردىڭ ايتۋىنشا، سول ساتتە دۇربەلەڭ مەن ايقاي-شۋ بولىپ، ادامدار ءبىر-بىرىن قۇتقارۋعا تىرىسقان.

اپات تۋرالى اقپارات سول كەزدە جاريالانباعان، كەڭەس بيلىگى ونى قۇپيا ۇستاعان. بۇل جاعداي جۇزدەگەن ادام قازا تاپتى دەگەن سياقتى قاۋەسەتتەردىڭ تاراۋىنا سەبەپ بولعان.

انىقتالعان جاڭا دەرەكتەر

تراگەديانىڭ ناقتى كۇنى مەن قازا تاپقاندار سانىن انىقتاۋعا كومەكتەسكەن نەگىزگى دەرەك كوزدەرى – اپات كەزىندە زارداپ شەككەن مۋرشيدا مۋستايەۆانىڭ وتباسىلىق جازبالارى مەن رەسەي ارحيۆتەرىنەن تابىلعان قۇجاتتار بولدى. مۋرشيدا مۋستايەۆا اپات كەزىندە توعىز ايلىق جۇكتى بولعان جانە سول تۇندە ۇل بوسانعان. ۇلى انۆاردىڭ تۋعان كۇنى 1959 جىلعى 15 ماۋسىم ەكەنى، دەمەك اپات 14 ماۋسىمدا بولعانى ناقتىلاندى.

رەسەي مەملەكەتتىك جاڭا تاريح ارحيۆىنەن تابىلعان قۇجاتتارعا سايكەس، اپات سالدارىنان التى ادام قازا تاپقان: ەكى ەرەسەك جانە ءتورت بالا. تاعى ون ادام اۋرۋحاناعا جاتقىزىلعان. تەرگەۋ بارىسىندا ادامدار اعىنىن رەتتەۋ شارالارىنىڭ بولماعانى انىقتالىپ، قالالىق قىزمەتتەر مەن تەمىرجول باسشىلارى جاۋاپقا تارتىلعان.

اپاتتىڭ سالدارىنان سالىنعان كوپىر

بۇل تراگەديادان كەيىن استانادا ءالى كۇنگە دەيىن قولدانىلىپ جۇرگەن بەتوندى جاياۋ جۇرگىنشىلەر كوپىرىنىڭ قۇرىلىسى باستالدى. بۇرىنعى اعاش كوپىر جىل سايىن كوكتەمدە ەرىگەن قار سۋىمەن بۇزىلىپ، قايتا سالىنىپ وتىرعان. 1959 جىلعى وقيعادان كەيىن عانا قالا بيلىگى تۇراقتى كوپىر سالۋ قاجەتتىلىگىن تۇسىنگەن. جاڭا بەتون كوپىر 1963 جىلى پايدالانۋعا بەرىلدى.