InfoHub Logo

امەريكالىق Colossal Biosciences بيوتەحنولوگيالىق كومپانياسى جاڭا زەلانديادا جويىلىپ كەتكەن الىپ موا قۇسىن «قايتا ءتىرىلتۋ» جوباسىندا جاڭا قادام جاساعانىن حابارلادى. عالىمدار زەرتحانادا جاسالعان جاساندى جۇمىرتقالار ارقىلى 26 بالاپاندى ءساتتى شىعارىپ العانىن ايتتى.

بۇل تۋرالى Infohub.kz اقپارات اگەنتتىگى حابارلايدى.

موا قۇستارى جەر بەتىندە ءومىر سۇرگەن ەڭ ءىرى قۇستاردىڭ ءبىرى سانالادى. ولاردىڭ بيىكتىگى ءۇش جارىم مەتردەن اسقان، ال جۇمىرتقالارى قازىرگى ەڭ جاقىن تۋىسى بولىپ سانالاتىن ەمۋ قۇسىنىڭ جۇمىرتقاسىنان سەگىز ەسە ۇلكەن بولعان. سوندىقتان مۇنداي اۋقىمدى جوبا ءۇشىن ءتىرى قۇستاردى انالىق رەتىندە پايدالانۋ مۇمكىن ەمەس.

جاساندى جۇمىرتقانىڭ قۇرىلىمى

Colossal Biosciences كومپانياسى سينتەتيكالىق قابىقتى ازىرلەۋدە تاجىريبە جيناعانىن مالىمدەدى. بۇل – جاڭا زەلانديانىڭ الىپ مواسى مەن ماۆريكييدەگى درونت سياقتى جويىلىپ كەتكەن تۇرلەردى قايتا ءتىرىلتۋ جولىنداعى ماڭىزدى قادام دەپ سانايدى.

19 مامىردا كومپانيا «Colossal جاساندى جۇمىرتقا جۇيەسىن» قولدانىپ، 26 ساۋ بالاپاننىڭ دۇنيەگە كەلگەنىن جاريالادى.

كومپانيا ازىرلەگەن تەحنولوگيا – بۇل سيليكون مەمبراناسى بار جاساندى قابىق. ول ناعىز جۇمىرتقا قابىعىنىڭ قىزمەتىن اتقارادى: وتتەگى مەن ىلعال الماسۋىن قامتاماسىز ەتەدى، تەمپەراتۋرانى جانە ۇرىقتىڭ دامۋىن قولدايدى.

كومپانيانىڭ بۇرىنعى جەتىستىكتەرى

كومپانيا بۇل تەحنولوگيانى ماسشتابتاۋعا بولاتىنىن، ءسويتىپ، اقىرىندا ۇلكەن جۇمىرتقالاردان جويىلىپ كەتكەن تۇرلەردى شىعارۋعا بولاتىنىن ايتادى. ينۆەستيسيا رەتىندە 600 ميلليون دوللاردان استام قارجى جيناپ، 10 ميلليارد دوللاردان استام باعالاناتىن Colossal كومپانياسى بۇعان دەيىن دە جاڭالىقتاردا ءجيى كورىنگەن.

وتكەن جىلى كومپانيا گەنەتيكالىق تۇرلەندىرۋ ارقىلى جويىلىپ كەتكەن قاسقىرلارعا ۇقساس ءۇش اقشىل ءيتتىڭ تۋىلعانىن حابارلاعان ەدى.

الايدا، بۇل ەسەپ جاريالانعان كەزدە، باسقا عالىمدار تالداي الاتىن رەسەنزيالانعان عىلىمي ماقالا نەمەسە كوپشىلىككە قولجەتىمدى دەرەكتەر بولماعان.