InfoHub Logo

اقش پرەزيدەنتى دونالد ترامپ يراننىڭ ەنەرگەتيكالىق نىساندارىنا جوسپارلانعان سوققىلاردى بەس كۇنگە شەگەرۋ تۋرالى شەشىم قابىلدادى. بۇل قادام تەگەرانمەن كەلىسسوزدەر جۇرگىزۋ ماقساتىندا جاسالعان.

بۇل تۋرالى Infohub.kz اقپارات اگەنتتىگى حابارلايدى.

ترامپ ءوزىنىڭ Truth Social جەلىسىندەگى پاراقشاسىندا بۇل جاڭالىقتى جاريالاپ، سوڭعى ەكى كۇندە اقش پەن يران اراسىندا "وتە جاقسى جانە ناتيجەلى" كەلىسسوزدەر وتكەنىن ايتتى. ونىڭ سوزىنشە، تاراپتار تاياۋ شىعىستاعى اسكەري شيەلەنىستى تولىق ءارى جان-جاقتى رەتتەۋ ماسەلەسىن تالقىلاعان.

كەلىسسوزدەر جالعاسادى

"وسى كەلىسسوزدەردىڭ مازمۇنى مەن باعىتىنا بايلانىستى، ولار الداعى اپتادا جالعاساتىن بولعاندىقتان، قورعانىس مينيسترلىگىنە يراننىڭ ەلەكتر ستانسيالارى مەن ەنەرگەتيكالىق ينفراقۇرىلىمىنا سوققى جاساۋدى بەس كۇنگە كەيىنگە قالدىرۋدى تاپسىردىم"، – دەپ جازدى ترامپ.

بۇل مالىمدەمەدەن كەيىن حالىقارالىق نارىقتا مۇناي باعاسى كۇرت تومەندەدى. Brent ماركالى مۇناي شامامەن 13 پايىزعا ارزانداپ، باررەلىنە 96 دوللارعا دەيىن ءتۇستى. ال FTSE 100 يندەكسى بۇعان دەيىن تومەندەگەنىنە قاراماستان، 0،5 پايىزعا ءوسىم كورسەتتى.

بۇعان دەيىنگى جاعداي

ەسكە سالا كەتەيىك، بۇعان دەيىن ترامپ يرانعا ورمۋز بۇعازىن 48 ساعات ىشىندە اشۋدى تالاپ ەتىپ، ورىندالماعان جاعدايدا سوققى جاسايتىنىن ەسكەرتكەن بولاتىن. ءوز كەزەگىندە يراننىڭ يسلام ريەۆوليۋسياسى ساقشىلارى كورپۋسى بۇعازدى تولىق جابۋى مۇمكىن ەكەنىن ايتىپ، ەنەرگەتيكالىق نىساندارى قالپىنا كەلتىرىلگەنگە دەيىن بۇل شارانى جالعاستىراتىنىن مالىمدەگەن.

يران بيلىگى بۇعازدىڭ رەسمي تۇردە اشىق ەكەنىن، الايدا "دۇشپان ەلدەرمەن بايلانىستى" كەمەلەرگە شەكتەۋ قويىلۋى مۇمكىن ەكەنىن ايتتى. AFP اگەنتتىگىنىڭ مالىمەتىنشە، Kpler اناليتيكالىق كومپانياسىنىڭ دەرەكتەرىنە سايكەس، سوڭعى ءۇش اپتادا ورمۋز بۇعازى ارقىلى وتكەن كەمەلەر سانى سوعىسقا دەيىنگى دەڭگەيدىڭ نەبارى 5 پايىزىنا جەتكەن.