InfoHub Logo

اقش مەملەكەتتىك حاتشىسى ماركو رۋبيو ۋكراينا پرەزيدەنتى ۆلاديمير زەلەنسكييدىڭ قاۋىپسىزدىك كەپىلدىكتەرى تۋرالى مالىمدەمەسىن جوققا شىعاردى. ونىڭ ايتۋىنشا، اقش كييەۆكە قاۋىپسىزدىك كەپىلدىكتەرىن بەرۋدى ۋكراينانىڭ دونباسستان اسكەرىن شىعارۋىمەن بايلانىستىرماعان.

بۇل تۋرالى Infohub.kz اقپارات اگەنتتىگى حابارلايدى.

ساياساتكەر بۇل مالىمدەمەسىن 27 ناۋرىزدا فرانسيادا وتكەن G7 ەلدەرى سىرتقى ىستەر مينيسترلەرى كەزدەسۋىنەن كەيىن جۋرناليستەردىڭ سۇراقتارىنا جاۋاپ بەرگەندە ايتتى. رۋبيو زەلەنسكييدىڭ «ەگەر تەك اۋماعىن بەرسە، قاۋىپسىزدىك كەپىلدىكتەرىنە يە بولادى» دەگەن سوزدەرىن «وتىرىك» دەپ اتادى.

اقش پوزيسياسى

«بۇل وتىرىك. مەن ونىڭ (زەلەنسكييدىڭ) مۇنى ايتقانىن كوردىم. ونىڭ مۇنى ايتقانى وكىنىشتى، سەبەبى ول شىندىق ەمەس ەكەنىن بىلەدى. وعان بۇلاي ايتىلماعان. وعان ايتىلعانى انىق: قاۋىپسىزدىك كەپىلدىكتەرى سوعىس بىتكەنشە كۇشىنە ەنبەيدى. ءبىراق بۇل «ەگەر ول اۋماعىن بەرمەسە» دەگەن شارتپەن بايلانىستىرىلماعان. نەلىكتەن ول مۇنداي نارسەلەردى ايتاتىنىن بىلمەيمىن. بۇل جاي عانا شىندىق ەمەس»، - دەدى رۋبيو.

مەملەكەتتىك حاتشى اقش ۋكرايناعا رەسەيدىڭ تالاپتارىن جەتكىزگەنىن، ءبىراق كييەۆتىڭ اۋماقتىق ۇسىنىستار جاساۋىنا ەشقاشان ۇندەمەگەنىن اتاپ ءوتتى.

رەسەيدىڭ تالاپتارى

رەسەي پرەزيدەنتى ۆلاديمير پۋتين 2025 جىلدىڭ كۇزىنەن باستاپ ۋكرايناداعى سوعىستى توقتاتۋدىڭ شارتى رەتىندە ۋكراينا قارۋلى كۇشتەرىنىڭ دونباسس اۋماعىنان شىعارىلۋىن بىرنەشە رەت اتاپ وتكەن بولاتىن. رەسەي باسشىسىنىڭ ايتۋىنشا، قازىرگى ۋاقىتتا بۇل ايماقتىڭ 15-17 پايىزى كييەۆتىڭ باقىلاۋىندا قالىپ وتىر.

وسىعان بايلانىستى زەلەنسكيي ناۋرىز ايىنىڭ سوڭىندا اقش ۋكرايناعا ۋادە ەتىلگەن قاۋىپسىزدىك كەپىلدىكتەرىن بەرۋدى دونەسك وبلىسىن رەسەيگە بەرۋ تالابىنا بايلانىستىراتىنىن مالىمدەگەن.