InfoHub Logo

اقش-تا قۇپيا عىلىمي جوبالارمەن اينالىسقان ءبىرقاتار عالىمنىڭ جوعالىپ كەتۋى نەمەسە بەلگىسىز جاعدايدا قايتىس بولۋى الاڭداۋشىلىق تۋدىرۋدا. بۇل جاعدايلار ۇلتتىق قاۋىپسىزدىككە قاتەر ءتوندىرۋى مۇمكىن دەگەندىك بار.

بۇل تۋرالى Infohub.kz اقپارات اگەنتتىگى حابارلايدى.

كونگرەسسمەندەر الاڭداۋلى

اقش كونگرەسىنىڭ مۇشەلەرى دجەيمس كەمەر مەن ەريك بەرلينسون ەنەرگەتيكا مينيسترلىگىنەن، پەنتاگوننان، فبر جانە NASA-دان وسىعان قاتىستى مالىمەتتەردى سۇرادى. ولاردىڭ ايتۋىنشا، قۇپيا اقپاراتقا قول جەتكىزە الاتىن عالىمداردىڭ جوعالۋى نەمەسە قايتىس بولۋى – ۇلتتىق قاۋىپسىزدىككە ەلەۋلى ءقاۋىپ.

زاڭ شىعارۋشىلار مۇنداي قىزمەتكەرلەردى قورعاۋ جۇيەسىنىڭ قالاي جۇمىس ىستەيتىنىن ناقتىلاۋدى تالاپ ەتتى.

11 عالىمنىڭ تاعدىرى

بۇقارالىق اقپارات قۇرالدارىنىڭ حابارلاۋىنشا، 2022 جىلدان بەرى اقش-تا كەم دەگەندە 11 ادام وسىنداي جاعدايعا تاپ بولعان. ولاردىڭ كوبى يادرولىق فيزيكا جانە عارىش سالالارىندا زەرتتەۋ جۇرگىزگەن، ال كەيبىرى بەيمالىم ۇشاتىن نىسانداردى (بۇۇ) زەرتتەۋمەن اينالىسقان.

سوڭعى وقيعالار

Fox News تەلەارناسىنىڭ مالىمەتىنشە، سوڭعى رەت وسىنداي جاعدايعا تاپ بولعان اقش اۋە كۇشتەرىنىڭ بۇرىنعى گەنەرال-مايورى ۋيليام نيل ماككاسلاند 27 اقپاندا نيۋ-مەكسيكو شتاتىندا جوعالىپ كەتكەن. ونىڭ ۇيىندە تەلەفون، كوزىلدىرىگى قالعان، ءبىراق ريۋكزاك، ءاميانى مەن ريەۆولۆەرى تابىلماعان.

سونىمەن قاتار، NASA قىزمەتكەرى مايكل حيكستىڭ 2023 جىلعى 30 شىلدەدەگى ءولىمىنىڭ سەبەبى ءالى كۇنگە دەيىن رەسمي تۇردە اشىلماعان. ول كومەتالار مەن استەرويدتەردى زەرتتەۋمەن اينالىسقان.

ۇلتتىق زەرتحانانىڭ تاعى ءبىر قىزمەتكەرى، يادرولىق قارۋ سالاسىنداعى مامانى ميليسسا كاسياس 2023 جىلعى 26 ماۋسىمدا جوعالىپ كەتكەن.

اقش پرەزيدەنتى دونالد ترامپ بۇل جاعدايلاردىڭ ءمان-جايىن انىقتاۋعا ۋادە بەردى.