InfoHub Logo

اقتاۋ قالاسىندا 24 جاستاعى مارجان ەسىمدى ستۋدەنت قىز پاتەرىندە اسىلعان كۇيدە تابىلدى. پوليسيا بۇل جاعدايدى سۋيسيد دەپ تىركەپ، ءىستى جاۋىپ تاستادى. الايدا، مارقۇمنىڭ اتا-اناسى بۇل شەشىممەن كەلىسپەي، قىزدارىنىڭ ولىمىنە كۇيەۋىن كىنالى دەپ سانايدى.

بۇل تۋرالى Infohub.kz اقپارات اگەنتتىگى حابارلايدى.

ستۋدەنتتىڭ ارمانى مەن وتباسىلىق جاعدايى

Lada.kz سايتىنىڭ مالىمەتىنشە، مارجان مەديسينالىق كوللەدجىندە وقىپ، ستوماتولوگ ماماندىعىن يگەرۋگە دايىندالىپ جۇرگەن. ونىڭ الداعى ومىرىنە قاتىستى كوپتەگەن جوسپارى بولعان: وقۋىن ءبىتىرىپ، جۇمىس ىستەۋ، ءبىلىمىن جەتىلدىرۋ كۋرستارىنا قاتىسۋ جانە جۇرگىزۋشى كۋالىگىن الۋ.

اناسىنىڭ ايتۋىنشا، قىزى وتكەن جىلى تۇرمىسقا شىققاننان كەيىن وتباسىندا ءجيى كيكىلجىڭدەر ورىن العان. كۇيەۋى ماتەريالدىق جاعىنان قولداۋ كورسەتپەسە، ەنەسى كەلىنىن اۋىلعا كوشىپ، ءۇي شارۋاسىمەن اينالىسۋعا ماجبۇرلەمەك بولعان. وسى جاعدايلارعا قاراماستان، مارجان وقۋىن جالعاستىرىپ، قوسىمشا جۇمىس ىستەپ جۇرگەن.

تەرگەۋدىڭ وبەكتيۆتىلىگىنە كۇمان

قايعىلى وقيعا الدىندا ەشقانداي الاڭداۋشىلىق تۋدىرارلىق جاعداي بولماعان. 31 جەلتوقساندا مارجان اناسىمەن كەزدەسىپ، بولاشاق جوسپارلارىمەن بولىسكەن. الايدا، كەلەسى كۇنى ونىڭ قايتىس بولعانى تۋرالى سۋىت حابار جەتكەن.

باستاپقىدا ءىس «ءوزىن-وزى ولتىرۋگە جەتكىزۋ» بابى بويىنشا قوزعالعانىمەن، كەيىننەن توقتاتىلدى. تۋىستارى تەرگەۋدىڭ تولىققاندى جانە وبەكتيۆتى جۇرگىزىلمەگەنىن العا تارتادى. ولاردىڭ پىكىرىنشە، مارقۇمنىڭ پسيحوەموسيونالدىق جاعدايى جان-جاقتى زەرتتەلمەگەن، كەيبىر تەرگەۋ ارەكەتتەرى كەشىكتىرىلىپ، بارلىق نۇسقالار تولىق تەكسەرىلمەگەن.

وتباسىنىڭ تالابى

مارجاننىڭ جاقىندارى ونىڭ ومىرگە دەگەن قۇشتارلىعى جوعارى، ماقساتتارى ايقىن ادام بولعانىن ايتىپ، ونىڭ سۋيسيد جاساۋى مۇمكىن ەمەس ەكەنىن اتاپ وتەدى. قازىرگى تاڭدا وتباسى ءىستى قايتا قاراۋدى جانە جان-جاقتى تەرگەۋ جۇرگىزۋدى تالاپ ەتۋدە.