InfoHub Logo

اقتوبە وبلىسىندا وتكەن جىلدىڭ قاراشا ايىندا قالا سىرتىنان ءولى كۇيىندە تابىلعان ەرلى-زايىپتىلاردىڭ ولىمىنە قاتىستى قىلمىستىق ءىس توقتاتىلدى. العاشقىدا بولجانعان نۇسقا راستالدى: ەر ادام ايەلىن ءولتىرىپ، كەيىن وزىنە قول سالعان.

بۇل وقيعا اقتوبە تۇرعىندارىن قاتتى دۇرلىكتىرگەن ەدى. 2025 جىلدىڭ 20 قاراشاسىندا تاڭەرتەڭ ەت ساتىپ الۋعا شىعىپ، كەيىن قالا سىرتىنان ءولى كۇيىندە تابىلعان جۇپتىڭ جاعدايى سوت وتىرىسىندا انىقتالدى.

سوت وتىرىسىنداعى ءمان-جاي

اقتوبە وبلىستىق سوتىنىڭ باسپا ءسوز قىزمەتىنىڭ حابارلاۋىنشا، 2025 جىلدىڭ 20 قاراشاسىندا ا. (ەر ادام) اقتوبە قالاسىنىڭ بوگوسلوۆسك تاس جولىندا كولىگىن باسقارىپ بارا جاتىپ، ايەلى ش. ەكەۋى ۇرىسىپ قالعان. وسىدان كەيىن ا. ايەلىن قاساقانا ءولتىرۋ ماقساتىندا كولىگىن توقتاتىپ، اس ءۇي پىشاعىن الىپ، ارتقى ورىندىققا وتىرعان. ول ايەلىنىڭ ارقاسىن اياعىمەن باسىپ تۇرىپ، موينىن بىرنەشە رەت پىشاقتاپ، اۋىر دەنە جاراقاتىن سالعان. وسىلايشا، ول قاساقانا كىسى ءولتىرۋ قىلمىسىن جاساعان. ودان كەيىن ا. جول بويىنان ارقان ساتىپ الىپ، كولىگىمەن وندىرىستىك سەح عيماراتىنا كىرىپ، جابدىققا شىعىپ، ءوزىنىڭ ارقانىمەن اسىلىپ قايتىس بولعان.

ەر ادامدى مۇنداي قادامعا نە يتەرمەكتەگەنى سوتتا ناقتىلانبادى. سوتتالۋشىنىڭ ادۆوكاتى سوتتالۋشىنىڭ قايتىس بولۋىنا بايلانىستى قىلمىستىق ءىستى توقتاتۋ تۋرالى ءوتىنىشحات بەردى. پروكۋرور بۇل شەشىمدى قولدادى.

سوت بۇل ءىستى توقتاتۋ تۋرالى قاۋلى شىعاردى.

ەستەرىڭىزگە سالا كەتەيىك، بۇعان دەيىن جۇپتىڭ بەس بالا تاربيەلەپ وتىرعانى حابارلانعان بولاتىن. تۋىستارىنىڭ ايتۋىنشا، ولار 20 قاراشا كۇنى تاڭەرتەڭ ەتكە شىعىپ، ۇيگە ورالماعان. سول كۇنى كەشكە جاقىندارى ولاردى الەۋمەتتىك جەلى ارقىلى ىزدەۋگە بەرگەن. كەيىن پوليسيا ەرلى-زايىپتىلاردىڭ ءمايىتىن قالا سىرتىنان تاپقان.