InfoHub Logo

اقتوبە قالاسىنىڭ ىرگەسىندەگى لەسنوي ەلدى مەكەنىندە تۇراتىن 100-دەن استام بالا 12 شاقىرىم قاشىقتىقتا ورنالاسقان مەكتەپكە تاكسيمەن قاتىناپ ءجۇر. جوعارى سىنىپ وقۋشىلارى قوعامدىق كولىكپەن، ال كولىگى بار اۋىل تۇرعىندارى كورشىلەرىنىڭ بالالارىنا ەكى اپتادان بەرى تاكسي قىزمەتىن كورسەتۋگە ءماجبۇر. سەبەبى، مەكتەپ اۆتوبۋسىنىڭ جۇرگىزۋشىسى جۇمىستان شىعىپ كەتكەن.

اقتوبە قالاسىنىڭ ىرگەسىندەگى لەسنوي اۋىلىنىڭ 118 بالاسى №39 جالپى ءبىلىم بەرەتىن ورتا مەكتەپتە وقيدى. اۋىل تۇرعىنى ەلەنا ليۋپچەنكو بۇگىن كۇن اياز بولعان سوڭ بالاسىن تاعى دا ساباقتان قالدىردى. سەبەبى، مەكتەپ اۆتوبۋسى 9 قاڭتاردان بەرى وقۋشىلاردى تاسىمالداۋدى توقتاتقان.

«وسىمەن ەكىنشى اپتا بولدى، مەكتەپ اۆتوبۋسى جۇرمەيدى. ولار «جۇرگىزۋشى قاڭتاردا جۇمىستان شىقتى» دەپ ايتتى. قازىرگى كۇنى كوبىنىڭ بالاسى مەكتەپكە بارمايدى، ساباق وقىمايدى. قوعامدىق كولىك سازدى اۋىلىنان كەلەردە تولىق بولىپ، بىزگە توقتاماي كەتەدى. ال جول بويىندا كولىك توقتاتقان وقۋشىلار 100 تەڭگە تولەپ قالاعا كەلەدى، كەيىن تاعى اۆتوبۋسقا وتىرادى. بالالارىمىزدىڭ قاۋىپسىزدىگىنە الاڭدايمىز. مۇندايدا كوپبالالى وتباسى بالالارىنا قيىن. مەن قالالىق ءبىلىم بولىمىنە دا بارىپ، ماسەلەنى اشىق ايتتىم. ولار «بىلمەيمىز» دەپ شىعارىپ سالدى»،- دەيدى ەلەنا ليۋپچەنكو.

شالعاي جەردە تۇراتىن بالالاردىڭ قاۋىپسىزدىگىن قامتاماسىز ەتۋ ءۇشىن قالالىق اكىمدىك مەكتەپكە اۆتوبۋس بەرىپ، ونى ءبىلىم ورداسىنىڭ بالانسىنا اۋدارىپ قويعان. اۆتوبۋس جۇرگىزۋشىسىن تابۋ، ونىڭ تەحنيكالىق اقاۋلارىن جوندەتۋ مەكتەپ ديرەكتورىنىڭ مىندەتىنە جۇكتەلدى. گاراجى جوق، قۇرال-سايمانى جەتكىلىكسىز اۆتوبۋستىڭ جايىن اقتوبە قالاسىنىڭ اكىمدىگى، ءبىلىم ءبولىمى، قالالىق جۇمىسپەن قامتۋ ورتالىعى، سازدى اۋىلدىق وكرۋگىنىڭ اكىمدىگى بىلەدى. مەكتەپ ديرەكتورى ينديرا اميتجانوۆا 25 جەلتوقسان كۇنى الەۋمەتتىك جەلىلەر مەن وبلىستىق گازەتكە حابارلاندىرۋ بەرىپ، جان-جاقتى قۇلاققاعىس ەتتى. ءبىراق، جۇمىس ىزدەگەندەردىڭ كوبى بالالار تاسىمالدايتىن اۆتوبۋستى جۇرگىزە المايدى ەكەن.

«مەكتەپ اۆتوبۋسى بىزگە 2009 جىلى بەرىلگەن. سودان بەرى مۇنداي قيىندىق كەزىككەن ەمەس. بۇرىنعى جۇرگىزۋشى ەكى جىل بۇرىن زەينەتكە شىعىپ، جۇمىسىن ءارى قاراي جالعاستىردى. دەنساۋلىعى سىر بەرگەن سوڭ ءوز ەركىمەن جۇمىستان كەتتى. الدىن-الا ايتىلعان كەزدە الەۋمەتتىك جەلىلەردىڭ بارلىعىنا جۇرگىزۋشى قاجەت دەگەن حابارلاندىرۋ بەرىلدى. ادامدار كەلەدى، ولاردىڭ كەيبىرى قوعامدىق كولىك جۇرگىزگەن، سول جەردە ەرەجە بۇزىپ، زاڭ بويىنشا قىزمەتىنەن شەتتەتىلگەن. ۋاقىتىندا جۇمىسقا كەلمەيتىن، اۆتوبۋستىڭ شاعىن اقاۋلارىن جوندەي المايتىن، ءتىپتى، ايازدى كۇنى قىزدىرىپ، كولىكتى جۇرگىزە المايتىندار قاجەت ەمەس بىزگە. سونىمەن قاتار، كوبى 40 مىڭ تەڭگە جالاقىسى بار جۇمىستان باس تارتادى»،- دەيدى مەكتەپ ديرەكتورى ينديرا اميتجانوۆا.

لەسنوي اۋىلىنىڭ 61 وقۋشىسى تاڭەرتەڭ، 57 بالا  تۇستەن كەيىن ءبىلىم الادى. جوعارى سىنىپ وقۋشىلارى قوعامدىق كولىكپەن قاتىناپ ءجۇر. ال باستاۋىش سىنىپ بالالارى تاكسيمەن، اۋىل تۇرعىندارىنىڭ قامقورلىعىمەن مەكتەپكە جەتىپ قالادى.

«كۇن سالقىن كەزدە كەيبىر بالالار ساباققا كەلمەي قالادى. ولارعا حابارلاسىپ، سەبەبىن ءبىلىپ وتىرامىز. ال كەشىگىپ كەلگەن وقۋشىلارعا كەشىرىممەن قارايمىز. جاۋاپكەرشىلىگى بار اتا-اتالار بالالارىن ساباقتان قالدىرمايدى. كوپ دەگەندە 2-3 بالا قالىپ قويىپ ءجۇر ساباقتان»،- دەيدى ينديرا اميتجانوۆا.

مەكتەپ ديرەكتورى بار جۇمىستى جيىپ قويىپ، مەكتەپ جۇرگىزۋشى ىزدەۋمەن اينالىسىپ جاتقانىن جەتكىزدى. ول بىرەر كۇندە اۆتوبۋس بالالار تاسىمالداۋدى ءارى قاراي جالعاستىراتىنىن ايتىپ سەندىردى.

التىناي ساعىندىقوۆا

قازاقپارات

---