InfoHub Logo

قازاقستاندا تاۋارلىق گازدىڭ كوتەرمە باعاسى 1 شىلدەدەن باستاپ 33% وسەتىنى تۋرالى حابارلاما ەلدەگى گاز باعاسىنىڭ وسۋىنە قاتىستى الاڭداۋشىلىقتى تۋدىردى. ءبىراق، مۇناي-گاز سالاسىنىڭ ساراپشىسى ولجاس ءبايدىلدينوۆ بۇل جاعدايدىڭ ءمان-جايىن ءتۇسىندىرىپ، الداعى ۋاقىتتا باعانىڭ ودان ءارى وسەتىنىن ايتتى.

بۇل تۋرالى Infohub.kz اقپارات اگەنتتىگى حابارلايدى.

ساراپشىنىڭ ايتۋىنشا، قازاقستانداعى گاز باعاسى كوپ جىلدار بويى شىعىندى بولعان. ەلىمىزدە وندىرىلەتىن گازدىڭ شامامەن 85%-ى قاراشىعاناق، تەڭىز جانە قاشاعان سياقتى ءىرى كەن ورىندارىنا تيەسىلى. بۇل كەن ورىندارىنان الىنعان تازارتىلعان گازدى «QazaqGaz» كومپانياسى شامامەن 50-55 دوللارعا ساتسا، ۇلتتىق وپەراتور ونى وزدەرىنىڭ ەنشىلەس كومپانياسى «QazaqGaz ايماق»-قا 20-22 دوللارعا بەرەدى ەكەن. بۇل حالىققا ارزان باعامەن گاز جەتكىزۋ ءۇشىن جاسالعان.

سالانىڭ جىلدىق شىعىنى

ولجاس ءبايدىلدينوۆتىڭ ەسەپتەۋىنشە، «الەۋمەتتىك» باعانى ۇستاپ تۇرۋ ءۇشىن ساتىلىمنان كورەتىن جىلدىق شىعىن 400-500 ميلليون دوللارعا جەتەدى. بۇعان دەيىن بۇل شىعىنداردى گاز ەكسپورتى مەن ءترانزيتى ارقىلى وتەۋگە بولاتىن ەدى. الايدا، ىشكى تۇتىنۋدىڭ وسۋىنە بايلانىستى ەكسپورت قىسقارىپ، قازاقستان رەسەيدەن جىلىنا شامامەن 5 ميلليارد تەكشە مەتر گاز يمپورتتاي باستادى.

باعانى كوتەرۋ قاجەتتىلىگى

ساراپشى 2023 جىلى-اق ۇلتتىق كومپانيالاردىڭ ءۇش جىل ىشىندە كوتەرمە باعانى ەكى ەسەگە ارتتىرۋ جوسپارىن بەكىتكەنىن اتاپ ءوتتى. ءبىراق، ءبايدىلدينوۆتىڭ پىكىرىنشە، بۇل دا سالانىڭ شىعىنىن جابۋعا جەتكىلىكسىز. ونىڭ ايتۋىنشا، باعانى بىردەن ءۇش ەسەگە كوتەرۋ قاجەت بولعان.

«ارزان ەنەرگيا تاسىمالداۋشىلار ءداۋىرى قازاقستاندا اياقتالدى»، - دەدى ساراپشى.

دەگەنمەن، كوتەرمە باعانىڭ ءوسۋى بولشەك ساۋدا باعاسىنىڭ بىردەن 33% ارتاتىنىن بىلدىرمەيدى. حالىق باعانىڭ ءوسىمىن قىسقى جىلىتۋ ماۋسىمىندا، ياعني قاراشا-جەلتوقسان ايلارىندا سەزىنەتىن بولادى.