InfoHub Logo

ەندى قازاقستاندا مەرزىمدى اسكەري قىزمەتكە باراتىن جاستار ءۇشىن قۋانىشتى جاڭالىق بار. قورعانىس مينيسترلىگى myarmy.kz پلاتفورماسى ارقىلى ونلاين ءوتىنىش قابىلداۋدى باستادى. بۇل جاستاردىڭ اسكەرگە بارۋ پروسەسىن ايتارلىقتاي جەڭىلدەتەدى.

بۇل جاڭاشىلدىق SARBAZ+ جوباسى اياسىندا جۇزەگە اسىرىلۋدا. ۇمىتكەرلەر سايتقا كىرىپ، قاجەتتى اقپاراتتارمەن تانىسىپ، ءوتىنىشتى ونلاين تولتىرا الادى. ودان كەيىن بارلىق كەزەڭدەر، ياعني قۇجاتتاردى تەكسەرۋ، مەديسينالىق كوميسسيادان ءوتۋ، سۇحبات جانە شەشىم قابىلداۋ پروسەستەرى اۆتوماتتاندىرىلعان تۇردە وتەدى.

مينيسترلىك وكىلدەرىنىڭ ايتۋىنشا، الدىمەن جىبەرىلگەن ءوتىنىم مۇقيات تەكسەرىلەدى. سودان سوڭ اسكەري كوميسسارياتقا مەديسينالىق تەكسەرۋگە شاقىرۋ كەلەدى. ودان كەيىن اسكەري ءبولىم ماماندارىمەن اڭگىمەلەسۋ ۇيىمداستىرىلادى. وسى كەزەڭدەردىڭ قورىتىندىسى بويىنشا ۇمىتكەردى قابىلداۋ نەمەسە باس تارتۋ تۋرالى ناقتى شەشىم شىعارىلادى. بارلىق راسىمدەر اشىق ءارى تۇسىنىكتى جاعدايدا وتەدى، ال قاجەتتى قۇجاتتاردىڭ ءتىزىمى سايتتا تولىق كورسەتىلگەن.

SARBAZ+ جوباسى اياسىندا ساربازدار تەك اسكەري دايىندىقپەن شەكتەلمەي، زاماناۋي داعدىلاردى دا مەڭگەرەدى. مىسالى، Rtel وقۋ سىنىپتارىندا راديوبايلانىس نەگىزدەرىن ۇيرەنىپ، Ashik Aspan باعدارلاماسى ارقىلى درونداردى باسقارۋدى يگەرەدى. سونداي-اق، Eltex تەحنولوگيالىق جۇيەلەرىمەن جۇمىس ىستەۋگە بەيىمدەلىپ، كيبەرقاۋىپسىزدىك پەن دەرەكتەردى قورعاۋدىڭ نەگىزدەرىن وقىپ، جاساندى ينتەللەكت ەلەمەنتتەرىمەن تانىسادى. سيفرلىق پلاتفورمالار ارقىلى اعىلشىن ءتىلىن دە جەتىلدىرۋگە مۇمكىندىك بار.

بۇل جوباعا قىزىعۋشىلىق جوعارى ەكەنى بايقالادى. قازىرگى تاڭدا 268 ءوتىنىم قابىلدانعان، ونىڭ 90-ى ىرىكتەلگەن. ورتا ەسەپپەن ءبىر ورىنعا ءۇش ۇمىتكەردەن كەلەدى.

بۇل تۋرالى Infohub.kz اقپارات اگەنتتىگى حابارلايدى.