InfoHub Logo

استانا قالالىق ءماسليحاتى 2030 جىلعا دەيىنگى تۇرعىن ۇيلەردى جاڭارتۋدىڭ جاڭا باعدارلاماسىن بەكىتتى. بۇل جوسپار بويىنشا ەسكى جانە اپاتتى جاعدايداعى ۇيلەردى ءسۇرىپ، تۇرعىنداردى باسقا جەرگە كوشىرىپ، ەسكى اۋدانداردى جاڭارتىپ، استانانىڭ ساۋلەتتىك كەلبەتىن وزگەرتۋ كوزدەلگەن.

بۇل تۋرالى Infohub.kz اقپارات اگەنتتىگى حابارلايدى.

قالانىڭ جاڭا كەلبەتى مەن ينفراقۇرىلىمدى جاڭارتۋ

باعدارلامانىڭ نەگىزگى ماقساتى – قالانىڭ ءبىر بولىگىن جاڭارتىپ، تۇرعىندار ءۇشىن جايلى ءارى ءقاۋىپسىز ءومىر ءسۇرۋ جاعدايىن جاساۋ. استانا حالقىنىڭ قارقىندى ءوسۋى مەن ينفراقۇرىلىمعا تۇسەتىن سالماقتىڭ ارتۋى بۇل قادامدى قاجەت ەتتى. ماسەلەن، 2016 جىلعى باس جوسپاردا 2030 جىلعا قاراي استانا حالقىنىڭ سانى 1،2 ميلليون بولادى دەپ بولجانسا، بۇل كورسەتكىشكە قالا 2021 جىلدىڭ سوڭىندا جەتكەن. ال 2025 جىلدىڭ باسىندا استانادا 1،5 ميلليونعا جۋىق ادام تۇردى. جاڭا باس جوسپار بويىنشا 2035 جىلعا قاراي استانالىقتار سانى 2،3 ميلليونعا جەتۋى ءتيىس.

وسىعان وراي، بيلىك جاڭا اۋداندار سالۋمەن قاتار، ەسكى اۋدانداردى دا بەلسەندى تۇردە قايتا قۇرۋدى قولعا الماق. قازىرگى تاڭدا قالادا 3 636 كوپپاتەرلى تۇرعىن ءۇي بار. اكىمدىك مالىمەتى بويىنشا، 200 ۇيگە كۇردەلى جوندەۋ قاجەت بولسا، 288 ءليفتتى اۋىستىرۋ كەرەك.

اپاتتى ۇيلەردەن كوشىرۋ جۇمىستارى

استانادا اپاتتى تۇرعىن ۇيلەردى جاڭارتۋ جوباسى 2013 جىلدان بەرى جۇمىس ىستەپ كەلەدى. وسى ۋاقىت ىشىندە 4 312 پاتەردى قۇرايتىن 282 اپاتتى ءۇيدىڭ تۇرعىندارى جاڭا باسپانالارعا كوشىرىلدى. ەندى بۇل باعدارلاما كەڭەيتىلىپ، جاڭا جوسپار بويىنشا تاعى 206 اپاتتى ۇيدەن 4 710 پاتەردە تۇراتىن تۇرعىندار كوشىرىلەدى.

سونىمەن قاتار، 2024-2025 جىلدارى جۇرگىزىلگەن تەحنيكالىق تەكسەرۋلەر ناتيجەسىندە تاعى 28 ءۇي اپاتتى دەپ تانىلدى. ال 36 ۇيگە قالپىنا كەلتىرۋ جۇمىستارىن جۇرگىزۋ ۇسىنىلدى.

رەنوۆاسيا كىمدەردى قامتيدى؟

جاڭارتۋ جۇمىستارى تەك ەسكى كوپقاباتتى ۇيلەرمەن شەكتەلمەيدى. كەشەندى قايتا قۇرۋ اياسىندا مىناداي نىساندار ءسۇرىلۋى مۇمكىن:

بۇعان قوسا، استانادا سۋمەن جابدىقتاۋ، جىلۋمەن جابدىقتاۋ، كارىز جانە گازداندىرۋ جۇيەلەرى سياقتى ينجەنەرلىك جەلىلەردى جاڭارتۋ جوسپارلانعان.

ساۋلەتتىك كەلبەتتى جاڭارتۋ

باعدارلامانىڭ ماڭىزدى بولىگى – استانانىڭ ءبىرىڭعاي ساۋلەتتىك ءستيلىن قالىپتاستىرۋ. ءقازىردىڭ وزىندە 183 ءۇيدىڭ قاسبەتىن جوندەۋ قاجەتتىگى انىقتالدى. كەيبىر نىساندار بويىنشا جوبالىق قۇجاتتاما ازىرلەنىپ، ال كەيبىرىندە جۇمىستار باستالىپ كەتتى. كەلەشەكتە رەنوۆاسيا ايماقتارىنداعى بارلىق جاڭا جوبالار استانانىڭ ارنايى ديزاين-كودىنا سايكەس كەلۋى ءتيىس.

جەكە ينۆەستورلاردىڭ ءرولى

باعدارلامانى جۇزەگە اسىرۋ ءۇشىن بيلىك جەكە قۇرىلىس كومپانيالارىن بەلسەندى تارتۋدى كوزدەپ وتىر. 2035 جىلعا دەيىنگى باس جوسپار بويىنشا، رەنوۆاسيانىڭ باسىمدىقتى ايماقتارى 2 582 گەكتاردى قۇرايدى. قازىرگى تاڭدا اۋماقتاردى يگەرۋگە 16 جەكە قۇرىلىس كومپانياسى قاتىسۋدا.

اپاتتى ۇيلەردىڭ تۇرعىندارىنا بۇرىنعىداي اۋدانى تەڭ نەمەسە كەمىندە ءبىر بولمەلى پاتەرلەر بەرىلەدى. كوممەرسيالىق نىساندار يەلەرىنە جاڭا عيماراتتاردان تەڭ اۋدان ۇسىنىلۋى نەمەسە مۇلىكتىڭ نارىقتىق قۇنى تولەنىپ بەرۋى مۇمكىن.