InfoHub Logo

استاناداعى جەڭىل رەلستى كولىك (LRT) جوباسىنىڭ اتاۋى وزگەرتىلدى. بۇل تۋرالى ءماسليحات وتىرىسىندا ءمالىم بولدى. دەپۋتاتتار بۇرىنعى انگلوفوندىق اتاۋدان باس تارتىپ، جوباعا جاڭا ەسىم بەردى.

بۇل تۋرالى Infohub.kz اقپارات اگەنتتىگى حابارلايدى.

جاڭا اتاۋلار ۇسىنىلدى

قالا تۇرعىندارىنان LRT جوباسىنا بىرنەشە اتاۋ ۇسىنىلعان. ولاردىڭ قاتارىندا «سۇڭقار»، «لاشىن»، «اسپان»، «تارلان» سىندى اتاۋلار بولدى. كوپ تالقىلاۋدان كەيىن دەپۋتاتتار «تارلان-استانا» اتاۋىن قولداۋ تۋرالى شەشىم قابىلدادى.

دەپۋتات باۋىرجان قاسىمبەرگەبايەۆتىڭ ايتۋىنشا، بۇل اتاۋدى قالانىڭ ونوماستيكا كوميسسياسى ۇسىنعان. «بۇل اتاۋدى ءبىزدىڭ قالالىق ونوماستيكا كوميسسياسى ۇسىندى. وسىعان بايلانىستى بىرنەشە ۇسىنىستى قاراستىردىق. ولار قالا تۇرعىندارىنان كەلىپ تۇسكەن بولاتىن. بۇگىن LRT-نى «تارلان-استانا» دەپ اتاۋ تۋرالى شەشىم قابىلداندى»، - دەدى دەپۋتات.

نەگە اتاۋ وزگەرتىلدى؟

دەپۋتاتتىڭ سوزىنشە، LRT – بۇل تەك كولىك ءتۇرىنىڭ تەحنيكالىق اتاۋى. ال كوپتەگەن ەلدەردە جەڭىل رەلستى كولىكتەردىڭ وزدەرىنە ءتان، جەرگىلىكتى تۇرعىندارعا تۇسىنىكتى اتاۋلارى بولادى. استانادا دا وسى ءۇردىستى ۇستانۋ تۋرالى شەشىم قابىلداندى.

«ءبىزدىڭ استانادا دا LRT وسىلاي اتالىپ، تۋريستەر مەن قوناقتارعا جاقسى اسەر قالدىرسا ەكەن دەگەن نيەت بولدى. جاڭا اتاۋ ارقىلى جوبانى ەلىمىزبەن بايلانىستىرۋ كوزدەلدى»، - دەپ ءتۇسىندىردى ول.

جوبانىڭ كوپ جىلدان بەرى جالعاسىپ كەلە جاتقان داۋلى تاريحىنا بايلانىستى اتاۋدىڭ وزگەرۋىنە قاتىستى سۇراققا دەپۋتات بۇل فاكتوردىڭ دا بار ەكەنىن جوققا شىعارمادى. الايدا، باستى ماقسات – جوبانىڭ ءيميدجىن جاقسارتۋ ەكەنىن اتاپ ءوتتى.

ايتا كەتەيىك، استانا LRT جوباسى 16 مامىردا ىسكە قوسىلدى. جوبا بويىنشا قالادا 18 ستانسيا بولادى. مارشرۋت قالانىڭ نەگىزگى ىسكەرلىك ورتالىقتارى مەن تۇرعىن اۋداندارى ارقىلى وتەدى.