InfoHub Logo

استانا مەن قوسشى قالالارىن جالعايتىن جەڭىل رەلستى كولىك (LRT) جوباسىنىڭ ەكىنشى كەزەڭىنە قاتىستى جاڭا مالىمەتتەر جاريالاندى. جوبانىڭ قۇرىلىس مەرزىمى مەن ەگجەي-تەگجەيى تۋرالى اقپاراتتى ەلوردالىق كولىك كومپانياسى – City Transportation System (CTS) تاراتتى.

بۇل تۋرالى Infohub.kz اقپارات اگەنتتىگى حابارلايدى.

قۇرىلىس مەرزىمى مەن جوبانىڭ ەرەكشەلىكتەرى

جوبا قۇجاتتارىنا سايكەس، LRT-نىڭ ەكىنشى كەزەڭىندەگى قۇرىلىس-مونتاج جۇمىستارىنىڭ ناقتى باستالۋ كۇنى ءتيىستى رۇقسات قۇجاتتارى مەن جوبالىق ماتەريالداردى كەلىسۋگە بايلانىستى بولادى. دەگەنمەن، جوبانى ىسكە اسىرۋدىڭ شامامەن 2026 جىلدىڭ ەكىنشى توقسانىندا باستالۋى جوسپارلانعان. قۇرىلىس جۇمىستارىنىڭ ءوزى شامامەن 68 ايعا، ياعني بەس جىلدان استام ۋاقىتقا سوزىلادى دەپ كۇتىلۋدە. وبەكتىنى پايدالانۋ مەرزىمى 100 جىلعا جۋىقتايدى دەپ بولجانۋدا.

ەكىنشى كەزەڭنىڭ اۋماعى مەن باعىتى

LRT-نىڭ ەكىنشى كەزەڭى ەكى ۋچاسكەدەن تۇرادى. ءبىرىنشى ۋچاسكە استانا قالاسىنىڭ سارىارقا، نۇرا، ەسىل اۋداندارىن قامتىپ، قابانباي باتىر داڭعىلىنان باستاپ سىعاناق، ش. ايتماتوۆ كوشەلەرى، تۇران، سارىارقا، جەڭىس داڭعىلدارى ارقىلى تەمىرجول ۆوكزالىنا دەيىن جەتەدى. ەكىنشى ۋچاسكە قابانباي باتىر داڭعىلىنان قارقارالى تاس جولىمەن قالا شەكاراسىنا دەيىن سوزىلادى. بۇل باعىتتىڭ جالپى ۇزىندىعى شامامەن 26،5 شاقىرىمدى قۇرايدى. ونىڭ 25،2 شاقىرىمى استانا قالاسىنىڭ اۋماعىمەن وتەدى، ال 1،3 شاقىرىمى اقمولا وبلىسىنداعى قوسشى قالاسىنا تيەسىلى بولادى.

تەحنيكالىق سيپاتتامالارى

جوبا اياسىندا ەكى قوسىمشا دەپو سالىنادى. ەكىنشى كەزەڭدەگى بارلىق جەلىلەر ءبىرىنشى كەزەڭدەگى جەلىلەرمەن ۇيلەسىمدى بولىپ، كرەست ءتارىزدى راديالدى تەمىرجول جەلىسىن قۇرايدى. پويىزداردىڭ ماكسيمالدى جىلدامدىعى ساعاتىنا 80 كم جەتەدى. قورەكتەندىرۋ 750 ۆ تۇراقتى توكپەن ءۇشىنشى رەلس ارقىلى جۇزەگە اسىرىلادى. سونداي-اق، جوبادا گازبەن جابدىقتاۋ جۇيەسى دە قاراستىرىلعان.

ەكولوگيالىق اسپەكتىلەرى

جوبانىڭ ەكىنشى كەزەڭى استاناداعى تالدىكول كولىنەن شامامەن 510 مەتر قاشىقتىقتا وتەدى جانە ەسىل وزەنىن كەسىپ وتەدى. قوسشى قالاسى اۋماعىنداعى ۋچاسكەدە سۋ وبەكتىلەرى جوق ەكەنى ايتىلعان.

بۇعان دەيىن استانا اكىمى جەڭىس قاسىمبەك قوسشىعا باعىتتالعان LRT جەلىسىنىڭ قۇرىلىسى 2026 جىلدىڭ باسىندا باستالىپ، 1،5 جىل ىشىندە اياقتالاتىنىن مالىمدەگەن بولاتىن.