InfoHub Logo

استاناداعى №81 مەكتەپتىڭ بۇرىنعى ديرەكتورى گۇلنار سادىقوۆا مەن باس بۋحگالتەرى ايجان اتجانوۆا 600 ميلليون تەڭگەگە جۋىق مەملەكەت قارجىسىن جىمقىردى دەگەن ايىپپەن سوتتالدى. بۇل تۋرالى Infohub.kz اقپارات اگەنتتىگى حابارلايدى.

استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا شىعارىلعان ۇكىم بويىنشا، 10 جىلدان استام ۋاقىت مەكتەپتى باسقارعان 65 جاستاعى سادىقوۆا 8 جىلعا، ال 41 جاستاعى اتجانوۆا 7 جىلعا باس بوستاندىعىنان ايىرىلدى.

مەكتەپتى جەكە بيزنەسكە اينالدىرعان

تەرگەۋ مالىمەتتەرىنە سۇيەنسەك، اتالعان تۇلعالار بىرنەشە جىل بويى مەكتەپتى جەكە بيزنەسىنە اينالدىرىپ، مەملەكەتكە وراسان زور زالال كەلتىرگەن. ولار جوق قىزمەتكەرلەرگە جالاقى تولەۋ، رۇقساتسىز دايارلىق سىنىپتارىن اشۋ جانە جازعى لاگەرلەردى زاڭسىز جۇرگىزۋ ارقىلى اقشا جىمقىرعان.

ماسەلەن، رەسمي تۇردە تىركەلگەن التى قىزمەتكەرگە جالاقى تولەنگەنىمەن، ولار ءىس جۇزىندە جۇمىس ىستەمەگەن. بۇل اقشانىڭ ءبىر بولىگىن ديرەكتور ءوز قالتاسىنا باسقان. بۇل سوما 28 ميلليون تەڭگەدەن اسقان.

زاڭسىز اشىلعان سىنىپتار مەن لاگەرلەر

مەكتەپتىڭ مەكتەپكە دەيىنگى ءبىلىم بەرۋگە رۇقساتى بولماسا دا، دايارلىق سىنىپتارى اشىلىپ، بالالار وقىتىلعان. اتا-انالاردان تەك قولما-قول اقشا العان. بۇل ارەكەتتەن كەلگەن شىعىن 300 ميلليون تەڭگەدەن استى. جازعى لاگەرلەر دە وسىلايشا قۇجاتسىز جۇمىس ىستەپ، قولما-قول اقشامەن جۇرگىزىلگەن. قارجىلىق مونيتورينگ اگەنتتىگىنىڭ مالىمەتىنشە، بۇل ارقىلى 24 ميلليون تەڭگەگە جۋىق تابىس تاپقان.

شەتەلدىك مۇعالىمدەر مەن اقشانى زاڭداستىرۋ

ديرەكتور شەتەلدىك مۇعالىمدەردى جوعارى جالاقىمەن جۇمىسقا تارتقانىمەن، بولىنگەن قارجىنىڭ ءبىر بولىگىن ءوزى يەمدەنگەن. بۇل سوما شامامەن 70-75 ميلليون تەڭگە بولدى. ال باس بۋحگالتەر اتجانوۆانىڭ شوتتارى ارقىلى 175 ميلليون تەڭگەگە جۋىق اقشا وتكەنى انىقتالدى.

سوتتا ەكى ايىپتالۋشى دا كىناسىن ءىشىنارا مويىنداپ، دايارلىق سىنىپتار مەن لاگەرلەردەن تۇسكەن قاراجات مەكتەپتىڭ قاجەتىنە، سونىڭ ىشىندە عيماراتتىڭ جوندەۋىنە جۇمسالعانىن ايتتى. الايدا، سۋديا اسەل مۇقاشيەۆا ولاردى بيۋدجەت قاراجاتىن جىمقىرۋ، قىزمەت وكىلەتتىگىن اسىرا پايدالانۋ جانە اقشانى زاڭداستىرۋ باپتارى بويىنشا كىنالى دەپ تانىدى.

گۇلنار سادىقوۆانىڭ ءزاۋلىم ءۇيى، 10 قىمبات سومكەسى جانە زەرگەرلىك بۇيىمدارى تاركىلەندى. ايجان اتجانوۆانىڭ اۆتوكولىگى مەن كوممەرسيالىق نىسانى الىندى. سوت ۇكىمى ءالى زاڭدى كۇشىنە ەنگەن جوق.