InfoHub Logo

استانادا جازۋشىلار اللەياسىندا ورنالاسقان بەكەجان مايلين ەسكەرتكىشىنە ءمىنىپ، سۋرەتكە تۇسكەن بويجەتكەن انىقتالدى. بۇل ارەكەت قوعام بەلسەندىلەرى مەن قاراپايىم ازاماتتاردىڭ قاتتى اشۋىن تۋدىردى.

بۇل تۋرالى Infohub.kz اقپارات اگەنتتىگى حابارلايدى.

وقيعا جازۋشىلار اللەياسىندا بولعان. ۆيدەودا ءبىر قىز ەسكەرتكىشتىڭ موينىنا وتىرىپ، اياعىن سالپاڭداتىپ تۇرعانى، ال ەكىنشىسى ونى سۋرەتكە ءتۇسىرىپ جاتقانى كورىنەدى. بۇل جايتتى جۋرناليست دۇيسەنالي ءالىماقىن بايقاپ، الەۋمەتتىك جەلىدە جاريالاعان.

ءجۋرناليستتىڭ نارازىلىعى

«جازۋشىلار اللەياسىندا دەمالىپ وتىرعان ەدىم. كەنەتتەن وسىنداي جاعىمسىز جاعدايعا كۋا بولدىم. جاقىنداپ بارىپ: «بۇل كىمدەر ەكەنىن بىلەسىزدەر مە؟» دەپ سۇرادىم. ولار تەك تاڭىرقاعانداي قاراپ، «نە، نە؟» دەپ جاۋاپ بەردى. كۋالىك رەتىندە وسى ءبىر اقىماقتىقتى ۆيدەوعا ءتۇسىردىم. ۇيات تا، كەشىرىم دە جوق. بۇل قۇرمەتسىزدىك پە، الدە ناداندىق پا؟» – دەپ جازدى جۋرناليست.

قوعامنىڭ جاۋابى

ۆيدەو جاريالانعاننان كەيىن الەۋمەتتىك جەلى قولدانۋشىلارى قىزدىڭ ارەكەتىن قاتتى سىنعا الىپ، ونى جاۋاپقا تارتۋدى تالاپ ەتتى.

پوليسيانىڭ ارەكەتى

استانا قالالىق پوليسيا دەپارتامەنتىنەن حابارلاعانداي، ءتارتىپ بۇزعان ازاماتشانىڭ جەكە تۇلعاسى انىقتالدى.

«پوليسيا قىزمەتكەرلەرى ۇلى جازۋشىنىڭ ەسكەرتكىشىنە قۇرمەتسىزدىك تانىتقان بويجەتكەننىڭ جەكە باسىن انىقتادى. الەۋمەتتىك جەلىدە قىزدىڭ سۋرەتكە ءتۇسۋ ءۇشىن بەكەجان ءمايليننىڭ ەسكەرتكىشىنە شىعىپ، مادەني ەسكەرتكىش پەن قوعامدىق ورىنعا دەگەن قۇرمەتسىزدىگىن كورسەتكەن ۆيدەوسى تارادى.

استانا قالاسىنىڭ «بايقوڭىر» اۋدانىنىڭ 18 جاستاعى تۇرعىنى پوليسيا باسقارماسىنا جەتكىزىلدى. ءتارتىپ بۇزعان ازاماتشاعا بۇزاقىلىق جاساعانى ءۇشىن جاۋاپكەرشىلىككە تارتىلىپ، شەشىم قابىلداۋ ءۇشىن ماتەريالدار سوتقا جىبەرىلدى»، – دەپ حابارلادى پوليسيا.

ۆەدومستۆو مۇنداي ارەكەتتەردىڭ جول بەرىلمەيتىنىن جانە مادەنيەت نىساندارى مەن تاريحي مۇرالارعا ۇقىپتى جانە قۇرمەتپەن قاراۋ قاجەتتىگىن ەسكە سالدى. سونداي-اق، پوليسيا ەسكەرتكىشتەر مەن مادەني مۇرا نىساندارىن قاساقانا بۇزۋ ۆانداليزم اكتىسى بولىپ سانالاتىنىن جانە زاڭدا كوزدەلگەن جاۋاپكەرشىلىككە، سونىڭ ىشىندە قىلمىستىق جاۋاپكەرشىلىككە اكەپ سوعاتىنىن اتاپ ءوتتى.