InfoHub Logo

استاناداعى وڭ جاعالاۋدا ورنالاسقان «اتامەكەن» ەتنو-مەموريالدىق كەشەنىنىڭ دەمونتاجى باستالدى. كەشەننىڭ ورنىنا نە سالىناتىنى ازىرگە بەلگىسىز، جۇرت الەۋمەتتىك جەلىلەردە بولجام جاساپ جاتىر.

بۇل تۋرالى Infohub.kz اقپارات اگەنتتىگى حابارلايدى.

كەيبىر كۋاگەرلەردىڭ ايتۋىنشا، كەشەن ورنىندا ارنايى تەحنيكا جۇمىس ىستەپ جاتىر. دەمونتاج جۇمىستارىنىڭ سەبەبى مەن بولاشاق قۇرىلىس جوسپارلارى تۋرالى رەسمي اقپارات ءالى جاريالانعان جوق.

بولجامدار مەن الاڭداۋشىلىقتار

استانالىق بلوگەر نۇرسۇلتان قامزەبايەۆ «اتامەكەن» ورنىنا وقۋشىلار سارايى سالىنۋى مۇمكىن دەگەن بولجام ايتتى. الايدا، ونىڭ پىكىرىنشە، بۇل شەشىم قالا ءۇشىن ءتيىمسىز بولادى، سەبەبى ەلوردادا اعاشتارى بار پاركتەر جەتىسپەيدى.

«اتامەكەن» كەشەنى 2001 جىلى اشىلعان بولاتىن. بۇل كەشەن كوپ جىلدار بويى ەلوردانىڭ تۋريستىك نىساندارىنىڭ ءبىرى سانالدى. ول قازاقستان كارتاسىنىڭ اشىق اسپان استىنداعى نۇسقاسى رەتىندە جاسالىپ، ەلىمىزدىڭ ساۋلەت جانە تابيعي ەسكەرتكىشتەرىنىڭ كىشىرەيتىلگەن كوشىرمەلەرىمەن بەزەندىرىلگەن ەدى.

رەسمي جاۋاپ

وتكەن جىلى استانا قالاسى اكىمدىگى «اتامەكەن» كەشەنىن بۇزۋعا دايىندالىپ جاتقانىن راستاعان بولاتىن. الايدا، ورنىنا نە سالىناتىنى تۋرالى ناقتى جاۋاپ بەرىلمەگەن ەدى.

اكىمدىكتىڭ رەسمي جاۋابىندا كەشەن عيماراتتارىنىڭ اۆاريالىق جاعدايدا ەكەندىگى جانە 2002 جىلى سالىنعان نىسانداردىڭ مورالدىق جانە تەحنيكالىق تۇرعىدان ەسكىرگەنى ايتىلعان. كەشەندەگى جۇمىسكەرلەر باسقا جەرگە اۋىستىرىلىپ، نىسانداردى بۇزۋعا رۇقسات قۇجاتتارى راسىمدەلۋدە ەكەنى حابارلانعان. جاڭا نىساننىڭ ورنالاسۋ ماسەلەسى اكىمدىك باسشىلىعىنىڭ قاراۋىندا ەكەنى جانە قالا قۇرىلىسى ەرەجەلەرى ەسكەرىلە وتىرىپ شەشىم قابىلداناتىنى كورسەتىلگەن.

«اتامەكەننىڭ» ماڭىزى

ساۋلەتشى-زەرتتەۋشى تەمىرتاس ىسقاقوۆتىڭ ايتۋىنشا، «اتامەكەننىڭ» قۇندىلىعى تەك اشىق اسپان استىنداعى مۇراجاي فورماتىندا عانا ەمەس، سونىمەن قاتار ونىڭ ورنالاسقان جەرىندە دە بولعان. كەشەن جاسىل جەلەكتەرى مول ساياباق ايماعىندا، دەندروساياباق پەن ورتالىق ساياباقتىڭ جانىندا ورنالاسقان.

«شاعىن اۋماقتا بۇكىل ەل – ءار قالا، ءار وبلىس ءوزىنىڭ ەسكەرتكىشتەرىمەن جانە كيەلى نىساندارىمەن كورسەتىلگەن. استاناعا كەلگەن كەز كەلگەن قوناق ءوزىنىڭ «ايماعىن» تابا الاتىن ەدى. بۇل شىنىمەن دە جاس استانانىڭ ۆيزيت كارتوچكاسى بولدى. مۇندا وقۋشىلار تاجىريبەدەن ءوتىپ، ەكسكۋرسيالار جۇرگىزىپ، العاشقى اقشاسىن تاپقان. بۇل جاي عانا دەكوراسيا ەمەس، ناعىز ينستيتۋسيا ەدى»، — دەپ اتاپ ءوتتى ول.

زەرتتەۋشىنىڭ پىكىرىنشە، ەگەر مۇراجايدىڭ جابىلۋىنا ونىڭ تانىمال بولماۋى سەبەپ بولسا، ونى جويۋدىڭ ورنىنا كونسەپسياسىن قايتا قاراپ، جاڭا مازمۇنمەن تولىقتىرىپ، زاماناۋي جۇمىس فورماتتارىن ىزدەگەن ءجون بولار ەدى.