InfoHub Logo

استانادا ءوتىپ جاتقان #RES2026 ايماقتىق ەكولوگيالىق سامميتىنە قاتىسۋشى جوعارى لاۋازىمدى تۇلعالاردى قازاقستان پرەزيدەنتى قاسىم-جومارت توقايەۆ EXPO حالىقارالىق كورمە ورتالىعىندا قارسى الدى.

بۇل تۋرالى Infohub.kz اقپارات اگەنتتىگى حابارلايدى.

ءسامميتتىڭ ماقساتى

بۇۇ جانە باسقا دا حالىقارالىق ۇيىمدارمەن بىرلەسىپ قۇرىلعان ديالوگ الاڭى ورتالىق ازياداعى ەكوجۇيەلەردى، سۋ جانە جەر رەسۋرستارىن قورعاۋ، قالپىنا كەلتىرۋ جانە بىرلەسىپ پايدالانۋ، سونداي-اق بيوارتۇرلىلىكتى ساقتاۋ بويىنشا كەشەندى ساياسات پەن قۇرالداردى قالىپتاستىرۋعا باعىتتالعان.

سامميتكە قاتىسۋشىلار

ەكولوگيالىق ءسامميتتىڭ پلەنارلىق وتىرىسىنىڭ اشىلۋىندا قازاقستان پرەزيدەنتى قاسىم-جومارت توقايەۆ، قىرعىز رەسپۋبليكاسىنىڭ پرەزيدەنتى سادىر جاپاروۆ، وزبەكستان پرەزيدەنتى شاۆكات ميرزيويەۆ، تاجىكستان پرەزيدەنتى ەمومالي راحمون، تۇركىمەنستان پرەزيدەنتى سەردار بەردىمۇحامەدوۆ، ارمەنيا پرەزيدەنتى ۆااگن حاچاتۋريان، موڭعوليا پرەزيدەنتى ۋحنااگيين حۋرەلسۋح، گرۋزيا پرەزيدەنتى ميحايل كاۆەلاشۆيلي، ازەربايجان پرەمەر-مينيسترى الي اسادوۆ، بۇۇ باس حاتشىسىنىڭ ەكونوميكالىق جانە الەۋمەتتىك ماسەلەلەر جونىندەگى ورىنباسارى لي سزيۋنحۋا، بۇۇ باس حاتشىسىنىڭ ورىنباسارى، بۇۇ قورشاعان ورتانى قورعاۋ باعدارلاماسىنىڭ اتقارۋشى ديرەكتورى ينگەر اندەرسەن، سونداي-اق بۇۇ ەۋروپالىق ەكونوميكالىق كوميسسياسىنىڭ اتقارۋشى حاتشىسى تاتيانا مولچان ءسوز سويلەيدى دەپ كۇتىلۋدە.

ءسامميتتىڭ باعدارلاماسى

ايماقتىق ەكولوگيالىق سامميت استانادا 22-24 ءساۋىر ارالىعىندا وتەدى. سامميت ورتالىق ازيا ەلدەرىن كليماتتىق جانە ەكولوگيالىق ماسەلەلەر بويىنشا ۇيلەستىرىلگەن تاسىلدەردى ازىرلەۋگە بىرىكتىرەدى دەپ كۇتىلۋدە. باعدارلامادا كليماتتىق اۋىسۋ، تابيعي تاۋەكەلدەرگە بەيىمدەلۋ، ازىق-تۇلىك قاۋىپسىزدىگى، رەسۋرستاردى تۇراقتى باسقارۋ، اۋانىڭ لاستانۋىمەن جانە قالدىقتارمەن كۇرەس، سونداي-اق ەكولوگيالىق جانە سيفرلىق قۇزىرەتتەردى دامىتۋ تاقىرىپتارى قامتىلعان. سامميتكە مەملەكەتتىك ورگانداردىڭ، حالىقارالىق ۇيىمداردىڭ، بيزنەس، عىلىم جانە ازاماتتىق قوعام وكىلدەرى – بارلىعى 1500-گە جۋىق دەلەگات قاتىسادى دەپ جوسپارلانعان.