InfoHub Logo

استانادا وتەتىن تويعا بارۋ ءۇشىن بيلەت العان جەتىسۋ وبلىسىنىڭ 16 تۇرعىنى كۇتپەگەن جاعدايعا ۇشىرادى. سالتاناتتى شارانىڭ بولماي قالۋىنا بايلانىستى جولاۋشىلار اۋە بيلەتتەرىن قايتارماق بولعاندا، ولارعا ءتيىستى اقشاسى تولىق قايتارىلمادى.

بۇل تۋرالى Infohub.kz اقپارات اگەنتتىگى حابارلايدى.

بيلەت قۇنىنىڭ از بولىگى عانا قايتارىلدى

تۇتىنۋشىلاردىڭ قۇقىقتارىن قورعاۋ كوميتەتىنىڭ مالىمەتىنشە، جەتىسۋ وبلىسى مەن الماتى قالاسىنىڭ تۇرعىندارى وتباسىلىق جيىنعا قاتىسۋ ءۇشىن استاناعا 16 اۋە بيلەتىن ساتىپ العان. جالپى بيلەتتەردىڭ قۇنى 765 248 تەڭگە بولدى. الايدا، وتباسىلىق جاعدايلارعا بايلانىستى تويدىڭ بولمايتىنى بەلگىلى بولعان سوڭ، جولاۋشىلار ۇشۋدان باس تارتىپ، بيلەتتەرىن قايتارۋعا ءوتىنىش ءبىلدىردى. بۇل شەشىمدى ولار رەيسكە 37 كۇن قالعاندا قابىلداعان.

جولاۋشىلار بيلەت قۇنى تولىق قايتارىلادى نەمەسە اۋە تاسىمالى ەرەجەسىندە كورسەتىلگەن از عانا ۇستاپ قالۋمەن قايتارىلادى دەپ كۇتكەن. الايدا، ولارعا جالپى سومانىڭ ورنىنا بار بولعانى 14 840 تەڭگە قايتارىلدى. بۇل ءار بيلەتكە شاققاندا نەبارى 927،5 تەڭگەدەن كەلەدى.

تۇتىنۋشىلار قۇقىعى قورعالدى

مۇنداي وتەماقى مولشەرىمەن كەلىسپەگەن تۇرعىندار جەتىسۋ وبلىستىق ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىندى. دەپارتامەنت ماماندارى ءىستىڭ ءمان-جايىن زەرتتەپ، ازاماتتارعا قۇقىقتىق كومەك كورسەتتى. ولارعا تۇتىنۋشىلار قۇقىعىن قورعاۋ تۋرالى زاڭ تالاپتارى ءتۇسىندىرىلىپ، ساتۋشى كومپانيا مەن اۋە تاسىمالداۋشىنىڭ اتىنا قاراجاتتى تولىق قايتارۋ تۋرالى سوتقا دەيىنگى شاعىم دايىنداۋعا كومەك بەرىلدى.

ناتيجەسىندە، دەپارتامەنت ارالاسقاننان كەيىن ماسەلە سوتقا دەيىن رەتتەلىپ، ەكى تاۋلىك ىشىندە تۇتىنۋشىلارعا 765 248 تەڭگە تولىق كولەمدە قايتارىلدى. دەپارتامەنت وكىلدەرى مۇنداي جاعدايلار ءجيى كەزدەسەتىنىن ەسكەرتىپ، ازاماتتارعا بيلەت ساتىپ الاردا تاريف شارتتارىن مۇقيات وقۋعا كەڭەس بەردى.