اتىراۋداعى قۇرىلىسى ۇزاققا سوزىلعان بالاباقشا ساعىنتايەۆتىڭ شامىنا ءتيدى
بۇگىن ۇكىمەت وتىرىسىندا پرەمەر-مينيستر باقىتجان ساعىنتايەۆ اتىراۋ وبلىسىنىڭ اكىمى نۇرلان نوعايەۆقا وڭىردەگى بالاباقشا قۇرىلىستارى بارىسىن جەكە باقىلاۋعا الۋدى تاپسىردى.
«2004 جىلدان بەرى سىزدە بىردە-بىر بالاباقشا بەرىلمەپتى، بۇعان قوسا، 2 مەكتەپتىڭ قۇرىلىسى اياقتالماعان. نەگە؟»، - دەپ سۇرادى ۇكىمەت باسشىسى ن.نوعايەۆتان.
بۇل رەتتە وبلىس باسشىسى اتىراۋ وڭىرىندە 3 پروبلەمالى ماسەلە بار ەكەندىگىن مويىندادى. «ونىڭ ءبىرى «نۇرسايا» شاعىناۋدانىنداعى مەكتەپ. ءبىز ونى كەلەسى جىلى پايدالانۋعا بەرەمىز. 2014 جىلدان بەرى كەلە جاتقان ەكىنشى ماسەلە - بۇل جۇمىستاردىڭ ساپاسىز جۇرگىزىلۋىنە بايلانىستى بالاباقشالاردىڭ پايدالانۋعا بەرىلمەۋى. ءبىز بۇل نىساندى دا تاياۋ ۋاقىتتا بەرۋدى جوسپارلاپ وتىرمىز. سونىمەن قاتار ماقات اۋدانىنداعى مەكتەپ قۇرىلىسىن دا وسى جىلى اياقتايمىز. تۇرعىن ءۇي قۇرىلىسى بويىنشا ينجەنەرلىك-كوممۋنيكاسيالىق ينفراقۇرىلىم جۇرگىزىلدى. بارلىق قارجى يگەرىلدى»، - دەدى ن.نوعايەۆ.
مۇنان بولەك، ول قازىرگى ۋاقىتتا وبلىستا 44 كوپقاباتتى جانە 15 ءبىر قاباتتى تۇرعىن ءۇيدىڭ قۇرىلىسى جوسپارعا سايكەس جۇرگىزىلىپ جاتقانىن ايتتى.
وسى رەتتە ب.ساعىنتايەۆ وبلىس اكىمىنە بۇل ماسەلەلەردى شەشۋدى ءارى وڭىردەگى بالاباقشالار قۇرىلىسىن ءوز باقىلاۋىنا الۋدى قاتاڭ تاپسىردى.
«ءبىر بالاباقشانىڭ قۇرىلىسى ءۇش جىل بويى نەلىكتەن اياقتالماي وتىر؟ نەگە باقىلاۋ جوق. سىزگە وسىعان نازار اۋدارۋىڭىزدى وتىنەمىن»، - دەدى ۇكىمەت باسشىسى.
You Might Also Like
-
بۇگىن ۇكىمەت وتىرىسىنان كەيىنگى بريفينگتە ق ر ءبىلىم جانە عىلىم ءمينيسترى ەرلان ساعادييەۆ 2017 جىلى ۇلتتىق ءبىرىڭعاي تەستىلەۋگە ەنگىزىلەتىن جاڭالىقتاردى ءتۇسىندىرىپ بەردى.
-
قازاقستاندا بالاباقشامەن قامتۋدى 15-20 پايىزعا كوبەيتۋگە مۇمكىندىك بەرەتىن 2 نورما دايىندالۋدا. بۇل تۋرالى بۇگىن ق ر ۇكىمەتى وتىرىسىندا ەلىمىزدىڭ ءبىلىم جانە عىلىم ءمينيسترى ەرلان ساعادييەۆ ايتتى.
