InfoHub Logo

اتىراۋدا ايەل ۇستازدارعا ارنالعان تەگىن STEM HANYM كۋرستارى باستالماق،-دەپ جازادى ينفوحاب ءتىلشىسى.

اتىراۋ وبلىسىندا العاش رەت ايەل مۇعالىمدەر مەن پەداگوگيكالىق ماماندىق يەلەرىنە ارنالعان تەگىن STEM HANYM كۋرستارى ىسكە قوسىلدى. جوبا زاماناۋي ءبىلىم مەن داعدىلاردى يگەرۋگە، كاسىبي بىلىكتىلىكتى ارتتىرۋعا جانە جاڭا مۇمكىندىكتەرگە جول اشۋعا باعىتتالعان.

كۋرس ونلاين جانە وفلاين فورماتتا وتەدى. ونلاين بولىگىندە قاتىسۋشىلار عىلىم، تەحنولوگيا، ينجەنەريا جانە ماتەماتيكا (STEM) باعىتتارىمەن تانىسادى. وفلاين حاكاتون-ساباقتار قۇرمانعازى، ماحامبەت، ماقات، جىلىوي اۋداندارىندا جانە اتىراۋ قالاسىندا ۇيىمداستىرىلادى. جوباعا قاتىسقان ەڭ ۇزدىك 100 ايەل سەرتيفيكاتتالعان STEM-ترەنەر اتانىپ، بىلىكتىلىكتەرىن ارتتىرۋ، جاڭا وقىتۋ ادىستەرىن مەڭگەرۋ جانە ولاردى تاجىريبەدە قولدانۋ، بالالارعا STEM باعىتىندا ءبىلىم بەرۋ مۇمكىندىگىنە يە بولادى.

جوباعا كەلەسى ساناتتاعى ايەلدەر قاتىسا الادى:
- جاراتىلىستانۋ-ماتەماتيكالىق نەمەسە گۋمانيتارلىق ءپان مۇعالىمدەرى؛
- بالاباقشا تاربيەشىلەرى؛
- پەداگوگيكالىق فاكۋلتەت ستۋدەنتتەرى (3–4 كۋرس)؛
- پەداگوگيكالىق ءبىلىمى بار، ءبىراق ماماندىعى بويىنشا جۇمىس ىستەمەيتىن ايەلدەر؛
- مۇمكىندىگى شەكتەۋلى ايەلدەر مەن ەرەكشە بالاسى بار انالار.
جوبانىڭ ەڭ ۇزدىك ەكى كومانداسى مەنتورلىق قولداۋ الىپ، ورتالىق ازياداعى STEM چەمپيوناتىنىڭ فينالىنا قاتىسادى.

STEM – الەمدە ەڭ جىلدام دامىپ كەلە جاتقان جانە جوعارى اقى تولەنەتىن ماماندىقتار قاتارىنا كىرەدى. بۇل باعدارلاما قاتىسۋشىلارعا كاسىبي كوكجيەگىن كەڭەيتۋگە عانا ەمەس، سونىمەن بىرگە قوعامدا تەحنيكالىق سالانىڭ دامۋىنا ۇلەس قوساتىن جاڭا بۋىندى تاربيەلەۋگە مۇمكىندىك بەرەدى.

جوبا «سامۇرىق-قازىنا» اق كومپانيالار توبى اتىنان «Samruk-Kazyna Trust» كورپوراتيۆتىك قورى مەن «ExxonMobil» كومپانياسىنىڭ قارجىلاي قولداۋىمەن، USTEM Foundation قوعامدىق قورىمەن جۇزەگە اسىرىلادى.

قاتىسۋعا وتىنىمدەر 10 تامىزعا دەيىن قابىلدانادى (www.stemhanym.kz).