InfoHub Logo

اتىراۋ وبلىسىندا زەينەتكەر ەرلى-زايىپتىلاردىڭ ولىمىنە قاتىستى تەرگەۋ جالعاسۋدا. ولاردىڭ مايىتتەرى ءوز ۇيلەرىنىڭ اۋلاسىنان تابىلعان. بۇل وقيعا قوعامدا ۇلكەن رەزونانس تۋدىردى.

بۇل تۋرالى Infohub.kz اقپارات اگەنتتىگى حابارلايدى.

قىلمىستىڭ ءمان-جايى

ەرلى-زايىپتىلاردى ىزدەۋ جۇمىستارى 6 قاڭتار كۇنى اياقتالعان. تۋىستارىنىڭ ايتۋىنشا، مايىتتەر ءوز ۇيلەرىنىڭ اۋلاسىنداعى سارايدان تابىلعان. قازا بولعان ازاماتتىڭ اپكەسى فاريزات كەنجەعالييەۆا قىلمىسكەر نەمەسە قىلمىسكەرلەر جەرلەۋ ورنىن الدىن الا مۇقيات دايىنداعانىن جەتكىزدى.

«بۇل سارايدىڭ ىشىندە ديۆان تۇرعان. سول ديۆاننىڭ استىنان مەنىڭ اعام مەن ونىڭ جۇبايىنىڭ مايىتتەرىن تاپتىق. ىشىندە شامامەن 1،2–1،3 مەتر تەرەڭدىكتە شۇڭقىر قازىلعان. مايىتتەردىڭ ۇستىنە كيىز جابىلىپ، ونىڭ ۇستىنە ەكى ورىندىق ديۆان قويىلعان. ولاردى مەن جالعىز ءوزىم تاپقان جوقپىن — بۇكىل اۋىل بولىپ ىزدەگەندىكتەن، ءبارىمىز بىرگە تاپتىق»، – دەدى فاريزات.

قىلمىس ىزدەرىن جاسىرۋ ارەكەتتەرى

تۋىسىنىڭ ايتۋىنشا، سارايدا قىلمىس ىزدەرىن جاسىرۋعا ارەكەت جاسالعانى بايقالعان، الايدا بارلىق ايعاقتاردى تولىق جويۋ مۇمكىن بولماعان.

«كوپتەگەن تەكسەرۋلەر جۇرگىزىلدى. سونىڭ ناتيجەسىندە سارايدىڭ ىشكى قابىرعالارىندا شاشىراعان قان ىزدەرى بولعانى، ولاردى سۇرتۋگە تىرىسقانى انىقتالدى. ول ىزدەر ارەڭ بايقالاتىن. سونىمەن قاتار لينولەۋمگە قانعا ءسىڭىپ قالعانى كورىندى. مۇنىڭ ءبارىن تازالاپ، ءۇستىن كىلەمدەرمەن جاۋىپ، جاسىرۋعا تىرىسقان»، – دەيدى ول.

ساراپتاما ناتيجەلەرى

ۆەدومستۆونىڭ باسپا ءسوز حاتشىسى مەيىرىم ەرداۋلەت ساراپتامانىڭ ناقتى دەرەكتەرىن مالىمدەدى.

«الەۋمەتتىك جەلىلەردە ءتۇرلى نۇسقالار، سونىڭ ىشىندە ەرلى-زايىپتىنى تۇنشىقتىرعان دەگەن بولجامدار تارادى. قازا تاپقانداردىڭ دەنەسىنەن پىشاق جاراقاتتارى — شانشىپ-كەسىلگەن زاقىمدار انىقتالدى. مايىتتەر سوت-مەديسينالىق ساراپتاماعا جىبەرىلدى. ساراپتاما بارىسىندا جاراقاتتاردىڭ ناقتى سانى، ءولىمنىڭ سەبەبى جانە قىلمىستىڭ ناقتى جاسالعان ۋاقىتى انىقتالاتىن بولادى»، – دەدى باسپا ءسوز حاتشىسى.