InfoHub Logo

الماتىدا ال-فارابي داڭعىلىندا ورىن العان، ءۇش ادامنىڭ ءومىرىن قيعان جول اپاتىنا قاتىستى سوت پروسەسى باستالدى. بۇل تۋرالى Kazinform اگەنتتىگى حابارلايدى.

بۇل تۋرالى Infohub.kz اقپارات اگەنتتىگى حابارلايدى.

ءىستى الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سۋديا ەركىن مايشينوۆ قاراۋدا. سوتتالۋشى رەتىندە 32 جاستاعى كاسىپكەر ا.پ. وتىر. ول ق ر قىلمىستىق كودەكسىنىڭ 345-بابى 4-بولىگى بويىنشا، ياعني ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتىرعان جول ءجۇرىسى قاعيدالارىن بۇزۋ بويىنشا ايىپتالۋدا.

سوت وتىرىسى جانە جابىرلەنۋشىلەردىڭ جاۋابى

سوت وتىرىسى ونلاين جانە وفلاين فورماتتا ءوتتى. ايىپتالۋشى مەن جابىرلەنۋشىلەر ونلاين رەجيمدە قاتىستى. بۇگىنگى وتىرىستا جابىرلەنۋشىلەر جاۋاپ بەردى. Mercedes كولىگىنىڭ مارقۇم جۇرگىزۋشىسىنىڭ اپكەسى ە.ت. مەملەكەتتىك ايىپتاۋشىنىڭ سۇراقتارىنا جاۋاپ بەرىپ، ءىنىسىنىڭ قايتىس بولعانىن تاڭەرتەڭ انىقتاۋشىدان ەستىگەنىن ايتتى. ونىڭ ايتۋىنشا، تاڭعى ساعات 7 شاماسىندا وعان انىقتاۋشى حابارلاسىپ، باۋىرىنىڭ قازا تاپقانىن ايتىپ، تانۋعا شاقىرعان. وسىلايشا، ول ال-فارابي داڭعىلىنداعى جول اپاتىنان قايتىس بولعانىن بىلگەن. سوڭعى رەت ىنىسىمەن 20 ناۋرىزدا كەزدەسكەنىن، سول كۇنى تاڭەرتەڭ ونى جۇمىسىنا اپارىپ تاستاعانىن ايتتى.

«ءبىز كۇندە بىرگە جۇرەتىنبىز. ول كومپيۋتەر كلۋبىندا اكىمشى بولىپ جۇمىس ىستەدى، ماعان دا ىستەرىمدە كومەكتەسەتىن»، - دەدى ول.

تۋىستاردىڭ كەشىرىم ءوتىنىشى

مارقۇم جۇرگىزۋشىنىڭ تۋىستارى سوتقا سوتتالۋشىمەن تاتۋلاسۋ تۋرالى ءوتىنىشحات تاپسىردى. حاتتا ا.پ. ءوز كىناسىن تولىق مويىنداپ، شىن جۇرەكتەن وكىنگەنىن، ماتەريالدىق جانە مورالدىق شىعىندى تولىق وتەگەنى ايتىلعان. ولار بۇل شەشىمدى ەشقانداي قىسىمسىز، ءوز ەرىكتەرىمەن قابىلداعانىن اتاپ ءوتتى. سونىمەن قاتار، مارقۇمنىڭ تۋىستارى سوتتالۋشىعا بوستان بوساتۋمەن بايلانىستى ەمەس جازا تاعايىنداۋدى سۇراپ، ونى تولىق كەشىرگەندەرىن جانە وعان ەشقانداي تالاپتارى جوق ەكەنىن جەتكىزدى.

ەكىنشى جابىرلەنۋشى تاراپ

ەكىنشى جابىرلەنۋشى تاراپ – 20 جاستاعى ك.ت. قىزىنىڭ وتباسى. ونىڭ اناسى ب.ج. كۋا رەتىندە ءسوز سويلەدى. پروكۋروردىڭ سۇراقتارىنا جاۋاپ بەرە وتىرىپ، قىزىنىڭ جەكە تاكسي قىزمەتىمەن اينالىسقانىن جانە 21 ناۋرىزدا 267 مىڭ تەڭگە نەسيەسىن تولەۋى ءتيىس بولعانىن ايتتى.

«20 ناۋرىزدا كەشكى ساعات 22:30 شاماسىندا قىزىم ۇيگە كەلدى. تاكسيدە جۇمىس ىستەيتىن. اش ەكەنىن، تاماق ىشكىسى كەلەتىنىن ايتتى. سول كۇنى 267 مىڭ تەڭگە نەسيەسىن تولەۋى كەرەك ەدى. ول شامامەن 90 مىڭ تەڭگە جەتپەيتىنىن جانە سول سومانى تابۋ كەرەكتىگىن ايتىپ، سودان كەيىن ۇيگە ورالاتىنىن ايتتى. مەن ونى تاماقتاندىردىم، ول جۇمىسىنا قايتا كەتتى. ساعات 23:30 شاماسىندا قىزىمنىڭ ۇيگە ورالماعانىنا الاڭداي باستادىم. وعان ۆيدەوبايلانىس ارقىلى حابارلاستىم. ول جولاۋشىلارمەن بىرگە ەكەن. قاشان كەلەتىنىن، اش ەمەس پە ەكەنىن سۇرادىم. ول اش ەكەنىن، جولاۋشىلاردى جەتكىزىپ، تاماقتانىپ ۇيگە ورالاتىنىن ايتتى. بۇل ءبىزدىڭ سوڭعى سويلەسۋىمىز بولدى. ماعان ۋايىمداماۋدى ءوتىندى، سوندىقتان ۇيىقتاپ قالدىم»، - دەدى اناسى.

ول سونداي-اق، دەنساۋلىعىنا بايلانىستى ەكى جىلدان بەرى ەمدەلىپ جاتقانىن، سوندىقتان تاڭەرتەڭ انىقتاۋشىلاردىڭ قوڭىراۋىن ەستىمەگەنىن ايتتى. ونىڭ ايتۋىنشا، تاڭعى ساعات 9 شاماسىندا كۇيەۋى قوڭىراۋعا جاۋاپ بەرىپ، قىزىنىڭ قازا تاپقانى تۋرالى حابارلانىپ، تانۋعا شاقىرعان.

«ءبىز شامالعاندا تۇرامىز. تاڭعى توعىزدار شاماسىندا شىعىپ، الماتىعا ون بىرگە جۋىق كەلدىك. سودان كەيىن ءمايىتحاناعا باردىق. قىزىمنىڭ سول جەردە جاتقانىنا سەنەم المادىم. سوڭعى ساتكە دەيىن ول كومادا دەپ ويلادىم»، - دەدى جابىرلەنۋشى.

سوتتا ونىڭ ءوتىنىشحاتى دا وقىلدى، وندا ول جانە ونىڭ تۋىستارى سوتتالۋشىمەن تاتۋلاسقانىن حابارلادى. ايەلدىڭ ايتۋىنشا، قىزىن قايتارىپ الا المايدى، سوندىقتان وتباسى ا.پ.-نى كەشىرۋگە شەشىم قابىلداعان. حاتتا جول اپاتىنىڭ اۋىر زارداپتارى مەن قىزىنىڭ قازاسى قاراماستان، ول جانە ونىڭ جاقىندارى سوتتالۋشىمەن تولىق تاتۋلاسۋعا قول جەتكىزگەنى ايتىلعان. ا.پ. كىناسىن تولىق مويىنداپ، شىن جۇرەكتەن وكىنىپ، كەشىرىم سۇراپ، ماتەريالدىق جانە مورالدىق شىعىندى تولىق وتەگەنى اتاپ ءوتىلدى. سونداي-اق، ءوتىنىشحاتتا وتباسىنىڭ وعان ەشقانداي ماتەريالدىق نەمەسە مورالدىق تالاپتارى جوق ەكەنى جانە بولاشاقتا دا قويمايتىنى ايتىلعان. تاتۋلاسۋ تۋرالى شەشىم ءوز ەركىمەن قابىلدانعان. بۇدان باسقا، مارقۇمنىڭ تۋىستارى سوتتالۋشىعا بوستان بوساتۋمەن بايلانىستى ەمەس جازا تاعايىنداۋدى، سونىڭ ىشىندە شارتتى تۇردە سوتتاۋ مۇمكىندىگىن قاراستىرۋدى سۇرادى.

«ءبىز ونى تولىق كەشىردىك جانە وعان ەشقانداي تالاپتارىمىز جوق ەكەنىن راستايمىز. بولاشاقتا دا بولمايدى»، - دەلىنگەن ءوتىنىشحاتتا.

سونداي-اق، ب.ج. سوتقا ادۆوكات مەيىرمان قالماحان ۇلىنىڭ قىزمەتىنەن باس تارتقانىن حابارلادى.

ءۇشىنشى مارقۇم ت.ك.-نىڭ تۋىستارىنىڭ ۇستانىمى ءالى سوتتا قارالمادى. ولاردىڭ جاۋابى كەلەسى سوت وتىرىسىنا، ياعني 4 ماۋسىم كۇنى ساعات 10:00-گە اۋىستىرىلدى. وسىدان كەيىن سۋديا ءۇزىلىس جاريالادى.

تراگەديانىڭ حرونولوگياسى

اپات 21 ناۋرىزعا قاراعان ءتۇنى ال-فارابي داڭعىلىندا جول ءجۇرىسى قاعيدالارىن ورەسكەل بۇزۋ سالدارىنان بولدى. تەرگەۋ مالىمەتتەرى بويىنشا، Zeekr كولىگىنىڭ جۇرگىزۋشىسى قارسى جولاققا شىعىپ، Mercedes كولىگىمەن سوقتىعىسقان. اپات سالدارىنان Mercedes جۇرگىزۋشىسى (29 جاستا) جانە ەكى جولاۋشى (20 جانە 22 جاستاعى قىزدار) وقيعا ورنىندا كوز جۇمدى. Zeekr كولىگىنىڭ جۇرگىزۋشىسى دەنە جاراقاتتارىن الىپ، اۋرۋحاناعا جاتقىزىلدى، كەيىننەن كونۆويمەن كۇزەتىلدى. جاعدايى تۇراقتالعان سوڭ، تەرگەۋ يزولياتورىنا جەتكىزىلدى. اپات كەزىندە ول جەڭىل دارەجەدەگى الكوگولدىك ماساڭ كۇيدە بولعانى انىقتالدى. بۇل وقيعا قوعامدا ۇلكەن رەزونانس تۋدىردى. جول-كولىك وقيعاسى بويىنشا ق ر قك 345-بابى 4-بولىگى بويىنشا قىلمىستىق ءىس قوزعالدى، بۇل 10 جىلعا دەيىن باس بوستاندىعىنان ايىرۋدى كوزدەيدى. تراگەديادان كەيىن قالالىق پوليسيا دەپارتامەنتى باستىعىنىڭ ورىنباسارى جانە ءبىرقاتار باسقا لاۋازىمدى تۇلعالار ءوز قىزمەتتەرىنەن بوساتىلدى. سونىمەن قاتار، پوليسيا دەپارتامەنتى باسشىلارىنىڭ ءبىرىنىڭ جۇرگىزۋشىسىنە قاتىستى ارەكەتسىزدىك فاكتىسى بويىنشا قىلمىستىق ءىس قوزعالدى. تەرگەۋ بارىسىن مەملەكەت باسشىسى باقىلاۋىنا الدى. الماتىدا جول قوزعالىسى قاۋىپسىزدىگىن قامتاماسىز ەتۋ شارالارى كۇشەيتىلدى: رەيدتەر كوبەيتىلىپ، جاسىرىن پاترۋلدەۋ ەنگىزىلىپ، جول ەرەجەسىن بۇزۋشىلاردى باقىلاۋ ءۇشىن فيلتراسيالىق بەكەتتەر ۇيىمداستىرىلدى.