InfoHub Logo

كەڭەس وكىمەتى كەزىندە ءبىر اۋىلدا ءبىر-اق قۇران بولدى دەسەك، ارتىق ايتقاندىق بولماس. ونىڭ ءوزى نە مولدانىڭ، نە اتا-باباسى ءدىندار بولعان ادامداردىڭ ۇيىندە عانا بار ەدى. سونداي ءبىر كەزەڭدە، مۇسىلمان ەلىنىڭ ءبىر عالىمى بوسنياعا بارعان ەكەن. سول جەردە ءبىر جانازاعا قاتىسادى. مارقۇمدى جەرلەپ جاتقاندا، قابىرىنەن سونداي ءبىر كەرەمەت ميسكتىڭ ءيىسى شىعادى. الگى عالىم ادام مارقۇمنىڭ وتباسىن ىزدەپ بارادى. عالىم جۇبايىنان: «ەرىڭىز قانداي ادام ەدى؟ ول كىسىنى قابىرىنە قويعاندا، ەرەكشە ءبىر ميسكتىڭ ءيىسى شىقتى. سونىڭ سەبەبىن ايتىپ بەرىڭىزشى»، — دەپ وتىنەدى. جۇبايى: «قوجايىنىم ونداي وقىعان ادام ەمەس. ءبىراق، بەس ۋاقىت نامازىن وقىپ، جامان ءسوز ايتۋ، جاماندىق جاساۋدى بىلمەيتىن جان ەدى. ءبىزدىڭ اۋىلدا ءبىر-اق قۇران بار بولاتىن. بۇل كىتاپ كەزەك-كەزەك اۋىلداعى ءار ۇيگە ءبىر كۇنگە عانا بەرىلەتىن. وتاعاسى ءوزىنىڭ كەزەگى جارتى جىلدا ءبىر كەلگەندە، قاتتى قۋانىپ، بارلىق ىنتا-جىگەرىمەن دايىندالاتىن. بەينە ءبىر وزىنە «دجيپ» ماشيناسىن سىيلاعاندا، قۋانعان ادامداي قۋاناتىن. قۇران ۇيگە كەلەر الدىندا عۇسىل قۇيىنىپ، ەڭ جاقسى كيىمدەرىن كيىپ، حوش ءيىستى سەبىنەتىن. كالام-شاريف قولىنا تيگەندە، ءسۇيىپ، ماڭدايىنا تيگىزەتىن.

ودان كەيىن، ءوزى قۇران وقي الماسا دا، ءار بەتىن اشىپ، سيپاپ، قۇشاقتاپ ءسۇيىپ: «مىناۋ مەنىڭ راببىمنىڭ ءسوزى»، — دەپ، تاڭ اتقانشا وتىراتىن. مىنە، وسىنداي عانا امالى بار بولاتىن»، — دەپ جاۋاپ بەرىپتى. الگى عالىم: «ابدۋللاھ بين ماسعۇدتان (رادياللاھۋ انھ) جەتكەن حاديستە پايعامبارىمىزدىڭ مۇحاممەد (الەيھيسسالام): «كىمدە-كىم اللاھۋ تا’الانى قانشالىقتى جاقسى كورەتىنىن بىلگىسى كەلسە، قۇرانمەن اراداعى قارىم-قاتىناسىنا قاراسىن»، — دەگەن ەدى. ءسىزدىڭ جولداسىڭىز قۇراندى قۇرمەت ەتكەنى ءۇشىن وسى دارەجەگە جەتكەن ەكەن»، — دەپتى.

قۋات قابدولدا

---