InfoHub Logo

ازاتتىق راديوسى قىزمەتىن توقتاسا، ەلدە زاڭ مەن ءتارتىپ ديكتاتۋراسى كۇشەيەدى - ساياساتتانۋشى

اقش ۇكىمەتىنىڭ «ازاتتىق» راديوسىن (Radio Free Europe/Radio Liberty) قارجىلاندىرۋدى توقتاتۋى مۇمكىن ەكەنى تۋرالى اقپارات قوعامدا قىزۋ تالقىلانىپ جاتىر. بۇل جاڭالىققا بايلانىستى پىكىر ەكىگە ءبولىندى: ءبىر تاراپ راديوستانسيانى تاۋەلسىز اقپارات كوزىنىڭ ءبىرى دەپ ساناسا، ەندى بىرەۋلەر ونى شەتەلدىك ىقپال قۇرالى رەتىندە كورەدى.

قازىرگى ۋاقىتتا اقش «ازاتتىق» راديوسىن قارجىلاندىرۋدى رەسمي تۇردە توقتاتتى دەگەن ناقتى دەرەك جوق. ءبىراق 2025 جىلدىڭ اقپانىندا اقش ۇكىمەتىنىڭ تيىمدىلىك دەپارتامەنتىنىڭ باسشىسى يلون ماسك «ازاتتىق راديوسى» مەن «امەريكا داۋىسى» راديوستانسيالارىن جابۋدى ۇسىندى. ول بۇل ۇيىمداردى «راديكالدى سولشىلدار» دەپ اتاپ، سالىق تولەۋشىلەردىڭ قاراجاتىن دۇرىس پايدالانباي وتىرعانىن مالىمدەدى. بۇل ۇسىنىستى قىرعىزستان پرەزيدەنتى سادىر جاپاروۆ تا قولداپ، «ازاتتىقتىڭ» داۋرەنى بىتكەنىن ايتقان بولاتىن.

قازاقستاندا «ازاتتىق» راديوسىنىڭ تاعدىرىنا الاڭداۋشىلىق ءبىلدىرىپ جاتقاندار كوپ. ساياساتتانۋشى شالقار نۇرسەيىت بۇل راديوستانسيانىڭ قىزمەتى توقتاسا، ەلدە «زاڭ مەن ءتارتىپ ديكتاتۋراسىنىڭ» كۇشەيەتىنىن ايتتى.

Facebook جانە باسقا دا الەۋمەتتىك جەلىلەردە جۋرناليستەر مەن ازاماتتىق بەلسەندىلەر «ازاتتىق» راديوسىنىڭ قازاقستان قوعامى ءۇشىن ماڭىزدى ەكەنىن جازىپ جاتىر. جۋرناليست قويشىبەك مۇباراك:

"تاۋەلسىز اقپارات قۇرالدارىنا قىسىم جاسالىپ، جۋرناليستەر جازىقسىز سوتتالىپ جاتقاندا دا «ازاتتىق» جۋرناليستەرى بۇعىپ قالعان جوق"، – دەپ مالىمدەدى.

دەگەنمەن، «ازاتتىقتىڭ» جابىلعانىنا قۋانعاندار دا جوق ەمەس. جۋرناليست الماس التاي Facebook پاراقشاسىندا:

"RIP. ازاتتىق راديوسى" – دەپ جازدى. ول بۇل راديوستانسيا ەشقاشان حالىقتىڭ مۇددەسىن ويلاماعانىن، كەرىسىنشە، ەل ىشىندەگى دۇربەلەڭدى كۇشەيتۋگە باعىتتالعانىن ايتتى.

التايدىڭ جازباسىن سىنعا العاندار دا بار. كەيبىر قولدانۋشىلار ونىڭ پىكىرىن بيلىكتىڭ مۇددەسىنە ساي دەپ باعالاپ، جازبانىڭ «تاپسىرىسپەن» جازىلعانىن مەڭزەدى.

قازىرگى تاڭدا «ازاتتىق» راديوسىنىڭ بولاشاعى ءالى دە بەلگىسىز. اقش ۇكىمەتى رەسمي تۇردە قارجىلاندىرۋدى توقتاتقانى تۋرالى حابارلاما تاراتقان جوق. ءبىراق بۇل تاقىرىپتىڭ قىزۋ تالقىلانىپ جاتقانىنىڭ ءوزى قازاقستانداعى تاۋەلسىز اقپارات قۇرالدارىنا دەگەن كوزقاراستىڭ قانشالىقتى ءارتۇرلى ەكەنىن كورسەتەدى.