InfoHub Logo

بىرىككەن اراب امىرلىكتەرى (ءباا) 1 مامىر 2026 جىلدان باستاپ مۇناي ەكسپورتتاۋشى ەلدەر ۇيىمى (وپەك) جانە وپەك+ اليانسىنان شىعاتىنىن رەسمي تۇردە حابارلادى. بۇل شەشىم ەلدىڭ ەنەرگەتيكالىق سەكتورىن دامىتۋعا باعىتتالعان ۇزاق مەرزىمدى ستراتەگياسىمەن جانە ىشكى وندىرىستىك قۋاتتى ارتتىرۋعا ينۆەستيسيانى جەدەلدەتۋ جوسپارلارىمەن بايلانىستى.

بۇل تۋرالى Infohub.kz اقپارات اگەنتتىگى حابارلايدى.

ابۋ-دابيدەگى رەسمي مالىمدەمەدە ءباا وپەك-تەن شىققاننان كەيىن دە مۇناي ءوندىرۋدى سۇرانىس پەن نارىق جاعدايلارىنا سايكەس بىرتىندەپ ارتتىرا بەرەتىنى ايتىلعان. بۇل قادام ەلدىڭ وندىرىستىك ساياساتىن، قازىرگى جانە بولاشاق مۇمكىندىكتەرىن مۇقيات قاراستىرۋ ناتيجەسىندە قابىلداندى.

گەوساياسي جاعداي مەن بولاشاققا بولجام

ءباا بيلىگى بۇل شەشىمگە پارسى شىعاناعىنداعى جانە ورمۋز بۇعازىنداعى گەوساياسي تۇراقسىزدىق، سونداي-اق ورتا مەرزىمدى جانە ۇزاق مەرزىمدى پەرسپەكتيۆادا ەنەرگيا رەسۋرستارىنىڭ جاھاندىق سۇرانىسىنىڭ ءوسۋى بولجامى اسەر ەتكەنىن اتاپ ءوتتى. ەلدىڭ ايتۋىنشا، الەمدىك ەنەرگەتيكالىق نارىقتىڭ تۇراقتىلىعى سەنىمدى جانە قولجەتىمدى جەتكىزىلىمدەرگە بايلانىستى، ال ءباا بۇل سالادا جاۋاپكەرشىلىگى مول، سەنىمدى جەتكىزۋشى رەتىندە قالا بەرمەك.

وپەك تاريحىنداعى ماڭىزدى قادام

ءباا 1967 جىلى ابۋ-دابي ارقىلى وپەك-كە قوسىلىپ، 1971 جىلى مەملەكەت قۇرىلعاننان كەيىن ۇيىمداعى مۇشەلىگىن ساقتاپ قالعان بولاتىن. وسى ۋاقىت ىشىندە ەل الەمدىك مۇناي نارىعىنىڭ تۇراقتىلىعىن قولداۋدا بەلسەندى ءرول اتقاردى. الايدا، اليانس ىشىندەگى شەكتەۋلەر ءباا-نىڭ مۇناي قۋاتتىلىعىن كەڭەيتۋگە كەدەرگى كەلتىرگەن ەدى.

ءباا-نىڭ وپەك پەن وپەك+ قۇرامىنان شىعۋى الەمدىك مۇناي نارىعىنداعى تەپە-تەڭدىكتى وزگەرتۋى مۇمكىن. ساراپشىلاردىڭ پىكىرىنشە، ەگەر ءباا شيكىزاتتى بەلسەندىرەك وندىرە باستاسا، بۇل وپەك+ ىقپالىن السىرەتىپ، ۇزاق مەرزىمدى پەرسپەكتيۆادا مۇناي باعاسىنىڭ تومەندەۋىنە اكەلۋى ىقتيمال.