InfoHub Logo

قازاقستانداعى كاسىپكەرلىك سالاسىن دامىتۋدا ماڭىزدى ءرول اتقاراتىن «بايتەرەك» ۇلتتىق باسقارۋشى حولدينگى بيزنەستى قارجىلاي قولداۋدىڭ جاڭا تەتىكتەرىن جاريا ەتتى. حولدينگتىڭ مالىمەتىنشە، كەپىلدىك بەرۋ قۇرالدارى ەندى بۇرىنعىدان دا ءتيىمدى ءارى قولجەتىمدى بولا ءتۇستى. بۇل تۋرالى «بايتەرەك» حولدينگى وتكىزگەن بريفينگتە باسپا ءسوز قىزمەتىنىڭ جەتەكشىسى پەريزات شاكەنوۆا مالىمدەدى.

ونىڭ ايتۋىنشا، جۋىردا «دامۋ» قورىنىڭ نەگىزىندە قۇرىلعان ارنايى كەپىلدىك قورلارى كاسىپكەرلەردىڭ نەسيە الۋداعى نەگىزگى پروبلەمالارىن شەشۋگە باعىتتالعان. ناقتىراق ايتقاندا، كەپىلزات جەتكىلىكسىز بولعان جاعدايدا، بۇل قورلار بانكتەر مەن وزگە دە نەسيە ۇيىمدارى الدىندا كاسىپكەرلەردىڭ نەسيەسى بويىنشا كەپىلدىك بەرەدى.

«بۇل، اسىرەسە، اۋىلدىق جەرلەردەگى كاسىپكەرلەر ءۇشىن وتە ماڭىزدى. سەبەبى ونداعى جىلجىمايتىن مۇلىكتىڭ نارىقتىق قۇنى ءىرى قالالارعا قاراعاندا الدەقايدا تومەن باعالانادى. ناتيجەسىندە نەسيە الۋ مۇمكىندىگى شەكتەلىپ كەلگەن ەدى. ەندى جاڭا كەپىلدىك قورلارىنىڭ ارقاسىندا بۇل ماسەلە شەشىمىن تابۋدا»، – دەدى پەريزات شاكەنوۆا.

ءبىرىنشى كەپىلدىك قورىنىڭ شارتتارى:

• قارجىلاندىرۋ سوماسى – 7 ملرد تەڭگەدەن اسپاۋى كەرەك؛
• كەپىلدىكتىڭ ماكسيمالدى مولشەرى – قارجىلاندىرۋ سوماسىنىڭ 85%-نا دەيىن، ءبىراق 3،5 ملرد تەڭگەدەن اسپاۋى ءتيىس؛
• كەپىلدىك مەرزىمى – نەسيە مەرزىمىنەن 5 ايعا ۇزاق بولۋى مۇمكىن؛
• قۇجاتتار ەكى جۇمىس كۇنى ىشىندە قارالىپ، كەپىلدىك جەدەل تۇردە راسىمدەلەدى؛
• قازىرگى تاڭدا بۇل باعىت بويىنشا 9 بانكپەن كەلىسىم جاسالعان؛
• كوبىنە وڭدەۋ ونەركاسىبىنە ارنالعان جوبالار ماقۇلدانۋدا.

ەكىنشى كەپىلدىك قورىنىڭ شارتتارى:

• قارجىلاندىرۋ سوماسى – 7 ملرد تەڭگەدەن اساتىن ءىرى جوبالار قاراستىرىلادى؛
• كەپىلدىك مولشەرى – جوبانىڭ جالپى قۇنىنىڭ 30%-نا دەيىن؛
• كەپىلدىك مەرزىمى – 15 جىلعا دەيىن ۇزارتىلۋى مۇمكىن؛
• كەپىلدىك بەرۋگە وتىنىمدەر «دامۋ» قورىنىڭ ۋاكىلەتتى ورگاندارىندا جەكە-جەكە قارالادى.

قايدا جۇگىنۋگە بولادى؟

كەپىلدىك الۋ ءۇشىن كاسىپكەرلەر:

• ەكىنشى دەڭگەيلى بانكتەرگە؛
• «بايتەرەك» حولدينگىنىڭ ەنشىلەس ۇيىمدارىنا – قازاقستاننىڭ دامۋ بانكىنە، اگرارلىق نەسيە كورپوراسياسىنا، ونەركاسىپتى دامىتۋ قورىنا نەمەسە Qazaqstan Investment Corporation-گە ءوتىنىش بەرە الادى.

سونداي-اق قوسىمشا اقپاراتتى:

• «دامۋ» قورىنىڭ ايماقتىق فيليالدارىنان؛
• نەمەسە 1408 ءنومىرى بويىنشا Call-ورتالىقتان الۋعا بولادى.

جاڭا كەپىلدىك تەتىكتەرىنىڭ ەنگىزىلۋى اسىرەسە شاعىن جانە ورتا بيزنەس وكىلدەرى ءۇشىن ۇلكەن مۇمكىندىك سانالادى. سەبەبى كاسىپكەرلەردىڭ كوپشىلىگى بانكتەن نەسيە الۋدا كەپىلزات جەتكىلىكسىزدىگىنە بايلانىستى قيىندىقتارعا ءجيى تاپ بولاتىن. ەندى بۇل توسقاۋىل ايتارلىقتاي جەڭىلدەمەك.