InfoHub Logo

قوشتاي ءبىر بايدىڭ جىلقىسىن باعىپ جۇمىسىن ىستەپ جۇرگەندە سول ۇيگە ءبىر قوناق كەلىپتى.

— قوناقتارعا مال اكەل، — دەپتى باي قوشتايعا ءبىر كەزدە:

— مال دەيسىز بە؟ سوندا بۇل كىسىلەرگە قوي اكەلەمىن بە؟ قوزى اكەلەمىن بە؟ تاي اكەلەمىن بە؟ تايىنشا اكەلەمىن بە؟ قايسىسىن ۇناتار ەكەن، ا؟ — دەپ تۇرىپ قالعان ەكەن ول.

— ءتايت، اقىماق، سىي كىسىلەردىڭ الدىندا ادەپسىزدىك ىستەمە! — دەپتى ونىڭ سىرىن بىلەتىن باي زەكىپ.

سونان قوشتاي قورادان ءبىر باعلاندى اكەلىپ باتا تىلەپ، الىپ سوعىپ، تەرىسىن ۇيەكتەپ سىدىرىپتى دا، اشاباقانعا ءىلىپ جىبەرىپ، ۇيەكتى بار كۇشىمەن تارتىپ كەپ قالعاندا اياق جاقتا وتىرعان بالا قوناقتىڭ ۇستىنە بارىپ شالقاسىنان ءتۇسىپتى.

— ءۇي، انتۇرعان، قوزىدان ۇيەك العانى نەسى مۇنىڭ؟ — دەپتى باي.

— مىنا بالا قوناقتىڭ تارتپا ايىلى توزىڭقى ەكەن. سوعان ءبىر مىقتى ايىل ۇرىپ بەرەمىن بە دەپ ەدىم، — دەپتى ول.

ازدان سوڭ مازداپ جانىپ تۇرعان وتقا باس ۇيتە باستايدى.

— ءۇي، وڭباعان، جاي ءۇيت، — دەپتى باي تاعى دا. قوشتاي شىعا جونەلىپتى. ازدان سوڭ كيىز ءۇيدىڭ ەسىگىن شالقاسىنان قايىرىپ جىبەرىپ:

— كەيىن تۇرىڭدار، جول بوساتىڭدار، — دەپ ايعايلاپتى سىرتتان. قاراسا قوشتاي باستى ءوزىن سىرىققا شانشىپ الىپ، اتقا ءمىنىپ الىپ، ەسىك الدىندا تەپەكتەپ تۇر ەكەن دەيدى، ۇيدەگىلەر دۋ كۇلىپ، جىرعاپ قالىپتى.

قوشتاي ۇلكەن قازاننىڭ ەسىك جاق دالداسىندا وتىرىپ، توبىلعىنىڭ سيدامىنان ساداق جاساپ الىپتى دا، اندا-ساندا الگى بالا قوناقتى سىعالاپ كەزەپ-كەزەپ قويادى ەكەن. بالا قوناقتا بۇدان سەسكەنىپ وتىرسا كەرەك. ساداعىن بالانىڭ كوزىنە دالدەپ كەزەپ وتىرعان قوشتاي ءبىر كەزدە «تارس» دەپ ايعايلاپ قالعاندا وقىس شوشىپ، جاسقانىپ قالعان بالا قوناق جۇكتەگى كۇمىس ەردىڭ قاسىنا باسىن سوعىپ الىپتى:

— پاي، پاي، باتىرىڭنىڭ جۇرەكتىسىن-اي، — دەپ قوشەكەڭ قارق-قارق كۇلگەن ەكەن.

---