InfoHub Logo

اقىن سەرىكزات دۇيسەنعازى ءوزىنىڭ YouTube ارناسىنداعى سۇحباتىندا باسىنان وتكەرگەن ەڭ قيىن كەزەڭدەرىن، اسىرەسە ۇلىنان ايىرىلعانداعى جان كۇيزەلىسىن جاسىرماي ايتىپ بەردى. بۇل تۋرالى Stan.kz سايتى Ozgeris.info-عا سىلتەمە جاساپ حابارلايدى.

اقىننىڭ ايتۋىنشا، ۇلىنىڭ قايتىس بولعانىنان كەيىن ول ءبىراز ۋاقىت ەسەڭگىرەپ قالعان. كەيىننەن مارقۇم ۇلىنىڭ جازعان ولەڭدەرىن تاۋىپ العاندا، ونىڭ تاعدىرىن الدىن الا سەزىنگەندەي اسەرگە بولەنگەنىن جەتكىزدى. 15 جاسار ۇلىنىڭ تەرەڭ فيلوسوفيالىق ويلارعا تولى تۋىندىلارى اقىندى قاتتى ويلاندىرعان.

«قايعى – سىناق. قۇداي سىناقتى دا بەكەر بەرمەيدى، ونىڭ فيلوسوفيالىق استارى بار شىعار. كەيىن بالامنىڭ ولەڭدەرىن تاۋىپ الدىم. سول ولەڭدەرىندە ءوزىنىڭ تاعدىرىن سەزگەندەي جازادى. 15 جاسىندا تەرەڭ فيلوسوفيالىق تۋىندىلار جازعان. ويلانىپ قالدىم، بۇل جاي نارسە ەمەس قوي دەپ»، – دەدى سەرىكزات دۇيسەنعازى.

اقىن بۇل اۋىر كەزەڭدە وعان قولداۋ كورسەتكەن اعا بۋىن وكىلدەرىنە العىس ءبىلدىردى. ولار مۇنداي قاسىرەتتى كوتەرە الماي، ومىردەن وزعان جانداردى مىسالعا كەلتىرىپ، اقىندى جۇباتقان.

سەرىكزات دۇيسەنعازى ءۇشىن اناسىنىڭ دۇنيەدەن كەتۋى دە ۇلكەن سوققى بولعان. ول اناسىن «اۋلەتتىڭ بار قايعىسىن وزىمەن بىرگە الىپ كەتكەندەي بولدى» دەپ سيپاتتادى.

سۇحباتتا اقىن ۇلىنىڭ اناسى، جارى اينۇردىڭ بۇل جاعدايدان ءالى كۇنگە دەيىن تولىق شىعا الماي جۇرگەنىن دە ايتىپ ءوتتى.

ايتا كەتەيىك، سەرىكزات دۇيسەنعازىنىڭ ۇلى ءاليحان قايتىس بولعاننان كەيىن 9 اي وتكەن سوڭ ءالىمحان ەسىمدى پەرزەنتى دۇنيەگە كەلگەن. اقىن بۇل ءسابيدىڭ جوسپارلانباعان، كوپتىڭ باتاسىمەن كەلگەنىن اتاپ ءوتتى.