InfoHub Logo

الماتى قالاسى ناۋرىزباي اۋداندىق پوليسيا باسقارماسىنىڭ ۋچاسكەلىك پوليسيا ينسپەكتورى قاناتبەك پارمانوۆ تاعدىر تالكەگىنە ۇشىراعان جالعىز اناعا ۇلكەن كومەك قولىن سوزدى. رەيد كەزىندە كەزدەسكەن روزا داۋرەنوۆا ەسىمدى ايەلدىڭ مۇگەدەك ۇلىنا باسپانا ساتىپ الۋعا پوليسيا قىزمەتكەرى 9 كۇننىڭ ىشىندە 12 ميلليون تەڭگە جيناپ بەردى.

بۇل تۋرالى Infohub.kz اقپارات اگەنتتىگى حابارلايدى.

تاعدىردىڭ تاۋقىمەتىن تارتقان انا

ماقتارال اۋدانىندا تۋعان روزا داۋرەنوۆانىڭ ءومىر جولى قيىندىقتارعا تولى بولدى. اناسى قاتەرلى ىسىككە شالدىعىپ، اكەسىنىڭ كوزى ناشارلاپ كورمەي قالعان. اتا-اناسىنا اۋىرتپالىق سالماعان روزا الماتىعا كەلىپ، مەيىربيكە ماماندىعىن وقۋعا تۇسەدى.

تۇرمىس قۇرعاننان كەيىن ۇزاق جىل بالا سۇيە الماي قينالعان روزا ءتورت رەت جۇكتى بولىپ، ءۇش بالاسىنان ايىرىلادى. جاساندى ۇرىقتاندىرۋ ارقىلى 20 جىلدان سوڭ ۇلدى بولعانىمەن، بالاسى شالا تۋىپ، 3،5 جىل بويى اۋرۋحانادان شىقپايدى.

كۇيەۋى تاستاپ كەتكەن انا

اۋىر جاعدايعا دۋشار بولعان روزانىڭ كۇيەۋى ونى تاستاپ، باسقا ايەلگە كەتىپ قالادى. بالاسىنىڭ شالا تۋىپ، كەيىن سال بولىپ قالۋىنا دارىگەرلەردىڭ قاتەلىگى سەبەپ بولدى دەپ ەسەپتەيتىن انا، تۋىستارىمەن دە ارالاسپايدى. ولار روزانى دەنساۋلىعى ناشار بالانى ارنايى مەكەمەگە وتكىزۋگە ۇگىتتەگەن.

پوليسەيدىڭ جاناشىرلىعى

روزا الماتىدا 80 مىڭ تەڭگەگە پاتەر جالداپ تۇرادى. ۇلىنا الاتىن 74 مىڭ تەڭگە جاردەماقىسى پاتەراقىسىنا دا جەتپەيدى. قىمبات دارى-دارمەكتەردى ساتىپ الۋعا اقشاسى بولماي، قاتتى قينالعان كۇنى ۋچاسكەلىك پوليسيا ينسپەكتورى قاناتبەك پارمانوۆپەن كەزدەسەدى. انانىڭ جاعدايىن ەستىگەن پوليسەي، وعان كومەكتەسۋگە بەل بۋادى.

9 كۇندە جينالعان 12 ميلليون تەڭگە

قاناتبەك پارمانوۆ روزانىڭ جاعدايىن ۆيدەوعا ءتۇسىرىپ، ارىپتەستەرىنە جىبەرەدى. ونىڭ باستاماسىمەن 9 كۇننىڭ ىشىندە حالىقتان 12 ميلليون تەڭگە قاراجات جينالادى. سول اقشاعا شىمكەنتتەن ءبىر بولمەلى پاتەر ساتىپ الىنىپ، انا مەن بالاعا تابىس ەتىلدى.

«ءبىر قيىندىقتىڭ ارتىندا ءبىر قۋانىش بار دەپ بەكەر ايتپاعان عوي. سول پوليسيا قىزمەتكەرى قانات پارمانوۆتىڭ، سوسىن حالىقتىڭ ارقاسىندا باسپانالى بولدىم. قۋانىشىمدا شەك جوق»، - دەيدى روزا داۋرەنوۆا.

پوليسەيدىڭ ءوزى

قاناتبەك پارمانوۆ – ءۇش بالانىڭ اكەسى، ناۋرىزباي اۋداندىق پوليسيا باسقارماسىنىڭ قوعامدىق قاۋىپسىزدىك ءبولىمىنىڭ ۋچاسكەلىك پوليسيا ينسپەكتورى. 20 جىلعا جۋىق ەڭبەك ءوتىلى بار تاجىريبەلى قىزمەتكەر. ارىپتەستەرى ونى قاراپايىم، اقىلدى، سابىرلى ءارى جاناشىر جان رەتىندە سيپاتتايدى.