InfoHub Logo

استانالىق "بارىس" حوككەي كلۋبى قۇرلىقتىق حوككەي ليگاسىنىڭ (قحل) تۇراقتى چەمپيوناتىندا قىتايدىڭ "شانحاي دراكوندارى" كومانداسىن 8:4 ەسەبىمەن جەڭدى. بۇل كەزدەسۋ قحل-دىڭ شىعىس كونفەرەنسياسىندا 10-ورىندا تۇرعان "بارىس" پەن باتىس كونفەرەنسياسىندا 9-ورىنداعى "شانحاي دراكوندارى" اراسىندا قىتايداعى "شانحاي وريەنتال سپورتس سەنتر" ارەناسىندا ءوتتى.

بۇل تۋرالى Infohub.kz اقپارات اگەنتتىگى حابارلايدى.

ماچ بارىسى

ويىننىڭ العاشقى شايباسىن 57ء-شى سەكۋندتا الاڭ يەلەرى، ناقتىراق ايتساق، رايلي ساتتەر سوقتى. الايدا، 4 مينۋتتان كەيىن "بارىس" ەسەپتى تەڭەستىردى. كيريلل لياپۋنوۆتىڭ پاسىنان كەيىن كيريلل ساۆيسكيي شايبانى قاقپاعا ءدال باعىتتادى. ءبىر مينۋت وتپەي جاتىپ، قوناقتار العا شىقتى. كوپشىلىك ويىندا رايلي ۋولش (ماكس ۋيللمان جانە مايك ۆەچچيونەنىڭ پاستارىمەن) مەرگەندىك تانىتتى.

8-مينۋتتا "شانحاي دراكوندارى" ەكىنشى شايباسىن سوعىپ، ەسەپتى تەڭەستىردى. بۇل جولى ادام كلەندەنينگ مەرگەندىك تانىتتى. ال 9-مينۋتتا مايك ۆەچچيونە تاعى دا "بارىستى" العا شىعاردى. وعان رايلي ۋولش پەن مەيسون مورەللي اسسيستەنتتىك ەتتى.

15-مينۋتتا مەيسون مورەللي كومانداسىنىڭ باسىمدىعىن ەكى ەسە ارتتىردى. وعان دميتريي برەۋس پەن اديل بەكەتايەۆ گولدىق پاستاردى بەردى. ءبىرىنشى كەزەڭ اياقتالۋىنا 16 سەكۋند قالعاندا، الاڭ يەلەرى ەسەپتى قىسقارتتى. شايبانى بورنا رەندۋليچ سوقتى.

ەكىنشى كەزەڭدى مايك ۆەچچيونەنىڭ ءدۋبلى باستادى. ونىڭ گولدارىنا دجەيك ماسسي مەن مەيسون مورەللي اسسيستەنتتىك ەتتى. ءۇش مينۋتتان كەيىن سەمون سيمونوۆ ەسەپتى 3:6-عا جەتكىزدى. پاستاردى يان ماككوشەن مەن مايك ۆەچچيونە بەردى. الايدا، ءبىر جارىم مينۋتتان كەيىن ۆلاديمير كۋزنەسوۆ "بارىس" پەن قارسىلاس كوماندا اراسىنداعى الشاقتىقتى ازايتتى.

ءۇشىنشى كەزەڭنىڭ باسىندا ۆسيەۆولود لوگۆين كەزەكتى شايبانى سوقتى. وعان اليحان اسەتوۆ پەن كيريلل پانيۋكوۆ اسسيستەنتتىك ەتتى. ماچتاعى سوڭعى شايبانى مايك ۆەچچيونە سوعىپ، حەت-تريك جاسادى. وعان تايس تومپسون مەن مەيسون مورەللي كومەكتەستى.

ماچتىڭ قورىتىندى ەسەبى – 8:4، "بارىس" كومانداسىنىڭ پايداسىنا شەشىلدى.

بۇل جەڭىستەن كەيىن "بارىس" 47 ۇپاي جيناپ، شىعىس كونفەرەنسياسىندا 10-ورىندا قالا بەردى. كوماندانىڭ كەلەسى كەزدەسۋى 10 ناۋرىزدا حاباروۆسكىلىك "امۋرمەن" سىرت الاڭدا وتەدى.

ال "شانحاي دراكوندارى" 54 ۇپايمەن باتىس كونفەرەنسياسىندا 9-ورىندا كەلەدى.