InfoHub Logo

بايشەشەك - ۇكىلى ءۇمىتتىڭ نىشانى
ەرتە زاماندا جەر بەتىندە قاتال قىس ۇزاق ايالداپ، قاقاعان اياز كەتپەي تۇرىپ الادى. سول زاماندا تاۋ بوكتەرىندە ورنالاسقان جەرتولەدە ءبىر شاعىن وتباسى ءومىر ءسۇرىپتى. وتاعاسى جانۇياسىن اسىراۋ ءۇشىن جۇمىس ىزدەپ جەر دۇنيەنى شارلاپ كەتەدى. ايەلى مەن ەكى پەرزەنتى ونى كۇتۋمەن بولادى. كۇندەردىڭ كۇنىندە قاڭتار ايىنىڭ اياعىندا ۇل بالا قاتتى ناۋقاستانىپ قالادى. ابدەن شاراسى تاۋسىلعان انا ءتاۋىپتىڭ كومەگىنە جۇگىنگەن ەكەن. ءتاۋىپ ايەل ونىڭ كەسەلىنىڭ سەبەبىن انىقتايدى. ول ءسابيدى ەمدەۋ ءۇشىن جاڭا ءوسىپ تۇرعان گۇلدەر مەن جاپىراقتار كەرەك ەكەندىگىن مالىمدەيدى. اناسى مەن باۋىرىنىڭ قايعىسىنا شىداي الماعان اپكەسى ەمشىگە كەرەكتى وسىمدىكتەردى ىزدەپ جولعا شىعادى. قاراسا، اينالانىڭ ءبارى مۇزبەن شىرمالىپ، قالىڭ قارمەن كومكەرىلگەن. بويجەتكەننىڭ بويىن ۇرەي بيلەپ الادى دا، نە ىستەرىن بىلمەي، وتىرا قالىپ، قاتتى جىلايدى دا، قۇدايعا جالبارىنا باستايدى. جۇرەكتەن شىققان ىستىق جاستار قاردى تەسىپ، جەردىڭ تۇبىنە جەتەدى دە، نازىك گۇلدەردى - بايشەشەكتەردى وياتادى. ولار قاردىڭ قالىڭ قاباتىن تەسىپ، وزدەرىنە جول سالىپ، اقىرىندا جەر بەتىنە شىعا كەلەدى. قىزدىڭ جاسى تامعان جەرلەردىڭ ءبارى ادەمى اق گۇلدەرمەن ارلەنەدى. سۇلۋ بويجەتكەن ولاردى تەرىپ الىپ، ۇيىنە الىپ بارادى دا، ءىنىسى امان قالادى. سودان بەرى بايشەشەك - ۇكىلى ءۇمىتتىڭ نىشانى سانالاتىن بولعان ەكەن.