InfoHub Logo

پرەمەر-مينيستر ولجاس بەكتەنوۆ اقمولا وبلىسىنا جۇمىس ساپارى بارىسىندا سۋ تاسقىنىنا قارسى دايىندىق ماسەلەلەرىن تالقىلادى. مەملەكەتتىك ورگاندار باسشىلارى مەن ءبىرقاتار وبلىس اكىمدەرىنىڭ قاتىسۋىمەن وتكەن جەدەل شتاب وتىرىسىندا پرەزيدەنت تاپسىرمالارى اياسىندا تىرشىلىكتى قامتاماسىز ەتۋ نىساندارىنىڭ جۇمىسى، الدىن الۋ جانە جەدەل ارەكەت ەتۋ شارالارى قارالدى.

بۇل تۋرالى Infohub.kz اقپارات اگەنتتىگى حابارلايدى.

وزەن ارنالارى كەڭەيتىلىپ، جاعالاۋلار نىعايتىلدى

ولجاس بەكتەنوۆ كوكشەتاۋداعى قىلشاقتى وزەنىن تەرەڭدەتىپ، ارناسىن كەڭەيتۋ جۇمىستارىمەن تانىستى. 2024 جىلعى تاسقىننان كەيىن «قازسينك» كومپانياسىنىڭ قولداۋىمەن جاعالاۋدى بەكىتىپ، كانالدىڭ وتكىزۋ قابىلەتى سەكۋندىنا 136 تەكشە مەترگە دەيىن ارتتىرىلعان. شاعالالى وزەنىندە دە وسىنداي جۇمىستار جۇرگىزىلىپ، 2025 جىلعى كوكتەمگى كەزەڭدە بۇل شارالاردىڭ تيىمدىلىگى بايقالدى.

اقمولا وبلىسىندا بيىل سۋ تاسقىنىنا قارسى شارالار 163 ەلدى مەكەن مەن 32 جول ۋچاسكەسىن قامتىدى. ۇزىندىعى 56 شاقىرىم بولاتىن بەس وزەن ارناسى تازارتىلىپ، تەرەڭدەتىلدى، 17 گيدروتەحنيكالىق قۇرىلىس قالپىنا كەلتىرىلىپ، كۇشەيتىلدى.

ءقاۋىپتى فاكتورلار مەن اكىمدەرگە قويىلعان تالاپ

پرەمەر-مينيستر جاعدايدى ۋشىقتىرۋى مۇمكىن فاكتورلارعا توقتالدى: قالىڭ قار، كۇزگى جاۋىننان كەيىنگى جەردىڭ قاتىپ قالۋى، توپىراق قاباتىنداعى تەرەڭ توڭ. كەيبىر وڭىرلەردە دايىندىق تولىق اياقتالماعانى، وزەن ارنالارىن تەرەڭدەتۋ مەن جاعالاۋدى بەكىتۋ جۇمىستارىنىڭ سوزىلىپ كەتكەنى، ەلدى مەكەندەردەن قار شىعارۋدىڭ جەتكىلىكسىزدىگى سىنعا الىندى.

ولجاس بەكتەنوۆ اكىمدەرگە «كەز كەلگەن سەنارييگە دايىن بولۋدى» تاپسىرىپ، ءبىر اپتا ىشىندە تاۋەكەلى جوعارى ەلدى مەكەندەردى ارالاپ، ناقتى شارا قابىلداۋدى مىندەتتەدى.

مينيسترلەردىڭ باياندامالارى مەن بولجامدار

2026 جىلعى سۋ تاسقىنى كەزەڭىنە دايىندىق جونىندە ەكولوگيا، سۋ رەسۋرستارى جانە تج مينيسترلەرى بايانداما جاسادى. اقمولا، قاراعاندى، سولتۇستىك قازاقستان وبلىستارىندا سۋ باسۋ ءقاۋپى ساقتالىپ وتىرعانى ايتىلدى.

قازگيدرومەتتىڭ بولجامى بويىنشا، ناۋرىز جانە ءساۋىر ايلارىندا ورتاشا تەمپەراتۋرا نورمادان جوعارى، ال جاۋىن-شاشىن كوپ بولادى دەپ كۇتىلەدى. سۋ باسۋ ءقاۋپى اقمولا، قاراعاندى، سولتۇستىك قازاقستاننان بولەك، شىعىس قازاقستان، اباي، قوستاناي، باتىس قازاقستان، اقتوبە، پاۆلودار، تۇركىستان، الماتى، ۇلىتاۋ جانە جەتىسۋ وبلىستارىندا دا بار. تاۋەكەلى تومەن وڭىرلەر دە اتالدى.

ءتجم-نىڭ دايىندىعى مەن قاۋىپسىزدىك شارالارى

توتەنشە جاعدايلار مينيسترلىگىنىڭ جەدەل شتابى 1 ناۋرىزدان باستاپ تاۋلىك بويى مونيتورينگ جۇرگىزىپ وتىر. ەل بويىنشا سۋ باسۋ ءقاۋپى بار 1242 ەلدى مەكەن انىقتالعان. 39 مىڭنان استام ادام، 18 مىڭنان استام تەحنيكا مەن ارنايى قۇرال دايىن تۇر. وتكەن جىلى 842 بىرلىك ارنايى تەحنيكا، 27 قايىق، 4 ۇشاق جانە باسقا دا جابدىقتار الىنعان. سونداي-اق 830 شاقىرىمنان استام قورعانىس بوگەتتەرى سالىندى، 1128 شاقىرىم درەناج جۇيەلەرى مەن كانالدار جوندەلدى.

پرەمەر-مينيستر ششۋچينسك پەن سەمەيدەگى وقيعالاردى ەسكەرىپ، الدىن الۋ شارالارىن كۇشەيتۋدى تاپسىردى. تج ءمينيسترى سەمەيدەگى ءورتتىڭ تەز توقتاتىلعانىن، ال ششۋچينسكىدەگى جارىلىستىڭ سەبەبى تۇرمىستىق گاز باللوندارىن پايدالانۋ ەرەجەسىنىڭ بۇزىلۋىمەن بايلانىستى ەكەنىن حابارلادى. ءورت قاۋىپسىزدىگىن كۇشەيتۋ، رەيدتەر مەن ءتۇسىندىرۋ جۇمىستارىن جانداندىرۋ تاپسىرىلدى.

جاڭا تەحنولوگيالار مەن ينفراقۇرىلىم

«ءبىرىڭعاي دروندار ينفراقۇرىلىمى» جوباسى تانىستىرىلدى. دروندار سۋ دەڭگەيىن، قورعانىس نىساندارىنىڭ جاي-كۇيىن باقىلاپ، اقپاراتتى جەدەل شتابتارعا جەتكىزۋگە مۇمكىندىك بەرەدى. بۇل جۇيە اقمولا وبلىسىنىڭ اۋدان ورتالىقتارى مەن قالالارىندا ەنگىزىلگەن. دروندار ارقىلى تكش قاۋىپسىزدىگى، سانيتارلىق احۋال، اۋىل شارۋاشىلىعى القاپتارى باقىلانىپ، ءورت، زاڭسىز قوقىس پوليگوندارى سياقتى تاۋەكەلدەردى ەرتەرەك انىقتاۋعا سەپ بولادى.