تاعى دا، تاعى، تاعى دا،
تاعى دا سىنا، بىلگىشىم.
كىرىپ اپ مەنىڭ جانىما،
كىر ىزدەپ تاعى ءجۇرمىسىڭ؟!
ءبىر جىرىم - مەنىڭ ءبىر بالام،
مەزگىلسىز شالا تۋماعان.
مەرزىمى جەتكەن شاعىندا،
شىعام دەپ سىرتقا تۋلاعان.
مەزگىلسىز ولەڭ تۋمايدى،
كوڭىلسىز بولسا، كىم ءبىلسىن.
سىبىزعى دەسەم قۋرايدى،
ونى دا سىنا، بىلگىشىم.
دومالاق جەردىڭ ۇستىندە،
دومالاپ بارا جاتىرمىن.
مۇحيتقا سۇڭگىپ ءتۇستىم دە،
اسپانعا ءبىر-اق اتىلدىم.
ايعا ۇشىپ بارا جاتىرمىن،
مۇنى دا سىنا، اقىلدىم،
ايتەۋىر مەنى قاتىرعىن
تۋىن جىق تۇعىر اقىننىڭ!!!
ساحارا مىنا جەرىمە،
ساعىمنان كويلەك كيگىزدىم.
ساندالىپ جۇرگەن بورىگە،
سارى اتانىمدى بۇرگىزدىم.
جۇلدىزىن مىناۋ اسپاننىڭ،
جەردە تۇرىپ-اق باسقاردىم.
مامىق ەتتىم دە تاستاردى،
تاۋىمدى باسقا جاستاندىم.
جوتاما قالا ورناتىپ،
بويىما سىيماي ءجۇر كۇشىم.
...تۇعىر اقىندى سورلاتىپ،
مۇنى دا سىنا، بىلگىشىم.
وسىلاي ءومىر سۇرەمىن،
وسىلاي ءجۇرىپ كۇن كەشەم!
دۇنيەنىڭ مىنا جۇرەگىن،
اقىننان سۇرا، بىلمەسەڭ!!!
جىرىم كوپ ءالى مەنىڭ جازىلماعان.
كەنىم كوپ ءالى مەنىڭ قازىلماعان.
قالدىرىپ بولار-بولماس قازىنامدى،
نەلىكتەن ءبىر كۇنى مەن جازىم بولام؟!
قۋالاپ تىرشىلىكتىڭ كوبەلەگىن،
قاپ قويدى قاپەلىمدە كوپ ولەڭىم.
جالعىزىم، جانىم مەنىڭ - جىرىم مەنىڭ،
قالدىرىپ سەنى ارتىما نەگە ولەمىن.
جازايىن، جالىقپايىن، جاسىرمايىن،
قاشان قالعىپ كەتكەنشە باسىلمايىن.
ايا دەپ اجالعا مەن باس ۇرمايىن،
شوق شايناپ، وت بۇرىككەن قاسىمدايىن

---