ءبىلىم مەن عىلىمنىڭ اسقارى - قازۇۋ
ءان مەن جىردىڭ بەسىگى سانالاتىن كيەلى جاڭاارقا ءوڭىرىنىڭ دارابوز دارىندار مەن تولاعاي تالانتتاردىڭ باسىن قوسقان مەرەيلى مەكەن ەكەنى بارشاعا ءمالىم. جاڭاارقا- بۇل سارىارقانىڭ ساڭلاعى بولعان ساكەندەي سەرىنىڭ، ودان كەيىنگى ارقانىڭ اياۋلى انشىلەرى ي.وماروۆ، ق.بايبوسىنوۆتاردىڭ، قازاقتىڭ دارا پەرزەنتتەرى، كورنەكتى عالىمدار س.قيرابايەۆ پەن ا.سەيدىمبەكتىڭ، ەلىم دەپ ەلجىرەگەن دارا تۇلعا ب.تىلەۋحانوۆتىڭ، الاشتىڭ اردا اقىنى ع. جايلىبايدىڭ، سول ءتارىزدى جۇزدەگەن ءتولتۋما تۇلعالاردىڭ تۋعان جەرى.
كەلگەندە قولدايتىن ۋاقىتى،
رۋحتار – بۇل جەردىڭ يەسى.
ۇلىنىڭ بار بىلەم باقىتى –
قۇمىنىڭ بار بىلەم كيەسى،- دەپ، «الاش» ادەبي سىيلىعىنىڭ لاۋرەاتى، اقىن ع.جايلىباي جىرلاعانداي، وسىنداي قاستەرلى دە قاسيەتتى ولكەدەن ءنار العان ۇل- قىزداردىڭ دا ونەر –بىلىمنەن الشاق بولۋى، استە، مۇمكىن ەمەس. مىنە، وسىناۋ دانا دا دارا جانداردىڭ ءىزى قالعان جاڭاارقانىڭ تۇلەگى رەتىندە، مەن دە، بابالار سالعان سارا جولمەن ءجۇرىپ، ەلىنە پايداسى تيەتىن سانالى، ءبىلىمدى ازامات بولۋدى پەرزەنتتىك بورىشىم دەپ سانايمىن. ال، وسى يگى ماقسات جولىنداعى العاشقى قادامىم ارمان قالا الماتىداعى قازاق ۇلتتىق ۋنيۆەرسيتەتىنە وقۋعا ءتۇسۋىم دەپ بىلەمىن. سانجىلدىق تاريحى بار، حالقىمىزدىڭ قاستەرلى تۇلعالارى ءبىلىم العان قاسيەتتى قاراشاڭىراق - ءال- فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى اتانۋىم مەن ءۇشىن زور جەتىستىك ءارى ۇلكەن ابىروي بولدى. بۇل وقۋ ورنىنا ءتۇسۋدى وقۋشى كۇنىمنەن ارمانداعان ەدىم. سول سەبەپتى دە ءوزىم ءبىلىم الىپ جاتقان وسىناۋ قۇتتى مەكەن جايىندا قىسقاشا ايتىپ ءوتۋدى ءجون كوردىم.
مەن سياقتى مىڭداعان جاستاردىڭ ارمانىنا اينالعان بۇل وقۋ ورنى- بۇگىنگى تاڭدا قازاقستانداعى عانا ەمەس، سونىمەن بىرگە، ورتالىق ازياداعى جەتەكشى ۋنيۆەرسيتەتتەردىڭ ءبىرى دە بىرەگەيى. قازاق ۇلتتىق ۋنيۆەرسيتەتى- رەسپۋبليكاداعى بارلىق جوعارى ءبىلىم بەرۋ جۇيەسىنىڭ تىرەگى جانە بىلىكتى ماماندار مەن ءبىلىمدى ستۋدەنتتەردىڭ ورداسى. 1934 جىلى ىرگەسى قالانعان ءبىلىم ورداسى كۇننەن- كۇنگە الەمدىك ءبىلىم بەرۋ جۇيەسىندە وزىندىك ورنىن ايقىنداپ كەلەدى. ونىڭ دالەلى رەتىندە، بەلگىلى QS World University Ranking حالىقارالىق رەيتينگ اگەنتتىگىنىڭ 2017 جىلى جاريالاعان زەرتتەۋ قورىتىندىسىنا سايكەس، ءال-فارابي اتىنداعى قازاق ۇلتتىق ۋنيۆەرسيتەتى الەمدەگى ۇزدىك 800 ۋنيۆەرسيتەت اراسىندا 236-ورىندى يەمدەنىپ، ەڭ ۇزدىك 250 ۋنيۆەرسيتەت قاتارىنان تاعى دا كورىندى.
جالپى دامۋ باعىتى حالىقارالىق ءبىلىم بەرۋ ستاندارتى بويىنشا قابىلدانعان ۋنيۆەرسيتەت بىلىكتى مامانداردى دايارلاۋعا، وندىرىسكە ەنگىزىلەتىن ىرگەلى جانە قولدانبالى زەرتتەۋلەردى دامىتۋعا باعىتتالعان كەڭ كولەمدەگى عىلىم، ءبىلىم، رۋحاني-تاربيەلىلىك، يننوۆاسيالىق جانە ءوندىرۋشى نەگىزىنە يە. بۇل وقۋ ورنى ەرتەڭگى ەل تىرەگى جاس ۇرپاقتى مايتالمان مامان رەتىندە عانا ەمەس، قوعامدا وزىندىك ورنىن تابا بىلەتىن سانالى ازامات ەتىپ قالىپتاستىرۋدا دا ايرىقشا ءرول اتقارىپ وتىر. ۋنيۆەرسيتەتتە جاستاردىڭ جارقىن بولاشاعى ءۇشىن بارلىق جاعداي جاسالعان. اتاپ ايتساق، ەلىمىزدەگى ەڭ ءىرى كىتاپحانالاردىڭ ءبىرى- ءال-فارابي كىتاپحاناسى، ينتەرنەت ورتالىعى، «كەرەمەت» ستۋدەنتتەرگە قىزمەت كورسەتۋ ورتالىعى، ءو.جولداسبەكوۆ اتىنداعى ستۋدەنتتەر سارايى – ءبارى دە ءبىلىم الۋشى ستۋدەنتتەردىڭ يگىلىگى ءۇشىن ەرەكشە ورىندار بولىپ سانالادى. سونىمەن بىرگە، ۋنيۆەرسيتەت قۇرامىندا 20 عىلىمي-زەرتتەۋ ينستيتۋتى، 14 فاكۋلتەتتىڭ قۇرامىنداعى 98 كافەدرا جانە تەحنوپارك جۇمىس ىستەيدى. وسىنىڭ ءبارى وقۋ ورداسىنىڭ مەرەيىن ودان ءارى اسقاقتاتا تۇسەتىنى ءسوزسىز.
باسقا فاكۋلتەتتەردى بىلاي قويعاندا، ءوزىم وقىپ جاتقان فيلولوگيا جانە الەم تىلدەرى فاكۋلتەتىنىڭ وزىندە حالقىمىزدىڭ قانشاما زيالىلارى، اقىن- جازۋشىلار، كورنەكتى مەملەكەت قايراتكەرلەرى ءبىلىم العان. سونىڭ ىشىندە، زەينوللا قابدولوۆ، ءابىش كەكىلبايەۆ، مۇحتار ماعاۋين، دۋلات يسابەكوۆ، قادىر مىرزا ءالى، تۇمانباي مولداعالييەۆ، ءجۇرسىن ەرمان، ولجاس سۇلەيمەنوۆ سەكىلدى دارا تۇلعالاردى ايرىقشا اتاپ وتكەن ءجون.
ءبىر سوزبەن ايتقاندا، وسىندا ءبىلىم الىپ جاتقان بارشا جاستاردىڭ جارقىن بولاشاعىنا جول سىلتەگەن قازۇۋ-دىڭ ستۋدەنتى ەكەنىمدى ايرىقشا ماقتان تۇتامىن. بۇل ماقتانىشىمدى ءارى وعان دەگەن قۇرمەتىمدى ءوزىمنىڭ شاعىن عانا ولەڭ شۋماقتارىممەن جەتكىزسەم دەيمىن.
قۇت مەكەن جالىنداعان جاستار ءۇشىن،
ءبىلىم مەنەن عىلىمنىڭ اسقارىسىڭ
جول سالعان الىستاعى ارماندارعا
سەن مەنىڭ باقىتىمنىڭ باستاۋىسىڭ!
ۇياڭنان ۇشىردىڭ عوي سان دارانى
ءوزىڭسىڭ تالايلاردىڭ ءارمان-انى
قازاقتىڭ قاسيەتتى شاڭىراعى
الەمگە كەتەر اتىڭ سامعاپ ءالى
س.يگىلىك، ءال- فارابي اتىنداعى قازۇۋ
فيلولوگيا جانە الەم تىلدەرى فاكۋلتەتىنىڭ
4-كۋرس ستۋدەنتى وسپانوۆا گ، ءال- فارابي اتىنداعى قازۇۋ اعا وقىتۋشىسى
You Might Also Like
-
Aحمەت بايتۇرسىن ۇلىنىڭ ەسىمى بارشا وقىرمان قاۋىمعا تانىس بولعانىمەن، ونىڭ ءومىرى، اعارتۋشىلىق جول تۋرالى كەي دەرەكتەردى بىلە بەرمەۋى مۇمكىن. ستۋدەنتتىك ۋاقىتىمىزدىڭ سوڭعى جىلىندا ۋنيۆەرسيتەت تاراپىنا...
-
ءتىلىمىزدىڭ قىمباتتىعىنا قايران قالاسىڭ؛ ءار دىبىسى - سىيلىق؛ ءبارى ءداندى، ءىنجۋدىڭ وزىندەي ءىرى، راسىندا دا ءقايسىبىر اتاۋلار سول زاتتىڭ وزىنەن دە قىمبات، باعالى.
