ءبىلىم ساپاسىن انىقتايتىن PISA تەستىنىڭ ناتيجەسى جاريالاندى
PISA-2018 ناتيجەلەرى رەسمي تۇردە جاريالاندى.
«بۇل زەرتتەۋ 15 جاستاعى ءبىلىم الۋشىلاردىڭ وقۋ، ماتەماتيكالىق جانە جاراتىلىستانۋ عىلىمى ساۋاتى بويىنشا داعدىلارىن باعالايدى. وسى باعىتتاردىڭ بىرەۋى ءار 3 جىل سايىن نەگىزگى باعىت سانالادى. بۇل بەرىلگەن سۇراقتاردىڭ جارتىسىنا جۋىعى بەلگىلى ءبىر باعىت بويىنشا باسىم بولاتىنىن بىلدىرەدى. PISA-2018-دە PISA-2009-داعىداي وقۋ ساۋاتتىلىعى باسىم باعىت بولدى. PISA تەستى وقۋشىلاردىڭ اكادەميالىق بىلىمدەرىن انىقتاۋعا ەمەس، فۋنكسيونالدىق ساۋاتتىلىقتارىن انىقتاۋعا، ياعني، العان بىلىمدەرىن قولدانا بىلۋگە، تالداۋعا، سىني ويلاۋعا باعىتتالعان»، — دەپ جازدى اسحات ايماعامبەتوۆ Facebook پاراقشاسىندا.
سونىمەن، قازاقستاننىڭ ناتيجەلەرىنە كەلسەك، ەلدىڭ PISA-2018-دەگى وقۋ ساۋاتى بويىنشا ورتاشا بالى — 387، ماتەماتيكادان — 423 بالل جانە جاراتىلىستانۋ عىلىمى بويىنشا — 397 بالل.
«بۇل ءوزىمىز كۇتكەن كورسەتكىشتەر ەكەنىن بىردەن مالىمدەيمىن جانە ولار ەىدۇ بويىنشا ورتاشا بالدان تومەن (ەىدۇ بويىنشا وقۋ — 487، ماتەماتيكا — 489 جانە جاراتىلىستانۋ — 489). ءبىزدىڭ PISA-2009 جانە 2012-دەگى ناتيجەلەرىمىزبەن سالىستىرعاندا تومەندەۋ بايقالادى. ناتيجەلەرىمىز PISA-2009-داعىدان وقۋ جانە جاراتىلىستانۋ بويىنشا 3 بالعا تومەندەسە، ماتەماتيكادان، ايتارلىقتاي، 18 بالعا جاقسارعان. سوڭعى رەت وقۋ ساۋاتتىلىعى PISA-2009-دا نەگىزگى باسىم باعىت بولعاندىقتان، سالىستىرۋدى وسى زەرتتەۋ سيكلىمەن جۇرگىزەمىز. بالالارىمىزدىڭ ناتيجەسى تومەندىگىنە قاراماستان اسىعىس قورىتىندى جاساماۋعا شاقىرامىن، سەبەبى، بۇل ناتيجەلەردىڭ ارتىندا بىرنەشە فاكتور تۇر»، — دەيدى مينيستر.
بىرىنشىدەن، تەست قازاقستان ءۇشىن العاش رەت كومپيۋتەرلىك فورماتتا ءوتتى. ءبىزدىڭ بالالار ءۇشىن بۇل - العاشقى تاجىريبە. تەستتە وتكەن سۇراقتارعا كەرى قايتۋ مۇمكىندىگى بولماعانىن دا ەسكەرگەن ءجون. قالىپتاسقان ادەت بويىنشا وقۋشىلار قيىن سۇراقتارعا قايتا ورالۋعا نەمەسە ءوز جاۋاپتارىن قايتا قاراۋعا ۇيرەنگەن. مۇندا قاعازداعى نۇسقامەن سالىستىرعاندا، ولاي جاساي المايدى. ەگەر PISA-2015ء-تىڭ ناتيجەلەرىنە قاراساق، وندا 57 قاتىسۋشى ەل العاش رەت كومپيۋتەردە تەست تاپسىرىپ، ناتيجەسىندە كوپتەگەن ەلدىڭ بالى تومەندەگەنىن كورۋگە بولادى. مىسالى، PISA زەرتتەۋى كوشباسشىلارىنىڭ ءبىرى كورەيانىڭ ناتيجەلەرى ماتەماتيكا بويىنشا 30، جاراتىلىستانۋ بويىنشا 22 جانە وقۋدان 18 بالعا تومەندەگەن.
«ەكىنشىدەن، PISA-داعى ناتيجەلەردى جاقسارتا الاتىن ءبىزدىڭ ءبىلىم بەرۋ جۇيەسىندەگى وزگەرىستەر 15 جاستاعى ءبىلىم الۋشىلارعا ءالى دە اسەرىن تيگىزبەدى (2002 جىلعى بالالار). ويتكەنى، PISA-2018 قاتىسۋشىلارى — جاڭارتىلعان ءبىلىم بەرۋ مازمۇنىنا كوشپەگەندەر. جاڭارتىلعان باعدارلامالاردىڭ اسەرىن ءبىز PISA-2021-دەن باستاپ كورە الامىز، ال ەڭ دۇرىسى — PISA-2024. وسى ۋاقىت ارالىعىندا PISA-2024 تاپسىراتىن ءبىلىم الۋشىلار جاڭارتىلعان ءبىلىم مازمۇن بويىنشا 7-8 جىل وقىپ ۇلگەرەدى. ۇشىنشىدەن، زەرتتەۋگە قاتىسقان قازاقستاندىقتاردىڭ نەگىزگى بولىگىن 9 (44%) جانە 10-سىنىپ (53،4%) وقۋشىلارى قۇرادى. باسقا ەلدەردە مەكتەپكە قابىلداۋ جاسى ناقتى بەكىتىلگەندىكتەن، تيىسىنشە، PISA قاتىسۋشىلارىنىڭ كوپشىلىگى ءبىر پاراللەلدەن بولدى. مىسالى، جاپونيا (100%) جانە سينگاپۋر (90%) ەلدەرىنەن قاتىسۋشىلار - 10-سىنىپ وقۋشىلارى. تورتىنشىدەن، نزم ناتيجەلەرى ءبىلىم بەرۋ باعدارلامالارىنىڭ تيىمدىلىگىن كورسەتتى. نزم وقۋشىلارىنىڭ ناتيجەلەرى وقۋ ساۋاتتىلىعىنان 511 بالدى، ماتەماتيكادان 554 جانە جاراتىلىستانۋدان 526 بالدى قۇرادى. ولاردىڭ كورسەتكىشتەرى PISA-2018-دەگى كوشباسشى ەلدەردىڭ ناتيجەلەرىنە سايكەس»، - دەپ جازادى ءبىلىم ۆەدومستۆوسىنىڭ باسشىسى.
بۇل — PISA-2018 قورىتىندىسى بويىنشا الىنعان ۇلكەن تالداۋ ماتەريالىنىڭ ءبىر بولىگى عانا. ءمينيستردىڭ سوزىنشە، قويىلعان مىندەتتەردى شەشۋ ءۇشىن قازىردەن باستاپ كەشەندى تاسىلدەردى قاراستىرىپ، سانالى تۇردە قاتىسۋ قاجەت. دەرەكتەرگە نەگىزدەلگەن ءتۇيىندى قورىتىندىلار تولىق تالداۋدان كەيىن عانا جاسالادى. ناتيجەلەر «مەكتەپتەگى بىلىمگە وزگەرىستەر قاجەت پە؟» دەگەن سۇراققا تاعى ءبىر مارتە وڭ جاۋاپ بەردى.
كەلەسى زەرتتەۋ 2016 جىلدان باستاپ ەنگىزىلگەن وقۋ باعدارلامالارىن جاڭارتۋ بويىنشا تاڭدالعان ستراتەگيا ءتيىمدى مە دەگەن سۇراققا جاۋاپ بەرە الادى.
You Might Also Like
-
قوجاناسىردىڭ ءبىر كىسىدە الاشاق بەس تەڭگەسى بار ەكەن. ەكى جىلعا تولعاندا، الاشاعى ەسىنە ءتۇسىپ، بەرگەن كىسىسىنەن اقشاسىن الىپتى دا، قارىزعا بەس تەڭگە قوسىپ الىپتى. ءبىراق ول كىسى بەس تەڭگەنى قارىزعا ب...
-
قوجاناسىر ءبىر ساراڭ بايعا جالداندى. ەكى، ءۇش، تىپتەن ءتورت، بەس ايعا دەيىن ەڭبەكاقىسىن الا المادى. ەندى مۇلدە كەتپەكشى بولىپ اقىسىن سۇراپ ەدى، ساراڭ باي:
