InfoHub Logo

قازاقستان رەسپۋبليكاسى پرەزيدەنتىنىڭ جارلىعىمەن ادام قۇقىقتارى جونىندەگى كوميسسيانىڭ جاڭا قۇرامى بەكىتىلدى. بۇل قۇرامعا قۋاندىق بيشىمبايەۆ ءىسى بويىنشا جابىرلەنۋشى تاراپتى قورعاعان ادۆوكات يگور ۆرانچيەۆ تە كىردى.

بۇل تۋرالى Infohub.kz اقپارات اگەنتتىگى حابارلايدى.

جارلىققا سايكەس، كوميسسيانىڭ ءتوراعاسى بولىپ سەنات ءتوراعاسىنىڭ ورىنباسارى جاقىپ اسانوۆ تاعايىندالدى. ال ونىڭ ورىنباسارلارى رەتىندە رەسپۋبليكالىق ادۆوكاتتار القاسىنىڭ مۇشەسى، ادۆوكات ايدىن بيكەبايەۆ پەن اباي اتىنداعى قازۇپۋ-دىڭ سوربوننا-قازاقستان ينستيتۋتىنىڭ ديرەكتورى ايگۇل سابيتوۆا بەكىتىلدى.

كوميسسيانىڭ جاڭا قۇرامىنا مەملەكەتتىك ورگانداردىڭ وكىلدەرى دە ەندى. ولاردىڭ قاتارىندا باس پروكۋرور، پرەمەر-مينيستردىڭ ورىنباسارى – مادەنيەت جانە اقپارات ءمينيسترى، جوعارعى سوت كەڭەسىنىڭ ءتوراعاسى، ىشكى ىستەر، سىرتقى ىستەر، ادىلەت، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ، عىلىم جانە جوعارى ءبىلىم مينيسترلەرى بار.

سونىمەن قاتار، كوميسسيادا ادام قۇقىقتارى جونىندەگى ۋاكىلدەر، بالا قۇقىقتارى جونىندەگى ۋاكىل، الەۋمەتتىك وسال توپتاردى قورعاۋ جونىندەگى ۋاكىل، كاسىپكەرلىك قۇقىقتارىن قورعاۋ جونىندەگى ۋاكىل، وتباسى ماسەلەلەرى جونىندەگى ۋاكىل، سونداي-اق ۇلتتىق قاۋىپسىزدىك كوميتەتى ءتوراعاسىنىڭ ورىنباسارى دا ءوز ورىندارىن الدى.

جاڭا قۇرامعا دەپۋتاتتار، ادۆوكاتتار، قوعامدىق ۇيىمداردىڭ، اكادەميالىق ورتانىڭ، كاسىپوداقتاردىڭ، ءدىني بىرلەستىكتەر مەن قۇقىق قورعاۋشىلاردىڭ وكىلدەرى دە كىردى. ولاردىڭ اراسىندا سەنات دەپۋتاتى جاننا اسانوۆا، سوتتار كەڭەسىنىڭ ءتوراعاسى دوسجان ءامىر، داعدارىس ورتالىقتارى وداعىنىڭ باسشىسى ءزۇلفيا بايساقوۆا، ءماجىلىس دەپۋتاتى نۇرسۇلتان بايتيلەسوۆ، حالىقارالىق كوشى-قون ۇيىمىنىڭ وكىلى سۆەتلانا بەكمامبەتوۆا، «MEDIALIFE» قورىنىڭ پرەزيدەنتى ولگا ۆولكوۆا، ادۆوكاتتار ۆيتاليي ۆورونوۆ، يگور ۆرانچيەۆ، دانيار كانافين جانە يرينا وسوكينا بار.

كوميسسياعا سونداي-اق ە.ا. بوكەتوۆ اتىنداعى قاراعاندى ۋنيۆەرسيتەتىنىڭ رەكتورى نۇرلان دۋلاتبەكوۆ، ءماجىلىس دەپۋتاتتارى دانيا ەسپايەۆا مەن ءۇنزيلا شاپاق، ل.ن. گۋميليەۆ اتىنداعى ەۇۋ پروفەسسورى سۆەتلانا جاركەنوۆا، جۋرناليست ەرقانات كوپجاسار ۇلى، «Civic peace» قب ءتوراعاسى رۋسلان قاسكەنوۆ، استانا جانە قازاقستان ءميتروپوليتى الەكساندر موگيليەۆ، كونستيتۋسيالىق سوت سۋدياسى قانات مۋسين، «قازاقستاننىڭ ازاماتتىق اليانسى» پرەزيدەنتى بانۋ نۇرعازييەۆا، كاسىپوداقتار فەدەراسياسى ءتوراعاسىنىڭ ورىنباسارى ءبىرجان نۇرىمبەتوۆ، باس ءمۇفتي ناۋرىزباي ءوتپىروۆ، ق.س. ناريكبايەۆ اتىنداعى قازگزۋ وكىلى سەرگەي پەن، ادام قۇقىقتارى جونىندەگى ساراپشى ايسانا سمان، قازاقستان ەكولوگيالىق ۇيىمدارى قاۋىمداستىعىنىڭ باسشىسى ايگۇل سولوۆيەۆا، «ادام قۇقىقتارى ءۇشىن حارتيا» قورىنىڭ ديرەكتورى جەڭىس تۇرماعامبەتوۆا جانە «سانا سەزىم» ايەلدەر باستامالارى قۇقىقتىق ورتالىعىنىڭ ديرەكتورى شاحنوزا حاسانوۆا كىردى.

پرەزيدەنت جانىنداعى ادام قۇقىقتارى جونىندەگى كوميسسيا — بۇل ادام مەن ازاماتتىڭ قۇقىقتارى مەن بوستاندىقتارىن قورعاۋ ماسەلەلەرىمەن اينالىساتىن كونسۋلتاتيۆتىك-كەڭەسشى ورگان بولىپ تابىلادى.