InfoHub Logo

قازاقستاندىق تانىمال انشىلەر جانبولات پەن جازيرانىڭ ۇلى قازبەك دۋبايداعى سوڭعى ساپارى كەزىندە باستان وتكەرگەن كۇتپەگەن وقيعالار تۋرالى الەۋمەتتىك جەلىدە ءبولىستى. ونىڭ ايتۋىنشا، دەمالىس كەزىندە ءقاۋىپتى جاعدايعا تاپ بولىپ، كەيىن ەلگە ورالۋ جولىندا دا قيىندىقتارعا تاپ بولعان.

بۇل تۋرالى Infohub.kz اقپارات اگەنتتىگى حابارلايدى.

قازبەك دۋبايدا جۇرگەندە قالاعا راكەتالار ۇشىرىلعانىن ايتىپ بەردى. ول «بۋرج حاليفانىڭ ساۋ كەزىندە ءتۇسىرىپ الايىن» دەپ ساقتاعان قىسقا كادر تۋرالى ايتا كەلىپ، ءبىر ساعاتتان سوڭ وزدەرى تۇرعان ءۇيدىڭ ارتىنداعى قوناقۇيگە راكەتا تۇسكەنىن جەتكىزدى. سول كەزدە ولار ۇيدە بولۋى كەرەك ەدى، ءبىراق دوستارىمەن كەزدەسۋگە شىعىپ كەتكەن. وسىدان كەيىن جارىلىستار بىرىنەن سوڭ ءبىرى بولىپ، ولار زاتتارىن الماي، تەك كيىمدەرىمەن قازاق دوستارىنىڭ ۇيىنە بارىپ، ءۇش كۇن بويى سول جەردە جاسىرىنعان.

سترەسسكە تولى ءۇش كۇن

قازبەكتىڭ ايتۋىنشا، بۇل ءۇش كۇن وتباسى ءۇشىن وتە سترەسستى بولعان. كوز الدىندا راكەتالار جارىلىپ، جەرگە ءتۇسىپ جاتقاندا، ساعات سايىن اسپاننان دىبىستار ەستىلىپ وتىرعان. تويعا دەيىن ازۋى كەرەك ەدى دەگەن ويلارى، ۋايىممەن ازىپ كەتۋگە اكەلگەن. مۇنداي ساتتە دۇرىس شەشىم قابىلداۋدىڭ قيىندىعىن دا اتاپ ءوتتى.

قاۋىپسىزدىك ىزدەگەن وتباسى

وتباسى ءقاۋىپسىز جەرگە كەتۋدىڭ بىرنەشە نۇسقاسىن قاراستىرعان: تىنىش ومانعا بارۋ، جاعدايدىڭ تىنىشتالۋىن كۇتۋ، دۋبايدان ۇشاقپەن كەتۋ نەمەسە مەملەكەتتەن كومەك كۇتۋ. اقىرى ولار ومانعا بارۋدى ءجون كورگەن.

ومانداعى قيىندىقتار مەن ەلگە ورالۋ

ومانعا جەتكەنىمەن، ءقوناقۇي اينالاسىنداعى جوندەۋ جۇمىستارى مەن شۋدان دا شوشىنىپ جۇرگەندەرىن ايتتى. ودان كەيىن ەلگە قايتۋ دا وڭاي بولماعان. اەروپورتتا ادامدار كوپ، ءبىر اپتا بويى بيلەت تابا الماي جۇرگەندەر دە بولعان. وتباسىنا جەتكىلىكتى بيلەتتىڭ بولماۋى نەمەسە باعاسىنىڭ تىم قىمباتتىعى دا قيىندىق تۋدىرعان. مىسالى، يندياعا ءبىر بيلەت 500 مىڭ تەڭگەگە باعالانسا، تايلاندقا 1 ميلليون تەڭگەدەن باستالعان. ءبىراق ولار 7 ادام بولعاندىقتان، تەك 1-2 بيلەت تابۋ مۇمكىن بولعان. اقىرى، ءبىر كۇندە ءۇش رەت ۇشاق اۋىستىرىپ، ەلگە امان-ەسەن جەتكەن.

قازبەك بۇل ساپاردان كەيىن ءارقايسىسىنىڭ ومىرگە دەگەن كوزقاراسى وزگەرگەنىن ايتتى. اناسى وزىنە قاراۋدى، ءومىردىڭ راحاتىن كورۋدى ويلاسا، ءوزى قىمبات بيلەتتەردەن كەيىن Flyarystan-نىڭ ارزان بيلەتتەرىن ىزدەيتىنىن ايتىپ، ازىلدەدى.

ءقازىر قازبەك پەن وتباسى ەلگە ورالىپ، جاعدايدىڭ جاقسى ەكەنىن ايتتى. ول اتا-اناسىنىڭ كوڭىل-كۇيى مەن ولاردى ەلگە تەز جەتكىزۋ تۋرالى ۋايىمداعانىن دا قوستى.