InfoHub Logo

Bloomberg اگەنتتىگىنىڭ مالىمەتىنشە، قازاقستاندىق قۇرىلىس سالاسىنىڭ ءىرى وكىلدەرى — شاحمۇرات ءمۇتالىپ پەن نۇرلان ارتىقبايەۆ ەلىمىزدىڭ ستراتەگيالىق نىساندارىنان ۇلەس الۋدى كوزدەپ وتىر. اڭگىمە تاۋ-كەن سالاسىنىڭ الپاۋىتتارى "كازسينك" پەن "قازاقمىس" كورپوراسيالارى جايلى.

بەدەلدى باسىلىمنىڭ ينسايدەرلىك دەرەككوزدەرىنە سۇيەنسەك، Integra Construction KZ كومپانياسىنىڭ يەسى شاحمۇرات ءمۇتالىپ Glencore حالىقارالىق ترەيدەرىنەن "كازسينكتىڭ" 70% ۇلەسىن ساتىپ الۋ بويىنشا كەلىسسوز جۇرگىزۋدە.

ال Qazaq Stroy قۇرىلتايشىسى نۇرلان ارتىقبايەۆ "قازاقمىس" كورپوراسياسىن ءوز قولىنا الۋى مۇمكىن دەگەن بولجام ايتىلدى.

الايدا، Bloomberg دەرەككوزدەرى ازىرگە ناقتى كەلىسىم جوق ەكەنىن ەسكەرتەدى. باعا مەن تولەم شارتتارى ءالى تولىق بەكىتىلمەگەن، سوندىقتان مامىلە سوڭعى ساتتە جۇزەگە اسپاي قالۋى دا عاجاپ ەمەس.

جاڭا "قوجايىندار" كىمدەر؟

بۇگىندە "قازاقمىس" توبىنىڭ نەگىزگى باقىلاۋشىسى — ۆلاديمير كيم (70% ۇلەس). ول Forbes تىزىمىندە قازاقستاننىڭ ەڭ باي ادامدارىنىڭ ۇشتىگىنە كىرەدى، بايلىعى 5،7 ملرد دوللارعا باعالانعان. قالعان 30% ۇلەس ەدۋارد وگايعا تيەسىلى.

ال "كازسينكتىڭ" نەگىزگى يەسى — شۆەيساريالىق Glencore (69،74%). قالعان 29،82%-ى مەملەكەتتىك "تاۋ-كەن سامۇرىق" كومپانياسىنىڭ ەنشىسىندە.

ەندى ساحناعا شىققان جاڭا ەسىمدەرگە توقتالساق:

• نۇرلان ارتىقبايەۆ — Qazaq Stroy قۇرىلىس كومپانياسىنىڭ نەگىزىن قالاۋشى. بايلىعى 228 ملن دوللارعا باعالانىپ، ەلىمىزدىڭ ەڭ باي 50 بيزنەسمەنىنىڭ قاتارىنا كىرەدى. ول جاقىندا عانا "اقتوبە" فۋتبول كلۋبىنىڭ ينۆەستورى اتاندى جانە "قازاقتەلەكوم" اكسيالارىنىڭ ءبىر بولىگىنە يەلىك ەتەدى.

• شاحمۇرات ءمۇتالىپ — Integra Construction KZ يەسى. بۇل كومپانيا تەمىرجول جانە اۆتوجول قۇرىلىسىمەن، ءىرى ينفراقۇرىلىمدىق جوبالارمەن اينالىسادى.

تاراپتار نە دەيدى؟

وتاندىق ب ا ق وكىلدەرى اتالعان كومپانيالارعا رەسمي ساۋال جولداعان. Qazaq Stroy كومپانياسى بۇل اقپاراتقا قاتىستى شۇعىل جاۋاپ بەردى.

«قازىرگى كەزەڭدە ءبىز قانداي دا ءبىر كەلىسىمدەردىڭ بار-جوعىن راستاي دا، جوققا شىعارا دا المايمىز. ءىرى بيزنەس وكىلدەرىنىڭ اراسىندا ءتۇرلى كەلىسسوزدەر ءجۇرۋى زاڭدىلىق، ءبىراق ناقتى ناتيجە تۋرالى ايتۋعا ءالى ەرتە. بۇل اقپاراتتار نارىقتاعى الىپقاشپا ءسوز بولۋى دا مۇمكىن»، — دەپ مالىمدەدى كومپانيا وكىلدەرى.

سونىمەن قاتار، Qazaq Stroy كومپانياسىنىڭ يەسى نۇرلان ارتىقبايەۆتىڭ قازىرگى تاڭدا قۇرىلىستان بولەك، تەلەكوممۋنيكاسيا جانە ءوندىرىس سالالارىنا ينۆەستيسيا سالۋ مۇمكىندىكتەرىن قاراستىرىپ جاتقانى ايتىلدى.

ال Glencore كومپانياسى "تۇسىنىكتەمە بەرمەيمىز" دەپ قىسقا قايىرعان.