InfoHub Logo

بوستون مەتروسىندا تراگەديالىق وقيعا بولىپ، 40 جاستاعى ەر ادام ەسكالاتورعا ءىلىنىپ قالىپ، كوز جۇمدى. ول ەكى بالانىڭ اكەسى ستيۆەن ماككلاسكي ەكەنى انىقتالدى. وقيعا 27 اقپاندا ديەۆيس ستانسياسىندا بولعان.

بۇل تۋرالى Infohub.kz اقپارات اگەنتتىگى حابارلايدى.

كولىك باسقارماسىنىڭ (MBTA) جاريالاعان بەينەجازبالارىنا قاراعاندا، وقيعا كەزىندە زارداپ شەگۋشىنىڭ جانىنان وننان استام ادام ءوتىپ كەتكەن. الايدا، ەشكىم وعان كومەككە ۇمتىلماعان. ەر ادام ءوز بەتىنشە كيىمىن شەشۋگە تىرىسقانىمەن، قولىنان كەلمەگەن. كيىمى موينىن قىسىپ، تىنىس الۋىنا مۇمكىندىك بەرمەگەن.

تراگەديانىڭ ءمان-جايى

سول كۇيى ەر ادام العان جاراقاتتارىنان سول جەردە كوز جۇمدى. پوليسيانىڭ حابارلاۋىنشا، مەترو قىزمەتكەرى وقيعا ورنىنا شامامەن 20 مينۋتتان كەيىن كەلگەن. ول ەسكالاتوردى توقتاتقانىمەن، ەر ادامنىڭ دەنەسى مەحانيزمگە قىسىلىپ قالعان بولاتىن. مەترو قىزمەتكەرى كەلگەندە، ەر ادامنىڭ جانى شىعىپ كەتكەن.

رەسمي مالىمەتتە ستيۆەن ماككلاسكي ەس-تۇسسىز جاتقانى، ونىڭ كيىمىنىڭ ەسكالاتور باسپالداقتارىنا قاتتى قىسىلىپ قالعانى ايتىلعان. قۇتقارۋشىلار ءمايىتتى شىعارۋ ءۇشىن ەسكالاتوردى ءىشىنارا بولشەكتەۋگە ءماجبۇر بولعان.

وتباسىنىڭ جاۋابى

مارقۇمنىڭ اپكەسىنىڭ ايتۋىنشا، ول ۇزاق جىلدار بويى تاۋەلدىلىكپەن كۇرەسكەن، ءبىراق جاقىندارىنا قامقورلىق جاساۋعا تىرىسقان. ول اعاسىنىڭ اعاش ۇستاسى بولىپ جۇمىس ىستەگەنىن جانە اكە رەتىندە ەكى ۇلى – شەين مەن ستيۆەن ءۇشىن ماقتانعانىن ايتتى.

مارقۇمنىڭ اناسى مەترو قىزمەتكەرلەرىنىڭ ۋاقتىلى ارەكەت ەتپەگەنىن ايتىپ، نارازىلىق ءبىلدىردى. توتەنشە جاعدايلار قىزمەتى بۇل وقيعانى كەزدەيسوق جازاتايىم وقيعا دەپ تانىپ، مۇنداي جاعدايلاردا ەسكالاتوردى توقتاتۋ ءۇشىن اۆاريالىق باتىرمانى قولدانۋ كەرەكتىگىن ەسكە سالدى.

ميددلسەكس وكرۋگىنىڭ پروكۋراتۋراسى تەرگەۋدى جالعاستىرۋدا. مارقۇمنىڭ وتباسى بوستوننىڭ كولىك باسقارماسىنان رەسمي جاۋاپكەرشىلىكتى مويىنداۋدى تالاپ ەتىپ وتىر.