بۇدان بىلاي مۇعالىمدەر جۇمىسقا كونكۋرس ارقىلى قابىلدانادى، ديرەكتور ءوزى شەشپەيدى
ق ر ءبىلىم جانە عىلىم مينيسترلىگىنىڭ پەداگوگتەردى جۇمىسقا قابىلداۋ قاعيدالارىنا قاتىستى جاڭا بۇيرىعى ق ر ادىلەت مينيسترلىگىندە تىركەلدى.
بۇل جايىندا ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى.
«ەندى پەداگوگتەردى جۇمىسقا قابىلداۋ جاڭا فورماتتا كونكۋرس جانە ناقتى كريتەرييلەر بويىنشا جۇزەگە اسىرىلادى. ايتا كەتكەن ءجون، اتالعان وزگەرىستەر مۇعالىمدەردى جۇمىسقا ورنالاستىرۋ كەزىندە اشىقتىقتى قامتاماسىز ەتۋگە، سىبايلاس جەمقورلىق تاۋەكەلدەرىن جويۋعا جانە جۇمىسقا قابىلداۋ كەزىندە مەريتوكراتيا قاعيدالارىن قامتاماسىز ەتۋگە باعىتتالعان. بۇعان دەيىن ناقتى ەرەجە بولعان جوق، ياعني مەكتەپ ديرەكتورى كىمدى جانە قانداي كورسەتكىشتەر بويىنشا جۇمىسقا قابىلداۋ كەرەكتىگى تۋرالى ءوزى شەشەتىن. ءبىرقاتار ايماقتا ساعاتتار سانىن دۇرىس بولمەي، ءۇش-تورت ءمۇعالىم ءبىر ستاۆكاعا قابىلدانعان جاعدايلار تىركەلدى. مۇنداي جاعدايلار قانداي سەبەپتەرگە بايلانىستى ورىن الاتىنىن بولجاۋ قيىن ەمەس»، - دەپ جازادى مينيستر.
ونىڭ ايتۋىنشا، بۇدان بىلاي ءبىلىم بەرۋ ۇيىمدارى بارلىق بوس نەمەسە ۋاقىتشا بوس لاۋازىمدارعا كونكۋرس وتكىزەدى. بۇل شاعىن جيناقتى مەكتەپتەرگە قاتىستى ەمەس.
بايقاۋعا بىلىكتىلىك سيپاتتامالارىنا سايكەس كەلەتىن مۇعالىمدەر قاتىسادى.
«ەندى تولىعىراق اتاپ وتەيىن. جۇمىسقا ورنالاسۋ كەزىندە ۇمىتكەر كونكۋرسقا قاتىسۋ تۋرالى ءوتىنىش بەرەدى. ءوتىنىش بەرۋشى ءوزىنىڭ باعالاۋ پاراعىن قوسا ۇسىنادى. وندا بارلىق جەتىستىگى، ناتيجەلەرى، ەڭبەك ءوتىلى، اكىمشىلىك نەمەسە ادىستەمەلىك قىزمەت تاجىريبەسى، كۋرستىق دايىندىق جانە باسقا دا اقپارات كورسەتىلەدى. ءاربىر باعىت بويىنشا كانديدات بەلگىلەنگەن كريتەرييلەر ارقىلى باعالاۋ شكالاسىنا سايكەس ءوز بالدارىن دەربەس قويادى.
كونكۋرستىق كوميسسيا ءوتىنىش بەرۋشىنىڭ ءوزى قويعان بالداردىڭ، ولاردى راستايتىن قۇجاتتاردىڭ سايكەستىگىن تەكسەرىپ، قورىتىندى ۇپاي شىعارادى. ناتيجەسىندە بوس ورىنعا ەڭ كوپ بالل جيناعان ۇمىتكەر قابىلدانادى. سۋبەكتيۆيزم دەڭگەيى بارىنشا تومەندەيدى.
سونىمەن بىرگە بۇرىنعى جۇمىس ورنىنان ۇسىنىس حاتتار دا سۇراتىلادى. ۇمىتكەر وڭ ۇسىنىس ءۇشىن 3 بالل جيناسا، ال تەرىس ۇسىنىس ءۇشىن 5 بالل جوعالتادى.
ۇيىمدار ۇمىتكەردىڭ قانداي دا ءبىر بۇزۋشىلىقتارعا، ونىڭ ىشىندە پەداگوگيكالىق ەتيكا بويىنشا بۇزۋشىلىقتارعا جول بەردى مە، جوق پا، سول تۋرالى اقپاراتتى ەسكەرە الادى. مۇنداي فاكتىلەر انىقتالسا، پەداگوگ كەز كەلگەن كەزەڭدە كونكۋرستان شەتتەتىلەدى.
ەرەجەدە ۇمىتكەردىڭ بىلىكتىلىك ساناتىنىڭ مىندەتتى تۇردە بولۋى قاراستىرىلعان.
ەندى جوعارى وقۋ ورىندارى مەن كوللەدج تۇلەكتەرىنە جۇمىسقا قابىلدانۋ ءۇشىن ديپلومنىڭ بولۋى جەتكىلىكسىز ەكەنىن اتاپ وتكەن ءجون. ولار ۇلتتىق بىلىكتىلىك تەستىلەۋدەن ءوتىپ، ودان ءارى مەكتەپتە «پەداگوگ» ءبىرىنشى ساناتىن الۋعا مىندەتتى» دەپ ءتۇسىندىردى مينيستر.
پەداگوگ قىزمەتىن نەگىزگى جۇمىسىمەن قوسا اتقاراتىن مۇعالىمدەردى ءبىر ءپان بويىنشا 8 ساعاتتان اسپايتىن جۇكتەمەمەن كونكۋرسسىز جۇمىسقا قابىلداۋعا رۇقسات ەتىلەتىنىن ايتا كەتكەن ءجون.
سونداي-اق وسى ءبىلىم بەرۋ ۇيىمىنىڭ مۇعالىمدەرى اراسىندا جۇكتەمەسى 8 ساعاتتان از بوس ورىنداردى ۇلەستىرۋگە بولادى. بۇل رەتتە ءبىر ءپان بويىنشا بوس 9 نەمەسە ودان دا كوپ ساعاتتى جاساندى تۇردە بولشەكتەۋگە جول بەرىلمەيدى.
قابىلدانعان ەرەجە پەداگوگتەرمەن، ساراپشىلارمەن، مەكتەپ ديرەكتورلارى جانە ادىسكەرلەرمەن، ءبىلىم باسقارمالارىنىڭ باسشىلارىمەن جانە باسقا دا ءبىلىم بەرۋ ۇيىمدارىنىڭ وكىلدەرىمەن تالقىلاندى.
اتالعان شارالار سىبايلاس جەمقورلىق تاۋەكەلدەرىن جويۋعا جانە پەداگوگ لاۋازىمىنا ۇمىتكەرلەردى ساپالى ىرىكتەۋگە باعىتتالعان.
You Might Also Like
-
قازاقستان جۋرناليستەر وداعىنىڭ مۇشەسى، بۇكىل سانالى عۇمىرىن باسپا ءسوز سالاسىنا ارناپ كەلە جاتقان ارىپتەىسىمىزدى بۇگىن مەرەيلى 55 جاسقا تولۋىمەن قۇتتىقتاي وتىرىپ، شىعارماشىلىق ەڭبەگىنە شابىت، وتباسىن...
