InfoHub Logo

اقش مەمدەپارتامەنتىنىڭ ح جەلىسىندە جاريالانعان “بۇل – ءبىزدىڭ جارتىشار“ دەگەن جولدار ايماقتىق قاۋىپسىزدىك تۋرالى ساياسي سيگنالعا اينالدى. 5 قاڭتاردا مەملەكەتتىك حاتشى ماركو رۋبيو بۇل تۇجىرىمنىڭ ءمانىن اشىپ، ۆەنەسۋەلادا نيكولاس مادۋرو ۇستالعان وپەراسيانى سوعىس ەمەس، امەريكالىقتاردىڭ قاۋىپسىزدىگىن قورعاۋعا باعىتتالعان قۇقىققورعاۋ قادامى دەپ ءتۇسىندىردى.

بۇل تۋرالى Infohub.kz اقپارات اگەنتتىگى حابارلايدى.

ح-تەگى مالىمدەمە جانە ونىڭ اۆتورى

5 قاڭتاردا مەمدەپتىڭ رەسمي اككاۋنتى اقش پرەزيدەنتى دونالد ترامپتىڭ سۋرەتىمەن “بۇل – ءبىزدىڭ جارتىشار، جانە پرەزيدەنت قاۋىپسىزدىگىمىزگە قاتەرگە جول بەرمەيدى“ دەگەن جازبا جاريالادى. كەيىن ۆەدومستۆو ءوز سايتىندا تۇسىنىكتەمە بەرىپ، بۇل ءسوز تىركەسى 4 قاڭتاردا بىرنەشە جاڭالىقتار باعدارلاماسىنا سۇحبات بەرگەن مەملەكەتتىك حاتشى ماركو رۋبيودان الىنعانىن اتاپ ءوتتى.

وپەراسيا ماقساتى: ەسىرتكى ترافيگىن توقتاتۋ

رۋبيو NBC News-تىڭ Meet the Press ەفيرىندە ۆەنەسۋەلادا سەنبى كۇنى وتكەن ارنايى قيمىلدىڭ نەگىزگى مىندەتى اقش-قا زاڭسىز ەسىرتكى تاسىمالىن تىيۋ بولعانىن ايتتى. ونىڭ سوزىنشە، “دەموكراتيا مەن سايلاۋلار ماڭىزدى، ءبىراق ءبىرىنشى ورىنعا امەريكانىڭ قاۋىپسىزدىگى، ءال-اۋقاتى مەن وركەندەۋىن قويامىز“.

“سوعىس ەمەس، قۇقىققورعاۋ“

اقش مەملەكەتتىك حاتشىسى “اقش پەن ۆەنەسۋەلا اراسىندا سوعىس جوق“ دەپ كەسىپ ايتتى. ونىڭ ايتۋىنشا، نىسانا – ەسىرتكى ساۋداسىمەن اينالىساتىن ۇيىمدار. رۋبيو بۇل ۇستانىمدى سەنبى كۇنى پرەزيدەنت جانە اكىمشىلىكتىڭ وزگە وكىلدەرىمەن بىرلەسكەن باسپا ءسوز ءماسليحاتىندا دا قايتالاپ، ۆەنەسۋەلا اۋماعىنداعى سوققىلار مەن مادۋرونى ۇستاۋ “قۇقىققورعاۋ سيپاتىنداعى ارەكەت“ بولعانىن مالىمدەدى.

كونگرەسسپەن كەلىسۋ جونىندەگى داۋ

CBS دەرەگىنە قاراعاندا، كونگرەسستەگى قوس پارتيانىڭ ءبىرقاتار زاڭ شىعارۋشىسى وپەراسيانىڭ سالدارى مەن قۇنىنان الاڭداۋشىلىق ءبىلدىردى، ال دەموكراتتار اق ءۇيدى كونگرەستى الدىن الا حاباردار ەتپەدى دەپ سىنعا الدى. رۋبيو بۇعان جاۋاپ بەرىپ، “كونگرەسس ماقۇلداۋى قاجەت قادامدار ءۇشىن ماقۇلداۋ سۇرايمىز، ال بۇل وپەراسيا ونداي ماقۇلداۋدى تالاپ ەتپەدى“ دەدى. ول مۇنداي ميسسيالاردى سوڭعى 40 جىلدا دەرلىك ءاربىر پرەزيدەنت جۇرگىزگەنىن ايتتى.

ايماقتاعى ىقتيمال قادامدار جانە بيلىك ءترانزيتى

دونالد ترامپ كولۋمبيادا دا سوعان ۇقساس سەنارييدى جوققا شىعارمادى جانە مەكسيكانىڭ ەسىرتكىگە قارسى كۇرەسىن سىنعا الدى. ۆەنەسۋەلادا بيلىك ءترانزيتى ماسەلەسى ۋشىعىپ تۇر: 5 قاڭتاردا ۆيسە-پرەزيدەنت دەلسي رودريگەس جوعارعى سوتتىڭ ماقۇلداۋىمەن ۇلتتىق اسسامبلەيا كەڭەسىندە ۋاقىتشا پرەزيدەنت رەتىندە انت بەردى. وسى رەتتە بىرنەشە امەريكالىق رەسپۋبليكالىق كونگرەسسمەن ەلدى وپپوزيسيا وكىلدەرىنىڭ، سونىڭ ىشىندە نوبەلدىڭ بەيبىتشىلىك سىيلىعى لاۋرەاتى ماريا كورينا ماچادونىڭ باسقارۋىنا بەرۋدى ۇسىندى.